āñkhoñ meñ damak uTThī hai tasvīr-e-dar-o-bām

ye kaun gayā mere barābar se nikal kar

aankhon mein damak uTThi hai taswir-e-dar-o-baam

ye kaun gaya mere barabar se nikal kar

kabhī teġh-e-tez supurd kī kabhī tohfa-e-gul-e-tar diyā

kisī shāh-zādī ke ishq ne mirā dil sitāroñ se bhar diyā

kabhi tegh-e-tez supurd ki kabhi tohfa-e-gul-e-tar diya

kisi shah-zadi ke ishq ne mera dil sitaron se bhar diya

maiñ kitāb-e-ḳhāk kholūñ to khule

kyā nahīñ maujūd kyā maujūd hai

main kitab-e-KHak kholun to khule

kya nahin maujud kya maujud hai

miTTī pe numūdār haiñ paanī ke zaḳhīre

in meñ koī aurat se ziyāda nahīñ gahrā

miTTi pe numudar hain pani ke zaKHire

in mein koi aurat se ziyaada nahin gahra

ye intihā-e-masarrat kā shahr hai 'sarvat'

yahāñ to har dar-o-dīvār ik samundar hai

ye intiha-e-masarrat ka shahr hai 'sarwat'

yahan to har dar-o-diwar ek samundar hai