کی تلاش کا نتیجه | موضو - نظم, صفحہ mustarad

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "mustarad"

نظم کے متعلقہ نتیجہ "mustarad"

نظم

میری پہلی محبت جو سچی بھی تھی
اور سچی بھی تھی
جب کسی نے اسے مسترد کر دیا
میرے سینے میں یک دم گھٹن بھر گئی
سانس رکنے لگی
میں نہیں رو سکا

شعیب کیانی

نظم

جب چارلیؔ کے پیروں میں
پھٹے ہوئے جوتے ہوا کرتے تھے
ایک عورت نے اس کی محبت
مسترد کر دی تھی

سید کاشف رضا

نظم

معذرت چاہتا ہوں دوست
میں اب انتظار نہیں کرتا
بلکہ خود چل پڑتا ہوں اپنی طرف
ایک پوشیدہ چاپ کے تعاقب میں
خود سے باہر نکلتا ہوں
اور اپنے ہی جیسے کسی ہجوم کا حصہ بن کر
اپنے وجود پر اکتفا کرتا ہوں
اپنی عمیق روشنی سے نیا جنم لیتے ہوئے
خود کی بنت میں بے جوڑ ہونے کی کاوش
رائیگاں نہیں جاتی
سنو!
سمے کے بھید بھاؤ میں اپنا تخمینہ لگاتے ہوئے
ذات کی جمع پونجی میں سے
میں تمہیں اپنی حسیات سے مسترد نہیں کرتا
بساط بھر صبر اور ایک مٹھی وصال کے عوض
میں تمہیں کشید کرتا ہوں اپنے اطراف سے
اور گنجائش پیدا کرتا ہوں تمہاری میزبانی کے لیے
کسی اور جہت سے اپنے آپ میں
لیکن معذرت
میں انتظار نہیں کر سکتا
اپنی رگوں میں بہتے ہوئے اس دکھ کے پگھلنے کا
جو اپنے بہاؤ میں میری توجہ بہا لے جا سکتا ہے
اپنے ساتھ
میں طے شدہ گزر گاہوں کا مسافر نہیں
مجھے تو ہر امکان سے گزر کر آنا ہے تمہاری سمت
اور ہاں۔۔۔
میں تو اپنا بھی انتظار نہیں کرتا ہوں اب!!!

انجم سلیمی

نظم

مجھے یقیں ہے
کہ تم کون مہندی سے
جب میرے عدو کا نام
اپنی خوب صورت کلائی پر لکھو گی
تو
میرا خیال آتے ہی
آخر ایک دن
اس منحوس کے نام پر
خود ہی
بڑا سا کانٹا لگا دو گی
اور دوسری کلائی پر
میرا نام لکھ کر
اسے دیر تک چومتی رہو گی
میں اس لمحے کے انتظار میں
متبادل کلائیوں کی جانب سے موصولہ
ہزاروں دل پذیر آفریں
مسلسل مسترد کئے جا رہا ہوں
کیونکہ
دنیا امید پر قائم ہے

عزیز فیصل

نظم

مرے پاس
موت کے بہت سے آپشنز ہیں
میں کسی بھی وقت کہیں بھی مارا جا سکتا ہوں
موبائل چھیننے والا نوجوان
مجھے ٹخنے پر گولی مار سکتا ہے
پولس کے ناکے پر نہ رکنے کی پاداش میں
مجھے تھانے کے اندر مارا جا سکتا ہے
رات کے پچھلے پہر
گھر میں گھسنے والا ڈاکو کالی جیب ہونے کے جرم میں
مجھے بندوق کے ہٹ مارک سے ہلاک کر سکتا ہے
جی پی فنڈ کے حصول کی خاطر
میں
اے جی آفس کی سیڑھیاں چڑھتے چڑھتے
دل کے دورے سے بھی مر سکتا ہوں
اور
کسی گنجان مارکیٹ یا مسجد میں ہونے والے دھماکے میں با آسانی
شہادت پا سکتا ہوں
اب تو
غربت کی لکیر سے لٹک کر
میرے بھوک سے مرنے کے امکانات بھی پیدا ہونے لگے ہیں
اگرچہ جنگ میں کام آنے کا زمانہ گزر چکا ہے
مگر بعض مقدس دشمن
میری موت کے عوض جنت کے طلب گار ہیں
میری سماجی موت سے اب کسی کو کوئی فائدہ نہیں
حتٰی کہ مجھے بھی نہیں
مگر پلاٹ مافیا کے علاوہ ذخیرہ‌ اندوز اور سٹے باز
میری موت کے منتظر ہیں
اور
انہوں نے مجھے بے توقیر کر کے
سڑک پر میری خود سوزی کا راستہ کشادہ کر دیا ہے
جمہوریت اور انسانی حقوق کی بازیافت کے لیے مرنا میرا خواب تھا
مگر
بچوں کی فیسیں ادا کرنے کے لیے اور ٹائم لگانے کے باعث
میرے پاس ایسی عیاشی کے لیے وقت نہیں
سو
میں بقائمی ہوش و حواس ایسے فرسودہ نظریات کو مسترد کرتا ہوں
رات دیر گئے
گھر لوٹتے ہوئے
راہ گیری موت مارے جانا میری ہرگز ترجیح نہیں
مگر اس میں حرج بھی کیا ہے
کہ اس کے عوض سرکاری خزانے سے پانچ لاکھ روپے ملتے ہیں
میں
زندہ رہنے کے امکانات سے تقریباً محروم کیا جا چکا ہوں
مگر نہ جانے کیوں
میں زندہ رہنا چاہتا ہوں

