ik vahī shaḳhs mujh ko yaad rahā

jis ko samjhā thā bhuul jā.ūñgā

ek wahi shaKHs mujh ko yaad raha

jis ko samjha tha bhul jaunga

kaise ho kyā hai haal mat pūchho

mujh se mushkil savāl mat pūchho

kaise ho kya hai haal mat puchho

mujh se mushkil sawal mat puchho

jhūTī ummīd kī uñglī ko pakaḌnā chhoḌo

dard se baat karo dard se laḌnā chhoḌo

jhuTi ummid ki ungli ko pakaDna chhoDo

dard se baat karo dard se laDna chhoDo

vo bhī hamāre naam se begāne ho ga.e

ham ko bhī sach hai un se mohabbat nahīñ rahī

wo bhi hamare nam se begane ho gae

hum ko bhi sach hai un se mohabbat nahin rahi

ham jo pahle kahīñ mile hote

aur hī apne silsile hote

hum jo pahle kahin mile hote

aur hi apne silsile hote

aisā nahīñ ki un se mohabbat na ho magar

pahle sā josh pahle sī shiddat nahīñ rahī

aisa nahin ki un se mohabbat na ho magar

pahle sa josh pahle si shiddat nahin rahi

zindagī ham se to is darja taġhāful na barat

ham bhī shāmil the tire chāhne vāloñ meñ kabhī

zindagi hum se to is darja taghaful na barat

hum bhi shamil the tere chahne walon mein kabhi

ye tamannā hai ki ab aur tamannā na kareñ

sher kahte raheñ chup chaap taqāzā na kareñ

ye tamanna hai ki ab aur tamanna na karen

sher kahte rahen chup chap taqaza na karen

dekhe jo merī nekī ko shak kī nigāh se

vo aadmī bhī to mire andar hai kyā karūñ

dekhe jo meri neki ko shak ki nigah se

wo aadmi bhi to mere andar hai kya karun

kuchh to maiñ bhī Darā Darā sā thā

aur kuchh rāstā nayā sā thā

kuchh to main bhi Dara Dara sa tha

aur kuchh rasta naya sa tha

nikle the donoñ bhes badal ke to kyā ajab

maiñ DhūñDtā ḳhudā ko phirā aur ḳhudā mujhe

nikle the donon bhes badal ke to kya ajab

main DhunDta KHuda ko phira aur KHuda mujhe

chāñd sūraj kī tarah tum bhī ho qudrat kā khel

jaise ho vaise raho banñā bigaḌnā chhoḌo

chand suraj ki tarah tum bhi ho qudrat ka khel

jaise ho waise raho banna bigaDna chhoDo

jab ye maanā ki dil meñ Dar hai bahut

tab kahīñ jā ke dil se Dar niklā

jab ye mana ki dil mein Dar hai bahut

tab kahin ja ke dil se Dar nikla

vo ek ḳhvāb jo phir lauT kar nahīñ aayā

vo ik ḳhayāl jise maiñ bhulā nahīñ saktā

wo ek KHwab jo phir lauT kar nahin aaya

wo ek KHayal jise main bhula nahin sakta

kuchh to apne liye bhī rakhnā hai

zaḳhm auroñ ko kyuuñ dikhā.eñ sab

kuchh to apne liye bhi rakhna hai

zaKHm auron ko kyun dikhaen sab

ye alag baat ki vo mujh se ḳhafā rahtā hai

maiñ ik insān huuñ aur mujh meñ ḳhudā rahtā hai

ye alag baat ki wo mujh se KHafa rahta hai

main ek insan hun aur mujh mein KHuda rahta hai

koī shai ek sī nahīñ rahtī

umr Dhaltī hai ġham badalte haiñ

koi shai ek si nahin rahti

umr Dhalti hai gham badalte hain

zindagī is qadar kaThin kyuuñ hai

aadmī kī bhalā ḳhatā kyā hai

zindagi is qadar kaThin kyun hai

aadmi ki bhala KHata kya hai

jis se saare charāġh jalte the

vo charāġh aaj kuchh bujhā sā thā

jis se sare charagh jalte the

wo charagh aaj kuchh bujha sa tha

guftugū tiir sī lagī dil meñ

ab hai shāyad ilaaj sannāTā

guftugu tir si lagi dil mein

ab hai shayad ilaj sannaTa

apnī aadat ki sab se sab kah deñ

shahr kā hai mizāj sannāTā

apni aadat ki sab se sab kah den

shahr ka hai mizaj sannaTa

jhāñkte raat ke garebāñ se

ham ne sau āftāb dekhe haiñ

jhankte raat ke gareban se

hum ne sau aaftab dekhe hain

ḳhālī barāmdoñ ne mujhe dekh kar kahā

kyā baat hai udaas se kuchh lag rahe ho tum

KHali baramdon ne mujhe dekh kar kaha

kya baat hai udas se kuchh lag rahe ho tum

hazār chāheñ magar chhūT hī nahīñ saktī

baḌī ajiib hai ye mai-kashī kī aadat bhī

hazar chahen magar chhuT hi nahin sakti

baDi ajib hai ye mai-kashi ki aadat bhi

but samajhte the jis ko saare log

vo mire vāste ḳhudā sā thā

but samajhte the jis ko sare log

wo mere waste KHuda sa tha

mujhe ḳhabar na thī is ghar meñ kitne kamre haiñ

maiñ kaise le ke vahāñ saarī dāstāñ jaatā

mujhe KHabar na thi is ghar mein kitne kamre hain

main kaise le ke wahan sari dastan jata

kyā nahīñ jāntā mujhe koī

kyā nahīñ shahr meñ vo ghar baaqī

kya nahin jaanta mujhe koi

kya nahin shahr mein wo ghar baqi

jiinā azaab kyuuñ hai ye kyā ho gayā mujhe

kis shaḳhs kī lagī hai bhalā bad-duā mujhe

jina azab kyun hai ye kya ho gaya mujhe

kis shaKHs ki lagi hai bhala bad-dua mujhe

jo baat chhupā.ī hai sab se vo un se chhupānī mushkil hai

bāhar kī kahānī āsāñ hai andar kī kahānī mushkil hai

jo baat chhupai hai sab se wo un se chhupani mushkil hai

bahar ki kahani aasan hai andar ki kahani mushkil hai