نہ میں سمجھا نہ آپ آئے کہیں سے

پسینہ پوچھیے اپنی جبیں سے

کچھ خبر ہوتی تو میں اپنی خبر کیوں رکھتا

یہ بھی اک بے خبری تھی کہ خبردار رہا

شرم بھی اک طرح کی چوری ہے

وہ بدن کو چرائے بیٹھے ہیں

مٹی خراب ہے ترے کوچے میں ورنہ ہم

اب تک تو جس زمیں پہ رہے آسماں رہے

صورت چھپائیے کسی صورت پرست سے

ہم دل میں نقش آپ کی تصویر کر چکے

نیند کا کام گرچہ آنا ہے

میری آنکھوں میں پر نہیں آتی

کس سوچ میں ہیں آئنہ کو آپ دیکھ کر

میری طرف تو دیکھیے سرکار کیا ہوا

ان سے ہم لو لگائے بیٹھے ہیں

آگ دل میں دبائے بیٹھے ہیں

وہ جو گردن جھکائے بیٹھے ہیں

حشر کیا کیا اٹھائے بیٹھے ہیں

پی بھی جا شیخ کہ ساقی کی عنایت ہے شراب

میں ترے بدلے قیامت میں گنہ گار رہا

تھک کے بیٹھے ہو در صومعہ پر کیا انورؔ

دو قدم اور کہ یہ خانہ خمار رہا

گویا کہ سب غلط ہیں مری بدگمانیاں

دیکھے تو کوئی شکل تمہاری حیا کے ساتھ

بے طرح پڑتی ہے نظر ان کی

خیر دل کی نظر نہیں آتی

مری نمود سے پیدا ہے رنگ ناکامی

پسا ہوا ہوں کسی کے حنا لگانے کا

حشر کو مانتا ہوں بے دیکھے

ہائے ہنگامہ اس کی محفل کا

میں گرفتار وفا ہوں چھٹ کے جاؤں گا کہاں

بال باندھا چور ہوں ہر تار زلف یار کا

کیسی حیا کہاں کی وفا پاس خلق کیا

ہاں یہ سہی کہ آپ کو آنا یہاں نہ تھا

ہر شے کو انتہا ہے یقیں ہے کہ وصل ہو

عرصہ بہت کھنچا ہے مری انتظار کا

اللہ رے فرط شوق اسیری کی شوق میں

پہروں اٹھا اٹھا کے سلاسل کو دیکھنا

کمر باندھی ہے توبہ توڑنے پر

الٰہی خیر عزم ناتواں کی

قامت ہی لکھا ہم نے سدا جائے قیامت

قامت نے بھلایا ترے املائے قیامت

ناکامیٔ وصال کا پیغام ہے مجھے

شیریں کا ذکر بھی نہ کرو کوہ کن کے ساتھ

انورؔ نے بدلے جان کے لی جنس درد دل

اور اس پہ ناز یہ کہ یہ سودا گراں نہ تھا

پھینکیے کیوں مئے ناقص ساقی

شیخ صاحب کی ضیافت ہی سہی

نظر آئے کیا مجھ سے فانی کی صورت

کہ پنہاں ہوں درد نہانی کی صورت

گرچہ کیا کچھ تھے مگر آپ کو کچھ بھی نہ گنا

عشق برہم زن کاشانۂ پندار رہا