مسافروں سے محبت کی بات کر لیکن

مسافروں کی محبت کا اعتبار نہ کر

باہر باہر سناٹا ہے اندر اندر شور بہت

دل کی گھنی بستی میں یارو آن بسے ہیں چور بہت

چھپ کر نہ رہ سکے گا وہ ہم سے کہ اس کو ہم

پہچان لیں گے اس کی کسی اک ادا سے بھی

اٹھا یہ شور وہیں سے صداؤں کا کیوں کر

وہ آدمی تو سنا اپنے گھر میں تنہا تھا

چلے جو دھوپ میں منزل تھی ان کی

ہمیں تو کھا گیا سایہ شجر کا

برا سہی میں پہ نیت بری نہیں میری

مرے گناہ بھی کار ثواب میں لکھنا

اکثر ہوا ہے یہ کہ خود اپنی تلاش میں

آگے نکل گئے ہیں حد ماسوا سے بھی

اس اک دئیے سے ہوئے کس قدر دئیے روشن

وہ اک دیا جو کبھی بام و در میں تنہا تھا

طاری ہے ہر طرف جو یہ عالم سکوت کا

طوفاں کا پیش خیمہ سمجھ خامشی نہیں

وہ چپ لگی ہے کہ ہنستا ہے اور نہ روتا ہے

یہ ہو گیا ہے خدا جانے دل کو رات سے کیا

جو تیر آیا گلے مل کے دل سے لوٹ گیا

وہ اپنے فن میں میں اپنے ہنر میں تنہا تھا

وہی دیا کہ تھیں عاجز ہوائیں جن سے عمرؔ

کسی کے پھر نہ جلائے جلا بجھا ایسا