زاہد مسعود

نظم

کئی منظر بدلتے ہیں
کھلی آنکھوں کے شیشے پر سلگتی خاک کا چہرہ
چراغوں کا دھواں،
کھڑکی،
کوئی روزن۔۔۔
ہوا کے نام کرنے کو ہمارے پاس کیا باقی، بچا ہے؟
لہو کے پر لگی سڑکیں
کٹے سر پر برستی جوتیوں کے شور میں جاگا ہوا
بے خانماں نام و نسب،
ماتم کناں گریہ کناں آنکھیں،
شکستہ رو سحر کی سسکیاں۔۔۔
جیسے
مسیحاؤں کے اجلے پیرہن پر زخم بھرنے کی
روایت نقش ہوتی ہے
ہمارے پاس کیا باقی بچا ہے؟
طلسم آور شعوری قہقہے
کرنیں!
در مہتاب سے نکلی ہوئی کچھ مسترد کرنیں
ردائیں!
جن کے کونوں سے بندھے سکے
مرا تاوان ٹھہرے ہیں
لہو تاوان میں دے کر
میں خالی ہاتھ آیا ہوں
مرے لوگو!
بھنور کی راہ سے بچ کر میں خالی ہاتھ آیا ہوں
مجھے کس نے بلایا تھا!
کسی امید سے منسوب رستے نے
جہاں شاخ ثمر اب تک شجر کی کوکھ سے باہر نہیں نکلی
جہاں
جیون کی لمبی آستیں سانس لیتا ہے
مری آہوں کا سناٹا!!

زاہد مسعود

نظم

جو بنا دے حضرت آدم کو مردہ خاک سے
کر دے جو آراستہ بے جاں کو روح پاک سے
نوح کی کشتی کو طوفانوں سے بھی جو لے بچا
بحر میں جو حضرت موسیٰ کو دے دے راستہ
ہو کنویں کی تہہ سے تخت و تاج تک یوسف کے ساتھ
پیٹ میں مچھلی کے یونس کو رکھے جو با حیات
نرم جو لوہے کو کر دے ہاتھ میں داؤد کے
ابن مریم کو بچا لے جو صلیب و دار سے
مسترد کر دے جو اہل حق پہ ہر یلغار کو
نور کر دے جسم ابراہیمؔ پر جو نار کو
جو سکھا دے ماننا فرمان ہر مخلوق کو
جو سلیماں پر کرے آسان ہر مخلوق کو
ظالموں کو روک دے جو پل میں ان کی ٹوہ سے
ناقۂ صالح کرے پیدا جو بطن کوہ سے
امن کا سنوا دے جو مژدہ رسول اللہ سے
جو چمن صحرا کو دے بنوا رسول اللہ سے
وقت جو مغرب کا ٹھہرا دے رسول اللہ سے
چاند دو ٹکڑے جو کروا دے رسول اللہ سے
جس خدائے پاک کی قدرت کے ہوں یہ سب نشاں
حمد جس کی کر رہی ہوں مچھلیاں اور چیونٹیاں
جس کی عظمت کی گواہی روز دیں شام و سحر
کر رہے ہوں چاند سورج حکم سے جس کے سفر
ہر زباں آور جہاں تھک جائے جس کے ذکر سے
جس کی سطوت کا بیاں باہر ہو سب کی فکر سے
مشورہ تم سب کو اتنا دے کے اب میں بھی یہاں
ختم کرنا چاہتا ہوں خود پہ ہی اپنا بیاں
وسوسوں کے تم مرض میں مبتلا ہونا نہیں
اس خدا سے کچھ بھی ہو بے آسرا ہونا نہیں

