terā hī ho ke jo rah jā.ūñ to phir kyā hogā

ai junūñ aur haiñ duniyā meñ bahut kaam mujhe

tera hi ho ke jo rah jaun to phir kya hoga

ai junun aur hain duniya mein bahut kaam mujhe

dil ne chupke se kahā koshish-e-nākām ke baad

zahr hī dard-e-mohabbat kī davā ho jaise

dil ne chupke se kaha koshish-e-nakaam ke baad

zahr hi dard-e-mohabbat ki dawa ho jaise

na jaane haar hai yā jiit kyā hai

ġhamoñ par muskurānā aa gayā hai

na jaane haar hai ya jit kya hai

ghamon par muskurana aa gaya hai

manzil na milī to ġham nahīñ hai

apne ko to kho ke pā gayā huuñ

manzil na mili to gham nahin hai

apne ko to kho ke pa gaya hun

yuuñ guzartā hai tirī yaad kī vaadī meñ ḳhayāl

ḳhārzāroñ meñ koī barhana-pā ho jaise

yun guzarta hai teri yaad ki wadi mein KHayal

KHarzaron mein koi barhana-pa ho jaise

maiñ samajhtā huuñ mujhe daulat-e-kaunain milī

kaun kahtā hai ki vo kar ga.e badnām mujhe

main samajhta hun mujhe daulat-e-kaunain mili

kaun kahta hai ki wo kar gae badnam mujhe

bujhīñ sham.eñ to dil jalā.e haiñ

yuuñ añdheroñ meñ raushnī kī hai

bujhin shamen to dil jalae hain

yun andheron mein raushni ki hai

vādi-e-shab meñ ujāloñ kā guzar ho kaise

dil jalā.e raho paiġhām-e-sahar aane tak

wadi-e-shab mein ujalon ka guzar ho kaise

dil jalae raho paigham-e-sahar aane tak