اب دل کی یہ شکل ہو گئی ہے

جیسے کوئی چیز کھو گئی ہے

ہم اپنے حال پریشاں پہ بارہا روئے

اور اس کے بعد ہنسی ہم کو بارہا آئی

دل سے مت سرسری گزر کہ رئیسؔ

یہ زمیں آسماں سے آتی ہے

ہم اپنی زندگی تو بسر کر چکے رئیسؔ

یہ کس کی زیست ہے جو بسر کر رہے ہیں ہم

اپنے کو تلاش کر رہا ہوں

اپنی ہی طلب سے ڈر رہا ہوں

صدیوں تک اہتمام شب ہجر میں رہے

صدیوں سے انتظار سحر کر رہے ہیں ہم

ابھی سے شکوۂ پست و بلند ہم سفرو

ابھی تو راہ بہت صاف ہے ابھی کیا ہے

پہلے یہ شکر کہ ہم حد ادب سے نہ بڑھے

اب یہ شکوہ کہ شرافت نے کہیں کا نہ رکھا

صرف تاریخ کی رفتار بدل جائے گی

نئی تاریخ کے وارث یہی انساں ہوں گے

خاموش زندگی جو بسر کر رہے ہیں ہم

گہرے سمندروں میں سفر کر رہے ہیں ہم

پہلے بھی خراب تھی یہ دنیا

اب اور خراب ہو گئی ہے

آدمی کی تلاش میں ہے خدا

آدمی کو خدا نہیں ملتا

چند بے نام و نشاں قبروں کا

میں عزا دار ہوں یا ہے مرا دل

یہ کربلا ہے نذر بلا ہم ہوئے کہ تم

ناموس قافلہ پہ فدا ہم ہوئے کہ تم

دل کئی روز سے دھڑکتا ہے

ہے کسی حادثے کی تیاری

کس نے دیکھے ہیں تری روح کے رستے ہوئے زخم

کون اترا ہے ترے قلب کی گہرائی میں

ٹہنی پہ خموش اک پرندہ

ماضی کے الٹ رہا ہے دفتر