مصداق اعظمی

نظم

ہمارے شہر کی آبادی کے درمیان
کسی بھی سمجھوتے کے امکان کو مسترد کرتے ہوے
شہر کے شمال مغرب میں
دور تک پھیلی ہوئی پہاڑی میں ایک شگاف ڈال دیا گیا ہے
پہاڑی کو کاٹنے کا یہ اچھوتا خیال
شہر کے کچھ معماروں کے ذہن میں کیا آیا
شہر کے مکانوں کے در و دیوار
اس نئی تفریق کے شور و شر سے
تپ کر سرخ ہو گئے
اور شہر کے اوپر منڈلانے لگے
قسمت آزماؤں کے عزائم
شہر کو اب نئے زاویوں سے دیکھا جانے لگا
اب اس پہاڑی میں
کئی ایک ایسے مقامات دکھائی دینے لگے ہیں
جہاں سے اسے مزید کاٹا
یا کمزور کیا جا سکتا ہے
پہاڑی کے کٹتے ہی
اس پاس کی آبادیوں نے اپنی حدود کو
نئے سرے سے ترتیب دے لیا ہے
کٹاؤ سے شہر میں ہوا کا دباؤ
غیر مستحکم ہو گیا ہے
گاڑیوں کے روٹ بدلنے لگے
جمی جمائی آبادی
متزلزل ہو گئی
بازاروں اور خریداروں کے رنگ روپ
اور چہرے مہرے تبدیل ہو گئے ہیں
لوگ شاہراہوں
مکانوں
پارکوں
اسکولوں اور عبادت گاہوں کو
یوں دیکھنے لگے
جیسے ان کے بیچ بھی انہیں
شگاف دکھائی دینے لگے ہوں
کٹی ہوئی پہاڑی نے
ہم سب کے چہروں کے بیچ
ایک مستقل دراڑ ڈال دی ہے
ان معماروں سے زیادہ
جنہوں نے پہاڑی میں شگاف ڈالا
ہم ہر اس شے سے خوف زدہ ہیں
جس میں بظاہر کوئی شگاف یا دراڑ دکھائی نہیں دیتی
پر جس کے درمیان سے
مستقل جھانک رہی ہے
کٹی ہوئی پہاڑی

سعید الدین

نظم

اے زندگی مجھے یک لخت مسترد تو نہ کر
فقط مرے لیے تفریق نیک و بد تو نہ کر
میں تیرے ساتھ چلا ہوں اب اتنی حد تو نہ کر
مجھے پچھاڑنے میں اتنی شد و مد تو نہ کر

عبدالرحمان واصف

نظم

نہ جانے عاربہ کیوں آئے کیوں مستعربہ آئے
مضر کے لوگ تو چھانے ہی والے تھے سو وہ چھائے
مرے جد ہاشم عالی گئے غزہ میں دفنائے
میں ناقے کو پلاؤں گا مجھے واں تک وہ لے جائے
لدوا للموت وابنو للحزاب سن خراباتی
وہ مرد عوص کہتا ہے حقیقت ہے خرافاتی
یہ ظالم تیسرا پیگ اک اقانیمی بدایت ہے
الوہی ہرزہ فرمائی کا سر طور لکنت ہے
بھلا حورب کی جھاڑی کا وہ رمز آتشیں کیا تھا
مگر حورب کی جھاڑی کیا یہ کس سے کس کی نسبت ہے
یہ نسبت کے بہت سے قافیے ہیں ہے گلہ اس کا
مگر تجھ کو تو یارا! قافیوں کی بے طرح لت ہے
گماں یہ ہے کہ شاید بحر سے خارج نہیں ہوں میں
ذرا بھی حال کے آہنگ میں حارج نہیں ہوں
تنا تن تن تنا تن تن تنا تن تن تنا تن تن
تنا تن تن نہیں محنت کشوں کا تن نہ پیراہن
نہ پیراہن نہ پوری آدھی روٹی اب رہا سالن
یہ سالے کچھ بھی کھانے کو نہ پائیں گالیاں کھائیں
ہے ان کی بے حسی میں تو مقدس تر حرامی پن

