اک وہی شخص مجھ کو یاد رہا

جس کو سمجھا تھا بھول جاؤں گا

کیسے ہو کیا ہے حال مت پوچھو

مجھ سے مشکل سوال مت پوچھو

جھوٹی امید کی انگلی کو پکڑنا چھوڑو

درد سے بات کرو درد سے لڑنا چھوڑو

وہ بھی ہمارے نام سے بیگانے ہو گئے

ہم کو بھی سچ ہے ان سے محبت نہیں رہی

ہم جو پہلے کہیں ملے ہوتے

اور ہی اپنے سلسلے ہوتے

ایسا نہیں کہ ان سے محبت نہ ہو مگر

پہلے سا جوش پہلے سی شدت نہیں رہی

زندگی ہم سے تو اس درجہ تغافل نہ برت

ہم بھی شامل تھے ترے چاہنے والوں میں کبھی

یہ تمنا ہے کہ اب اور تمنا نہ کریں

شعر کہتے رہیں چپ چاپ تقاضا نہ کریں

دیکھے جو میری نیکی کو شک کی نگاہ سے

وہ آدمی بھی تو مرے اندر ہے کیا کروں

کچھ تو میں بھی ڈرا ڈرا سا تھا

اور کچھ راستا نیا سا تھا

نکلے تھے دونوں بھیس بدل کے تو کیا عجب

میں ڈھونڈتا خدا کو پھرا اور خدا مجھے

چاند سورج کی طرح تم بھی ہو قدرت کا کھیل

جیسے ہو ویسے رہو بننا بگڑنا چھوڑو

جب یہ مانا کہ دل میں ڈر ہے بہت

تب کہیں جا کے دل سے ڈر نکلا

کچھ تو اپنے لئے بھی رکھنا ہے

زخم اوروں کو کیوں دکھائیں سب

وہ ایک خواب جو پھر لوٹ کر نہیں آیا

وہ اک خیال جسے میں بھلا نہیں سکتا

یہ الگ بات کہ وہ مجھ سے خفا رہتا ہے

میں اک انسان ہوں اور مجھ میں خدا رہتا ہے

کوئی شے ایک سی نہیں رہتی

عمر ڈھلتی ہے غم بدلتے ہیں

زندگی اس قدر کٹھن کیوں ہے

آدمی کی بھلا خطا کیا ہے

جس سے سارے چراغ جلتے تھے

وہ چراغ آج کچھ بجھا سا تھا

گفتگو تیر سی لگی دل میں

اب ہے شاید علاج سناٹا

اپنی عادت کہ سب سے سب کہہ دیں

شہر کا ہے مزاج سناٹا

جھانکتے رات کے گریباں سے

ہم نے سو آفتاب دیکھے ہیں

خالی برآمدوں نے مجھے دیکھ کر کہا

کیا بات ہے اداس سے کچھ لگ رہے ہو تم

ہزار چاہیں مگر چھوٹ ہی نہیں سکتی

بڑی عجیب ہے یہ مےکشی کی عادت بھی

بت سمجھتے تھے جس کو سارے لوگ

وہ مرے واسطے خدا سا تھا

مجھے خبر نہ تھی اس گھر میں کتنے کمرے ہیں

میں کیسے لے کے وہاں ساری داستاں جاتا

کیا نہیں جانتا مجھے کوئی

کیا نہیں شہر میں وہ گھر باقی

جینا عذاب کیوں ہے یہ کیا ہو گیا مجھے

کس شخص کی لگی ہے بھلا بد دعا مجھے

جو بات چھپائی ہے سب سے وو ان سے چھپانی مشکل ہے

باہر کی کہانی آساں ہے اندر کی کہانی مشکل ہے