ai raat mujhe maañ kī tarah god meñ le le

din bhar kī mashaqqat se badan TuuT rahā hai

ai raat mujhe man ki tarah god mein le le

din bhar ki mashaqqat se badan TuT raha hai

aurat ko samajhtā thā jo mardoñ kā khilaunā

us shaḳhs ko dāmād bhī vaisā hī milā hai

aurat ko samajhta tha jo mardon ka khilauna

us shaKHs ko damad bhi waisa hi mila hai

shāyad yūñhī simaT sakeñ ghar kī zarūrateñ

'tanvīr' maañ ke haath meñ apnī kamā.ī de

shayad yunhi simaT saken ghar ki zaruraten

'tanwir' man ke hath mein apni kamai de

mill mālik ke kutte bhī charbīle haiñ

lekin mazdūroñ ke chehre piile haiñ

mill malik ke kutte bhi charbile hain

lekin mazduron ke chehre pile hain

jo kar rahā hai dūsroñ ke zehn kā ilaaj

vo shaḳhs ḳhud bahut baḌā zehnī marīz hai

jo kar raha hai dusron ke zehn ka ilaj

wo shaKHs KHud bahut baDa zehni mariz hai

ab tak mire a.asāb pe mehnat hai musallat

ab tak mire kānoñ meñ mashīnoñ kī sadā hai

ab tak mere aasab pe mehnat hai musallat

ab tak mere kanon mein mashinon ki sada hai

dihāt ke vajūd ko qasba nigal gayā

qasbe kā jism shahr kī buniyād khā ga.ī

dihat ke wajud ko qasba nigal gaya

qasbe ka jism shahr ki buniyaad kha gai

maiñ apne bachpane meñ chhū na paayā jin khilaunoñ ko

unhī ke vāste ab merā beTā bhī machaltā hai

main apne bachpane mein chhu na paya jin khilaunon ko

unhi ke waste ab mera beTa bhi machalta hai

ham hizb-e-iḳhtilāf meñ bhī mohtaram hue

vo eqtidār meñ haiñ magar be-viqār haiñ

hum hizb-e-iKHtilaf mein bhi mohtaram hue

wo eqtidar mein hain magar be-wiqar hain

kabhī apne vasā.el se na baḌh kar ḳhvāhisheñ paalo

vo paudā TuuT jaatā hai jo lā-mahdūd phaltā hai

kabhi apne wasael se na baDh kar KHwahishen palo

wo pauda TuT jata hai jo la-mahdud phalta hai

aaj bhī 'siprā' us kī ḳhushbū mill mālik le jaatā hai

maiñ lohe kī naaf se paidā jo kastūrī kartā huuñ

aaj bhi 'sipra' us ki KHushbu mill malik le jata hai

main lohe ki naf se paida jo kasturi karta hun

terī to aan baḌh ga.ī mujh ko navāz kar

lekin mirā vaqār ye imdād khā ga.ī

teri to aan baDh gai mujh ko nawaz kar

lekin mera waqar ye imdad kha gai

aaj itnā jalāo ki pighal jaa.e mirā jism

shāyad isī sūrat hī sukūñ paa.e mirā jism

aaj itna jalao ki pighal jae mera jism

shayad isi surat hi sukun pae mera jism

kitnā buad hai mere fan aur peshe ke mābain

bāhar dānish-var huuñ lekin mill meñ oil-man

kitna buad hai mere fan aur peshe ke mabain

bahar danish-war hun lekin mill mein oil-man

sab kī nigāh meñ tire godām aa ga.e

ab apne hāthoñ maal kī taqsīm kar na kar

sab ki nigah mein tere godam aa gae

ab apne hathon mal ki taqsim kar na kar

'tanvīr' ab tū halq se bhoñpū kā kaam le

bahre hue haiñ kaan mashīnoñ ke shor se

'tanwir' ab tu halq se bhonpu ka kaam le

bahre hue hain kan mashinon ke shor se