جون ایلیا

نظم

سلسلۂ روز و شب نقش گر حادثات
سلسلۂ روز و شب اصل حیات و ممات
سلسلۂ روز و شب تار حریر دو رنگ
جس سے بناتی ہے ذات اپنی قبائے صفات
سلسلۂ روز و شب ساز ازل کی فغاں
جس سے دکھاتی ہے ذات زیر و بم ممکنات
تجھ کو پرکھتا ہے یہ مجھ کو پرکھتا ہے یہ
سلسلۂ روز و شب صیرفی کائنات
تو ہو اگر کم عیار میں ہوں اگر کم عیار
موت ہے تیری برات موت ہے میری برات
تیرے شب و روز کی اور حقیقت ہے کیا
ایک زمانے کی رو جس میں نہ دن ہے نہ رات
آنی و فانی تمام معجزہ ہائے ہنر
کار جہاں بے ثبات کار جہاں بے ثبات
اول و آخر فنا باطن و ظاہر فنا
نقش کہن ہو کہ نو منزل آخر فنا
ہے مگر اس نقش میں رنگ ثبات دوام
جس کو کیا ہو کسی مرد خدا نے تمام
مرد خدا کا عمل عشق سے صاحب فروغ
عشق ہے اصل حیات موت ہے اس پر حرام
تند و سبک سیر ہے گرچہ زمانے کی رو
عشق خود اک سیل ہے سیل کو لیتا ہے تھام
عشق کی تقویم میں عصر رواں کے سوا
اور زمانے بھی ہیں جن کا نہیں کوئی نام
عشق دم جبرئیل عشق دل مصطفی
عشق خدا کا رسول عشق خدا کا کلام
عشق کی مستی سے ہے پیکر گل تابناک
عشق ہے صہبائے خام عشق ہے کاس الکرام
عشق فقیہہ حرام عشق امیر جنود
عشق ہے ابن السبیل اس کے ہزاروں مقام
عشق کے مضراب سے نغمۂ تار حیات
عشق سے نور حیات عشق سے نار حیات
اے حرم قرطبہ عشق سے تیرا وجود
عشق سراپا دوام جس میں نہیں رفت و بود
رنگ ہو یا خشت و سنگ چنگ ہو یا حرف و صوت
معجزۂ فن کی ہے خون جگر سے نمود
قطرۂ خون جگر سل کو بناتا ہے دل
خون جگر سے صدا سوز و سرور و سرود
تیری فضا دل فروز میری نوا سینہ سوز
تجھ سے دلوں کا حضور مجھ سے دلوں کی کشود
عرش معلی سے کم سینۂ آدم نہیں
گرچہ کف خاک کی حد ہے سپہر کبود
پیکر نوری کو ہے سجدہ میسر تو کیا
اس کو میسر نہیں سوز و گداز سجود
کافر ہندی ہوں میں دیکھ مرا ذوق و شوق
دل میں صلوٰۃ و درود لب پہ صلوٰۃ و درود
شوق مری لے میں ہے شوق مری نے میں ہے
نغمۂ اللہ ہو میرے رگ و پے میں ہے
تیرا جلال و جمال مرد خدا کی دلیل
وہ بھی جلیل و جمیل تو بھی جلیل و جمیل
تیری بنا پائیدار تیرے ستوں بے شمار
شام کے صحرا میں ہو جیسے ہجوم نخیل
تیرے در و بام پر وادی ایمن کا نور
تیرا منار بلند جلوہ گہ جبرئیل
مٹ نہیں سکتا کبھی مرد مسلماں کہ ہے
اس کی اذانوں سے فاش سر کلیم و خلیل
اس کی زمیں بے حدود اس کا افق بے ثغور
اس کے سمندر کی موج دجلہ و دنیوب و نیل
اس کے زمانے عجیب اس کے فسانے غریب
عہد کہن کو دیا اس نے پیام رحیل
ساقی ارباب ذوق فارس میدان شوق
بادہ ہے اس کا رحیق تیغ ہے اس کی اصیل
مرد سپاہی ہے وہ اس کی زرہ لا الہ
سایۂ شمشیر میں اس کی پنہ لا الہ
