dekh ye jazb-e-mohabbat kā karishma to nahīñ

kal jo tere dil meñ thā vo aaj mere dil meñ hai

dekh ye jazb-e-mohabbat ka karishma to nahin

kal jo tere dil mein tha wo aaj mere dil mein hai

āshiqī kī ḳhair ho 'sarvar' ki ab is shahr meñ

vaqt vo aayā hai bande bhī ḳhudā hone lage

aashiqi ki KHair ho 'sarwar' ki ab is shahr mein

waqt wo aaya hai bande bhi KHuda hone lage

āġhāz-e-mohabbat se anjām-e-mohabbat tak

''ik aag kā dariyā hai aur Duub ke jaanā hai''

aaghaz-e-mohabbat se anjam-e-mohabbat tak

ik aag ka dariya hai aur Dub ke jaana hai

tū ne kab ishq meñ achchhā burā sochā 'sarvar'

kaise mumkin hai ki terā burā anjām na ho

tu ne kab ishq mein achchha bura socha 'sarwar'

kaise mumkin hai ki tera bura anjam na ho

be-kaif javānī hai be-dard zamāna hai

nākām-e-mohabbat kā itnā hī fasāna hai

be-kaif jawani hai be-dard zamana hai

nakaam-e-mohabbat ka itna hi fasana hai

aarzū hasrat aur ummīd shikāyat aañsū

ik tirā zikr thā aur biich meñ kyā kyā niklā

aarzu hasrat aur ummid shikayat aansu

ek tera zikr tha aur bich mein kya kya nikla

kam-ayārī ne ḳhudā-soz banāyā aisā

but to sab yaad rahe ek ḳhudā bhuul ga.e

kam-ayari ne KHuda-soz banaya aisa

but to sab yaad rahe ek KHuda bhul gae

bayān qissa-e-bechārgī kiyā jaa.e

jo dil kī rah ga.ī dil meñ use kahā jaa.e

bayan qissa-e-bechaargi kiya jae

jo dil ki rah gai dil mein use kaha jae

shauq hai tujh ko zamāne meñ tirā naam rahe

aur mujhe Dar hai mohabbat mirī bad-nām na ho

shauq hai tujh ko zamane mein tera nam rahe

aur mujhe Dar hai mohabbat meri bad-nam na ho