کچھ مہ جبیں لباس کے فیشن کی دوڑ میں

پابندیٔ لباس سے آگے نکل گئے

سرور جاں فزا دیتی ہے آغوش وطن سب کو

کہ جیسے بھی ہوں بچے ماں کو پیارے ایک جیسے ہیں

عید پر مسرور ہیں دونوں میاں بیوی بہت

اک خریداری سے پہلے اک خریداری کے بعد

فقط رنگ ہی ان کا کالا نہیں ہے

اسی قسم کی خوبیاں اور بھی ہیں

سپیشلسٹ پین کلر دے تو کون سا؟

''سارے جہاں کا درد ہمارے جگر میں ہے''

مرغ پر فوراً جھپٹ دعوت میں ورنہ بعد میں

شوربہ اور گردنوں کی ہڈیاں رہ جائیں گی

سارے شکوے دور ہو جائیں جو قدرت سونپ دے

میری دانائی تجھے اور تیری نادانی مجھے

کوئی خوش ذوق ہی شاہدؔ یہ نکتہ جان سکتا ہے

کہ میرے شعر اور نخرے تمہارے ایک جیسے ہیں

ایسے لگے ہے نوکری مال حرام کے بغیر

جیسے ہو داغؔ کی غزل بادہ و جام کے بغیر

اس دور کے مردوں کی جو کی شکل شماری

ثابت ہوا دنیا میں خواتین بہت ہیں

راز و نیاز میں بھی اکڑ فوں نہیں گئی

وہ خط بھی لکھ رہا ہے تو چالان کی طرح

بجٹ کی کئی سختیاں اور بھی ہیں

''ابھی عشق کے امتحاں اور بھی ہیں''

شاہدؔ صاحب کہلاتے ہیں مسٹر بھی مولانا بھی

حضرت دو کرداروں والے ہیرا پھیری کرتے ہیں

عوام الناس کو ایسے دبوچا ہے گرانی نے

کہ جیسے کیٹ کے پنجے میں کوئی ریٹ ہوتا ہے

ہم نے تو انہیں جامعہ سے نقد خریدا

پھر کس طرح جعلی ہوئیں اسناد ہماری