تجھ سے ہوا آشکار بندۂ مومن کا راز
اس کے دنوں کی تپش اس کی شبوں کا گداز
اس کا مقام بلند اس کا خیال عظیم
اس کا سرور اس کا شوق اس کا نیاز اس کا ناز
ہاتھ ہے اللہ کا بندۂ مومن کا ہاتھ
غالب و کار آفریں کار کشا کارساز
خاکی و نوری نہاد بندۂ مولا صفات
ہر دو جہاں سے غنی اس کا دل بے نیاز
اس کی امیدیں قلیل اس کے مقاصد جلیل
اس کی ادا دل فریب اس کی نگہ دل نواز
آج بھی اس دیس میں عام ہے چشم غزال
اور نگاہوں کے تیر آج بھی ہیں دل نشیں
بوئے یمن آج بھی اس کی ہواؤں میں ہے
رنگ حجاز آج بھی اس کی نواؤں میں ہے
دیدۂ انجم میں ہے تیری زمیں آسماں
آہ کہ صدیوں سے ہے تیری فضا بے اذاں
کون سی وادی میں ہے کون سی منزل میں ہے
عشق بلا خیز کا قافلۂ سخت جاں
دیکھ چکا المنی شورش اصلاح دیں
جس نے نہ چھوڑے کہیں نقش کہن کے نشاں
حرف غلط بن گئی عصمت پیر کنشت
اور ہوئی فکر کی کشتئ نازک رواں
چشم فرانسیس بھی دیکھ چکی انقلاب
جس سے دگر گوں ہوا مغربیوں کا جہاں
ملت رومی نژاد کہنہ پرستی سے پیر
لذت تجدیدہ سے وہ بھی ہوئی پھر جواں
روح مسلماں میں ہے آج وہی اضطراب
راز خدائی ہے یہ کہہ نہیں سکتی زباں
نرم دم گفتگو گرم دم جستجو
رزم ہو یا بزم ہو پاک دل و پاک باز
نقطۂ پرکار حق مرد خدا کا یقیں
اور یہ عالم تمام وہم و طلسم و مجاز
عقل کی منزل ہے وہ عشق کا حاصل ہے وہ
حلقۂ آفاق میں گرمئ محفل ہے وہ
کعبۂ ارباب فن سطوت دین مبیں
تجھ سے حرم مرتبت اندلسیوں کی زمیں
ہے تہ گردوں اگر حسن میں تیری نظیر
قلب مسلماں میں ہے اور نہیں ہے کہیں
آہ وہ مردان حق وہ عربی شہسوار
حامل خلق عظیم صاحب صدق و یقیں
جن کی حکومت سے ہے فاش یہ رمز غریب
سلطنت اہل دل فقر ہے شاہی نہیں
جن کی نگاہوں نے کی تربیت شرق و غرب
ظلمت یورپ میں تھی جن کی خرد راہ بیں
جن کے لہو کے طفیل آج بھی ہیں اندلسی
خوش دل و گرم اختلاط سادہ و روشن جبیں
دیکھیے اس بحر کی تہہ سے اچھلتا ہے کیا
گنبد نیلوفری رنگ بدلتا ہے کیا
وادی کہسار میں غرق شفق ہے سحاب
لعل بدخشاں کے ڈھیر چھوڑ گیا آفتاب
سادہ و پرسوز ہے دختر دہقاں کا گیت
کشتئ دل کے لیے سیل ہے عہد شباب
آب روان کبیر تیرے کنارے کوئی
دیکھ رہا ہے کسی اور زمانے کا خواب
عالم نو ہے ابھی پردۂ تقدیر میں
میری نگاہوں میں ہے اس کی سحر بے حجاب
پردہ اٹھا دوں اگر چہرۂ افکار سے
لا نہ سکے گا فرنگ میری نواؤں کی تاب
جس میں نہ ہو انقلاب موت ہے وہ زندگی
روح امم کی حیات کشمکش انقلاب
صورت شمشیر ہے دست قضا میں وہ قوم
کرتی ہے جو ہر زماں اپنے عمل کا حساب
نقش ہیں سب ناتمام خون جگر کے بغیر
نغمہ ہے سودائے خام خون جگر کے بغیر

علامہ اقبال

نظم

شاعر
ساحل دریا پہ میں اک رات تھا محو نظر
گوشۂ دل میں چھپائے اک جہان اضطراب
شب سکوت افزا ہوا آسودہ دریا نرم سیر
تھی نظر حیراں کہ یہ دریا ہے یا تصوير آب
جیسے گہوارے میں سو جاتا ہے طفل شیر خوار
موج مضطر تھی کہیں گہرائیوں میں مست خواب
رات کے افسوں سے طائر آشیانوں میں اسیر
انجم کم ضو گرفتار طلسم ماہتاب
دیکھتا کیا ہوں کہ وہ پيک جہاں پيما خضر
جس کی پیری میں ہے مانند سحر رنگ شباب
کہہ رہا ہے مجھ سے اے جويائے‌‌ اسرار ازل
چشم دل وا ہو تو ہے تقدیر عالم بے حجاب
دل میں یہ سن کر بپا ہنگامۂ محشر ہوا
میں شہید جستجو تھا یوں سخن گستر ہوا
اے تری چشم جہاں بیں پر وہ طوفاں آشکار
جن کے ہنگامے ابھی دریا میں سوتے ہیں خموش
کشتئ مسکين و جان پاک و ديوار يتيم
علم‌ موسیٰ بھی ہے ترے سامنے حیرت فروش
چھوڑ کر آبادیاں رہتا ہے تو صحرا نورد
زندگی تیری ہے بے روز و شب و فردا و دوش
زندگی کا راز کیا ہے سلطنت کیا چیز ہے
اور یہ سرمایہ و محنت میں ہے کیسا خروش
ہو رہا ہے ایشیا کا خرقۂ دیرینہ چاک
نوجواں اقوام‌ نو دولت کے ہیں پيرايہ پوش
گرچہ اسکندر رہا محروم آب زندگی
فطرت‌ اسکندری اب تک ہے گرم ناؤ نوش
بیچتا ہے ہاشمی ناموس دين مصطفیٰ
خاک و خوں میں مل رہا ہے ترکمان سخت کوش
آگ ہے اولاد ابراہیم ہے نمرود ہے
کیا کسی کو پھر کسی کا امتحاں مقصود ہے
جواب‌ خضر
صحرا نوردی

علامہ اقبال

نظم

قلب و نظر کی زندگی دشت میں صبح کا سماں
چشمۂ آفتاب سے نور کی ندیاں رواں!
حسن ازل کی ہے نمود چاک ہے پردۂ وجود
دل کے لیے ہزار سود ایک نگاہ کا زیاں!
سرخ و کبود بدلیاں چھوڑ گیا سحاب شب!
کوہ اضم کو دے گیا رنگ برنگ طیلساں!
گرد سے پاک ہے ہوا برگ نخیل دھل گئے
ریگ نواح کاظمہ نرم ہے مثل پرنیاں
آگ بجھی ہوئی ادھر، ٹوٹی ہوئی طناب ادھر
کیا خبر اس مقام سے گزرے ہیں کتنے کارواں
آئی صدائے جبرئیل تیرا مقام ہے یہی
اہل فراق کے لیے عیش دوام ہے یہی
کس سے کہوں کہ زہر ہے میرے لیے مئے حیات
کہنہ ہے بزم کائنات تازہ ہیں میرے واردات!
کیا نہیں اور غزنوی کارگہ حیات میں
بیٹھے ہیں کب سے منتظر اہل حرم کے سومنات!
ذکر عرب کے سوز میں، فکر عجم کے ساز میں
نے عربی مشاہدات، نے عجمی تخیلات
قافلۂ حجاز میں ایک حسین بھی نہیں
گرچہ ہے تاب دار ابھی گیسوئے دجلہ و فرات!
عقل و دل و نگاہ کا مرشد اولیں ہے عشق
عشق نہ ہو تو شرع و دیں بتکدۂ تصورات!
صدق خلیل بھی ہے عشق صبر حسین بھی ہے عشق!
معرکۂ وجود میں بدر و حنین بھی ہے عشق!
آیۂ کائنات کا معنئ دیر یاب تو!
نکلے تری تلاش میں قافلہ ہائے رنگ و بو!
جلوتیان مدرسہ کور نگاہ و مردہ ذوق
جلوتیان میکدہ کم طلب و تہی کدو!
میں کہ مری غزل میں ہے آتش رفتہ کا سراغ
میری تمام سرگزشت کھوئے ہوؤں کی جستجو!
باد صبا کی موج سے نشو و نمائے خار و خس!
میرے نفس کی موج سے نشو و نمائے آرزو!
خون دل و جگر سے ہے میری نوا کی پرورش
ہے رگ ساز میں رواں صاحب ساز کا لہو!
فرصت کشمکش میں ایں دل بے قرار را
یک دو شکن زیادہ کن گیسوئے تابدار را
لوح بھی تو، قلم بھی تو، تیرا وجود الکتاب!
گنبد آبگینہ رنگ تیرے محیط میں حباب!
عالم آب و خاک میں تیرے ظہور سے فروغ
ذرۂ ریگ کو دیا تو نے طلوع آفتاب!
شوکت سنجر و سلیم تیرے جلال کی نمود!
فقر جنیدؔ و بایزیدؔ تیرا جمال بے نقاب!
شوق ترا اگر نہ ہو میری نماز کا امام
میرا قیام بھی حجاب !میرا سجود بھی حجاب!
تیری نگاہ ناز سے دونوں مراد پا گئے
عقل، غیاب و جستجو! عشق، حضور و اضطراب!
تیرہ و تار ہے جہاں گردش آفتاب سے!
طبع زمانہ تازہ کر جلوۂ بے حجاب سے!
تیری نظر میں ہیں تمام میرے گزشتہ روز و شب
مجھ کو خبر نہ تھی کہ ہے علم تخیل بے رطب!
تازہ مرے ضمیر میں معرکۂ کہن ہوا!
عشق تمام مصطفی! عقل تمام بو لہب!
گاہ بحیلہ می برد، گاہ بزور می کشد
عشق کی ابتدا عجب عشق کی انتہا عجب!
عالم سوز و ساز میں وصل سے بڑھ کے ہے فراق
وصل میں مرگ آرزو! ہجر میں لذت طلب!
عین وصال میں مجھے حوصلۂ نظر نہ تھا
گرچہ بہانہ جو رہی میری نگاہ بے ادب!
گرمئ آرزو فراق! شورش ہائے و ہو فراق!
موج کی جستجو فراق! قطرہ کی آبرو فراق!

علامہ اقبال

نظم

آخری بار ملو ایسے کہ جلتے ہوئے دل
راکھ ہو جائیں کوئی اور تقاضہ نہ کریں
چاک وعدہ نہ سلے زخم تمنا نہ کھلے
سانس ہموار رہے شمع کی لو تک نہ ہلے
باتیں بس اتنی کہ لمحے انہیں آ کر گن جائیں
آنکھ اٹھائے کوئی امید تو آنکھیں چھن جائیں

مصطفی زیدی

نظم

یہ شاخسار کے جھولوں میں پینگ پڑتے ہوئے
یہ لاکھوں پتیوں کا ناچنا یہ رقص نبات
یہ بے خودئ مسرت یہ والہانہ رقص
یہ تال سم یہ چھما چھم کہ کان بجتے ہیں
ہوا کے دوش پہ کچھ اودی اودی شکلوں کی
نشے میں چور سی پرچھائیاں تھرکتی ہوئی
افق پہ ڈوبتے دن کی جھپکتی ہیں آنکھیں
خموش سوز دروں سے سلگ رہی ہے یہ شام!
مرے مکان کے آگے ہے ایک چوڑا صحن وسیع
کبھی وہ ہنستا نظر آتا ہے کبھی وہ اداس
اسی کے بیچ میں ہے ایک پیڑ پیپل کا
سنا ہے میں نے بزرگوں سے یہ کہ عمر اس کی
جو کچھ نہ ہوگی تو ہوگی قریب چھیانوے سال
چھڑی تھی ہند میں جب پہلی جنگ آزادی
جسے دبانے کے بعد اس کو غدر کہنے لگے
یہ اہل ہند بھی ہوتے ہیں کس قدر معصوم
وہ دار و گیر وہ آزادیٔ وطن کی جنگ
وطن سے تھی کہ غنیم وطن سے غداری
بپھر گئے تھے ہمارے وطن کے پیر و جواں
دیار ہند میں رن پڑ گیا تھا چار طرف
اسی زمانے میں کہتے ہیں میرے دادا نے
جب ارض ہند سنچی خون سے ''سپوتوں'' کے
میان صحن لگایا تھا لا کے اک پودا
جو آب و آتش و خاک و ہوا سے پلتا ہوا
خود اپنے قد سے بہ جوش نمو نکلتا ہوا
فسون روح بناتی رگوں میں چلتا ہوا
نگاہ شوق کے سانچوں میں روز ڈھلتا ہوا
سنا ہے راویوں سے دیدنی تھی اس کی اٹھان
ہر اک کے دیکھتے ہی دیکھتے چڑھا پروان
وہی ہے آج یہ چھتنار پیڑ پیپل کا
وہ ٹہنیوں کے کمنڈل لئے جٹادھاری
زمانہ دیکھے ہوئے ہے یہ پیڑ بچپن سے
رہی ہے اس کے لئے داخلی کشش مجھ میں
رہا ہوں دیکھتا چپ چاپ دیر تک اس کو
میں کھو گیا ہوں کئی بار اس نظارے میں
وہ اس کی گہری جڑیں تھیں کہ زندگی کی جڑیں؟
پس سکون شجر کوئی دل دھڑکتا تھا
میں دیکھتا تھا اسے ہستیٔ بشر کی طرح
کبھی اداس کبھی شادماں کبھی گمبھیر
فضا کا سرمئی رنگ اور ہو چلا گہرا
گھلا گھلا سا فلک ہے دھواں دھواں سی ہے شام
ہے جھٹپٹا کہ کوئی اژدہا ہے مائل خواب
سکوت شام میں درماندگی کا عالم ہے
رکی رکی سی کسی سوچ میں ہے موج صبا

فراق گورکھپوری

نظم

میں بھی ناکام وفا تھا تو بھی محروم مراد
ہم یہ سمجھے تھے کہ درد مشترک راس آ گیا
تیری کھوئی مسکراہٹ قہقہوں میں ڈھل گئی
میرا گم گشتہ سکوں پھر سے مرے پاس آ گیا

احمد فراز

نظم

میز چپ چاپ گھڑی بند کتابیں خاموش
اپنے کمرے کی اداسی پہ ترس آتا ہے
میرا کمرہ جو مرے دل کی ہر اک دھڑکن کو
سالہا سال سے چپ چاپ گنے جاتا ہے
جہد ہستی کی کڑی دھوپ میں تھک جانے پر
جس کی آغوش نے بخشا ہے مجھے ماں کا خلوص
جس کی خاموش عنایت کی سہانی یادیں
لوریاں بن کے مرے دل میں سما جاتی ہیں
میری تنہائی کے احساس کو زائل کرنے
جس کی دیواریں مرے پاس چلی آتی ہیں

مصطفی زیدی

نظم

کیا عشق ایک زندگئ مستعار کا
کیا عشق پائیدار سے ناپائیدار کا

علامہ اقبال

نظم

کيا عشق ايک زندگي مستعار کا
کيا عشق پائدار سے ناپائدار کا

علامہ اقبال

نظم

یہ کہہ رہی ہے اشاروں میں گردش گردوں
کہ جلد ہم کوئی سخت انقلاب دیکھیں گے
نظام چرخ میں دیکھیں گے اک تغیر خاص
سکون دہر میں اک اضطراب دیکھیں گے
خدا نے چاہا تو اب جلد ہی وطن والے
وطن میں اپنا مشن کامیاب دیکھیں گے
دعائیں کی ہیں جو اہل وطن نے رو رو کر
یقیں ہے جلد انہیں مستجاب دیکھیں گے
زمانہ آنے ہی والا ہے جب ہم اے ظالم
تجھے بھی خوار تجھے بھی خراب دیکھیں گے
بہت ہی جلد ترے سر پہ بھی خدا کی قسم
خدا کا قہر خدا کا عتاب دیکھیں گے
تجھے بھی دیکھیں گے مجبور فاقہ و افلاس
تجھے بھی قید غم و اضطراب دیکھیں گے
تجھے بھی اپنی طرح جلد ہی بفضل خدا
اسیر سلسلۂ پیچ و تاب دیکھیں گے
تجھے بھی اپنی طرح پائے بند نالہ و آہ
یوں ہی مجال تباہ و خراب دیکھیں گے
رواں دواں تجھے ہندوستاں سے سوئے عدم
بہ قلب زار و بہ چشم پر آب دیکھیں گے
یہ دیکھنا ہے جو کچھ ہم کو اس میں دیر نہیں
بہت ہی جلد بہت ہی شتاب دیکھیں گے

احمق پھپھوندوی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے