کی تلاش کا نتیجه | موضو - نظم, صفحہ taktaa

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "taktaa"

نظم کے متعلقہ نتیجہ "taktaa"

نظم

چشم نم جان شوریدہ کافی نہیں
تہمت عشق پوشیدہ کافی نہیں
آج بازار میں پا بہ جولاں چلو
دست افشاں چلو مست و رقصاں چلو
خاک بر سر چلو خوں بداماں چلو
راہ تکتا ہے سب شہر جاناں چلو
حاکم شہر بھی مجمع عام بھی
تیر الزام بھی سنگ دشنام بھی
صبح ناشاد بھی روز ناکام بھی
ان کا دم ساز اپنے سوا کون ہے
شہر جاناں میں اب با صفا کون ہے
دست قاتل کے شایاں رہا کون ہے

فیض احمد فیض

نظم

اب وہ خواب میں دلہن بن کر
میرے پاس چلی آتی ہے
میں اس کو تکتا رہتا ہوں
لیکن وہ روتی جاتی ہے

منیر نیازی

نظم

یہ سوچ سوچ کے آنکھیں مری بھر آتی تھیں
تو جا کے سونے بچھونے پہ لیٹ رہتا تھا
کسی سے گھر میں نہ راز اپنے دل کے کہتا تھا
یتیم تھی مری دنیا، یتیم میری حیات
یتیم شام و سحر تھی، یتیم تھے شب و روز
یتیم میری پڑھائی تھی میرے کھیل یتیم
یتیم میری مسرت تھی میرا غم بھی یتیم
یتیم آنسوؤں سے تکیہ بھیگ جاتا تھا
کسی سے گھر میں نہ کہتا تھا اپنے دل کا بھید
ہر اک سے دور اکیلا اداس رہتا تھا
کسی شمائل نادیدہ کو میں تکتا تھا
میں ایک وحشت بے نام سے ہڑکتا تھا

فراق گورکھپوری

نظم

وہ چائے کی پیالی پہ یاروں کے جلسے
وہ سردی کی راتیں وہ زلفوں کے قصے
کبھی تذکرے حسن شعلہ رخاں کے
محبت ہوئی تھی کسی کو کسی سے
ہر اک دل وہاں تھا نظر کا نشانہ
بہت یاد آتا ہے گزرا زمانہ
بہت اپنا انداز تھا لاابالی
کبھی تھے جلالی کبھی تھے جمالی
کبھی بات میں بات یوں ہی نکالی
سر راہ کوئی قیامت اٹھا لی
کسی کو لڑانا کسی کو بچانا
بہت یاد آتا ہے گزرا زمانہ
کبھی سچی باتوں کو جھوٹا بتایا
کبھی جھوٹی باتوں کو سچ کر دکھایا
کبھی راز دل کہہ کے اس کو چھپایا
کبھی دوستوں میں یوں ہی کچھ اڑایا
بتا کر چھپانا چھپا کر بتانا
بہت یاد آتا ہے گزرا زمانہ
کبھی بزم احباب میں شعلہ افشاں
کبھی یونین میں تھے شمشیر براں
کبھی بزم واعظ میں تھے پا بہ جولاں
بدلتے تھے ہر روز تقدیر دوراں
جہاں جیسی ڈفلی وہاں ویسا گانا
بہت یاد آتا ہے گزرا زمانہ
زمانہ تھا وہ ایک حیوانیت کا
وہ دور ملامت تھا شیطانیت کا
ہمیں درد تھا ایک انسانیت کا
اٹھائے علم ہم تھے حقانیت کا
بڑھے جا رہے تھے مگر باغیانہ
بہت یاد آتا ہے گزرا زمانہ
مقابل میں آئے جسارت تھی کس کو
کوئی روک دے بڑھ کے ہمت تھی کس کو
پکارے کوئی ہم کو طاقت تھی کس کو
کہ ہر بوالہوس کو تھے ہم تازیانہ
بہت یاد آتا ہے گزرا زمانہ
خیالات پر شوق کا سلسلہ تھا
بدل دیں زمانے کو وہ حوصلہ تھا
ہر اک دل میں پیدا نیا ولولہ تھا
ہر اک گام احباب کا قافلہ تھا
ادھر دعویٰ کرنا ادھر کر دکھانا
بہت یاد آتا ہے گزرا زمانہ
وہ شہہ راہ میرس کے پر پیچ چکر
وہ شمشاد بلڈنگ پہ اک شور محشر
وہ مبہم سی باتیں وہ پوشیدہ نشتر
وہ بے فکر دنیا وہ لفظوں کے دفتر
کہ جن کا سرا تھا نہ کوئی ٹھکانہ
بہت یاد آتا ہے گزرا زمانہ
کسی کو ہوئی تھی کسی سے محبت
کوئی کر رہا تھا کسی کی شکایت
غرض روز ڈھاتی تھی تازہ قیامت
کسی کی شباہت کسی کی ملامت
کسی کی تسلی کسی کا ستانا
بہت یاد آتا ہے گزرا زمانہ
کوئی غم زدہ تھا کوئی ہنس رہا تھا
کوئی حسن ناہید پر مر مٹا تھا
کوئی چشم نرگس کا بیمار سا تھا
کوئی بس یوں ہی تاکتا جھانکتا تھا
کبھی چوٹ کھانا کبھی مسکرانا
بہت یاد آتا ہے گزرا زمانہ
وہ ہر جنوری میں نمائش کے چرچے
وہ پر شوق آنکھیں وہ حیران جلوے
وہ چکر پہ چکر تھے بارہ دری کے
وہ حسرت کہ سو بار مل کر بھی ملتے
ہزاروں بہانوں کا وہ اک بہانا
بہت یاد آتا ہے گزرا زمانہ
وہ رخ آفتابی پہ ابرو ہلالی
وہ تمثال سیمیں وہ حسن مثالی
شگوفوں میں کھیلی گلابوں میں پالی
وہ خود اک ادا تھی ادا بھی نرالی
نگاہیں بچا کر نگاہیں ملا کر
بہت یاد آتا ہے گزرا زمانہ
وہ ہرچند مجھ کو نہیں جانتی تھی
مگر میری نظروں کو پہچانتی تھی
اگرچہ مرے دل میں وہ بس گئی تھی
مگر بات بس دل کی دل میں رہی تھی
مگر آج احباب سے کیا چھپانا
بہت یاد آتا ہے گزرا زمانہ
وہ اک شام برسات کی دن ڈھلا تھا
ابھی رات آئی نہ تھی جھٹپٹا تھا
وہ باد بہاری سے اک گل کھلا تھا
دھڑکتے ہوئے دل سے اک دل ملا تھا
نظر سن رہی تھی نظر کا فسانہ
بہت یاد آتا ہے گزرا زمانہ
جوانی اداؤں میں بل کھا رہی تھی
کہانی نگاہوں میں لہرا رہی تھی
محبت محبت کو سمجھا رہی تھی
وہ چشم تمنا جھکی جا رہی تھی
قیامت سے پہلے قیامت وہ ڈھانا
بہت یاد آتا ہے گزرا زمانہ
ہمیں بیتی باتیں جو یاد آ رہی تھیں
وہ مخمور نظریں جو شرما رہی تھیں
بہت عقل سادہ کو بہکا رہی تھیں
بڑی بے نیازی سے فرما رہی تھیں
انہیں یاد رکھنا ہمیں بھول جانا
بہت یاد آتا ہے گزرا زمانہ
اب وہ امنگیں نہ دل میں مرادیں
اب رہ گئیں چند ماضی کی یادیں
یہ جی چاہتا ہے انہیں بھی بھلا دیں
غم زندگی کو کہاں تک دعا دیں
حقیقت بھی اب بن گئی ہے فسانہ
بہت یاد آتا ہے گزرا زمانہ
علی گڑھ ہے بڑھ کر ہمیں کل جہاں سے
ہمیں عشق ہے اپنی اردو زباں سے
ہمیں پیار ہے اپنے نام و نشاں سے
یہاں آ گئے ہم نہ جانے کہاں سے
قسم دے کے ہم کو کسی کا بلانا
بہت یاد آتا ہے گزرا زمانہ
محبت سے یکسر ہے انجان دنیا
یہ ویران بستی پریشان دنیا
کمال خرد سے یہ حیران دنیا
خود اپنے کیے پر پشیمان دنیا
کہاں لے کے آیا ہمیں آب و دانہ
بہت یاد آتا ہے گزرا زمانہ

عابد اللہ غٓازی

نظم

میں دور کہیں تم سے بیٹھا اک دیپ کی جانب تکتا ہوں
اک بزم سجائے رکھی ہے اک درد جگائے رکھتا ہوں

وسیم بریلوی

نظم

دوپہر کی گرمی میں
بے ارادہ قدموں سے
اک سڑک پہ چلتا ہوں
تنگ سی سڑک پر ہیں
دونوں سمت دوکانیں
خالی خالی آنکھوں سے
ہر دکان کا تختہ
صرف دیکھ سکتا ہوں
اب پڑھا نہیں جاتا
لوگ آتے جاتے ہیں
پاس سے گزرتے ہیں
پھر بھی کتنے دھندلے ہیں
سب ہیں جیسے بے چہرہ
شور ان دکانوں کا
راہ چلتی اک گالی
ریڈیو کی آوازیں
دور کی صدائیں ہیں
آ رہی میلوں سے
جو بھی سن رہا ہوں میں
جو بھی دیکھتا ہوں میں
خواب جیسا لگتا ہے
ہے بھی اور نہیں بھی ہے
دوپہر کی گرمی میں
بے ارادہ قدموں سے
اک سڑک پہ چلتا ہوں
سامنے کے نکڑ پر
نل دکھائی دیتا ہے
سخت کیوں ہے یہ پانی
کیوں گلے میں پھنستا ہے
میرے پیٹ میں جیسے
گھونسہ ایک لگتا ہے
آ رہا ہے چکر سا
جسم پر پسینہ ہے
اب سکت نہیں باقی
آج تیسرا دن ہے
آج تیسرا دن ہے

جاوید اختر

نظم

اہل دولت کا سن چکے تم حال
اب سنو روئیداد اہل کمال
فاضلوں کو ہے فاضلوں سے عناد
پنڈتوں میں پڑے ہوئے ہیں فساد
ہے طبیبوں میں نوک جھوک سدا
ایک سے ایک کا ہے تھوک جدا
رہنے دو اہل علم ہیں اس طرح
پہلوانوں میں لاگ ہو جس طرح
عیدو والوں کا ہے اگر پٹھا
شیخو والوں میں جا نہیں سکتا
شاعروں میں بھی ہے یہی تکرار
خوشنویسوں کو ہے یہی آزار
لاکھ نیکوں کا کیوں نہ ہو اک نیک
دیکھ سکتا نہیں ہے ایک کو ایک
اس پہ طرہ یہ ہے کہ اہل ہنر
دور سمجھے ہوئے ہیں اپنا گھر
ملی اک گانٹھ جس کو ہلدی کی
اس نے سمجھا کہ میں ہوں پنساری
نسخہ اک طب کا جس کو آتا ہے
سگے بھائی سے وہ چھپاتا ہے
جس کو آتا ہے پھونکنا کشتہ
ہے ہماری طرف سے وہ گونگا
جس کو ہے کچھ رمل میں معلومات
وہ نہیں کرتا سیدھے منہ سے بات
باپ بھائی ہو یا کہ ہو بیٹا
بھید پاتا نہیں منجم کا
کام کندلے کا جس کو ہے معلوم
ہے زمانہ میں اس کی بخل کی دھوم
الغرض جس کے پاس ہے کچھ چیز
جان سے بھی سوا ہے اس کو عزیز
قوم پر ان کا کچھ نہیں احساں
ان کا ہونا نہ ہونا ہے یکساں
سب کمالات اور ہنر ان کے
قبر میں ان کے ساتھ جائیں گے
قوم کیا کہہ کے ان کو روئے گی
نام پر کیوں کہ جان کھوئے گی
تربیت یافتہ ہیں جو یاں کے
خواہ بی اے ہوں اس میں یا ایم اے
بھرتے حب وطن کا گو دم ہیں
پر محب وطن بہت کم ہیں
قوم کو ان سے جو امیدیں تھیں
اب جو دیکھا تو سب غلط نکلیں
ہسٹری ان کی اور جیوگرفی
سات پردے میں منہ دیے ہے پڑی
بند اس قفل میں ہے علم ان کا
جس کی کنجی کا کچھ نہیں ہے پتا
لیتے ہیں اپنے دل ہی دل میں مزے
گویا گونگے کا گڑ ہیں کھائے ہوئے
کرتے پھرتے ہیں سیر گل تنہا
کوئی پاس ان کے جا نہیں سکتا
اہل انصاف شرم کی جا ہے
گر نہیں بخل یہ تو پھر کیا ہے
تم نے دیکھا ہے جو وہ سب کو دکھاؤ
تم نے چکھا ہے جو وہ سب کو چکھاؤ
یہ جو دولت تمہارے پاس ہے آج
ہم وطن اس کے ہیں بہت محتاج
منہ کو ایک اک تمہارے ہے تکتا
کہ نکلتا ہے منہ سے آپ کے کیا
آپ شائستہ ہیں تو اپنے لیے
کچھ سلوک اپنی قوم سے بھی کیے
میز کرسی اگر لگاتے ہیں آپ
قوم سے پوچھئے تو پن ہے نہ پاپ
منڈا جوتا گر آپ کو ہے پسند
قوم کو اس سے فائدہ نہ گزند
قوم پر کرتے ہو اگر احساں
تو دکھاؤ کچھ اپنا جوش نہاں
کچھ دنوں عیش میں خلل ڈالو
پیٹ میں جو ہے سب اگل ڈالو
علم کو کر دو کو بہ کو ارزاں
ہند کو کر دکھاؤ انگلستاں

الطاف حسین حالی

نظم

اب ارادہ ہے کہ پتھر کے صنم پوجوں گا
تاکہ گھبراؤں تو ٹکرا بھی سکوں مر بھی سکوں

اختر الایمان

نظم

بوڑھا عطار وہ کیمیا گر کہ جس نے
زمانوں کے جنگل سے
چہروں کے پھول اور بوٹے چنے
وہ مجھے اور تجھے جانتا تھا مگر
میں نے بازار میں
تجھ سے آنکھوں کا اور دل کا سودا کیا
اے حسن میرے ایک اک دریچے پہ
کہنہ روایات و ظالم عقائد کا جنگل اگا تھا
حسن
کاش تو میری آنکھوں سے میرے دریچے کو تکتا
تو یہ جان سکتا
جہاں تو کھڑا تھا وہاں ایک اک درز سے
میری آنکھیں مرا جسم
چھن چھن کے کٹ کٹ کے گرتا رہا تھا

عشرت آفریں

نظم

دور ہر شب جاگ اٹھتے ہیں کئی ماہ و نجوم
آگ بھڑکاتی ہیں سنگ و خشت کی رعنائیاں
راستوں سے خواب گاہوں تک مسلسل موج رنگ
جس طرح قوس قزح کی ٹوٹتی انگڑائیاں
زخم نظارہ لیے آنکھوں میں چپ تکتا رہا
گو مری نیندیں بھی مجھ سے لے اڑیں شہنائیاں

احمد فراز

نظم

کھڑکیوں کی آنکھوں سے
آسماں کو تکتا ہوں
آج اپنے کمرہ میں
کس قدر اکیلا ہوں

راہی معصوم رضا

نظم

مرتے مرتے بھی شراب اس کی نہ ہو پائی تھی کم
جام کو تکتا رہا جب تک رہا آنکھوں میں دم

نشتر امروہوی

نظم

آسماں ٹوٹے
زمیں کانپے
خدائی مر مٹے
مجھ کو دکھ ہوتا ہے
میں وہ پتھر ہوں کہ جس میں کوئی چنگاری نہیں
وہ پیمبر ہوں کہ جس کے دل میں بیداری نہیں
تم مجھے اتنی حقارت سے نہ دیکھو
عین ممکن ہے کہ تم میرا ہیولیٰ دیکھ کر
غور سے پہچان کر
اپنی آنکھیں پھوڑ لو
اور میں خالی نگاہوں سے تمہیں تکتا رہوں

شہزاد احمد

نظم

میں اس دنیا کے میلے میں
کھلونوں کہ دکانوں پر سجے ایک اک کھلونے کو بڑی حسرت سے تکتا جا رہا ہوں
اس اک بچے کی صورت جس کو یہ معلوم تک ہوتا نہیں وہ کھو گیا ہے
وہ جن کے ساتھ آیا تھا وہ اس کو ڈھونڈتے پھرتے ہیں
لیکن وہ تو اس میلے میں چلتا جا رہا ہے
بنا سوچے کہ اس کے چلتے جانے کا بھلا انجام کیا ہوگا
بنا جانے کہ جب ڈھل جائے گا دن اور ہوگی شام
کیا ہوگا

امیر امام

نظم

اور میں کرمک بے نام، گھٹا کی صورت
اسی امید میں تکتا رہا تکتا ہی رہا
اب اسی وقت کوئی جل کی پری آ جائے
بانسری ہاتھ میں لے کر میں گوالا بن جاؤں
جل پری آئے کہاں سے؟ وہ اسی بستر پر
میں نے دیکھا ابھی آسودہ ہوئی لیٹ گئی
لیکن افسوس کہ میں اب بھی کھڑا ہوں تنہا
ہاتھ آلودہ ہے، نم دار ہے، دھندلی ہے نظر،
ہاتھ سے آنکھوں کے آنسو تو نہیں پونچھے تھے!

میراجی

نظم

تم مری آواز دبا نہیں سکتے
مرے لکھے ہوئے الفاظ مٹا نہیں سکتے
نہیں رکھ سکتے مجھے پابند سلاسل
تم مری آواز دبا نہیں سکو گے
ناخن شوق سے روزانہ کریدونگی
میں ایک نئی دیوار
تاکتا پرواز سے مسخر کروں گی
نئے جہان
پر کاٹ کر مرے
پنجرے میں مقید نہیں کر سکتے تم
خواب نوچ کر مری آنکھیں تسخیر نہیں کر سکتے تم
عورت ہوں میں
صاحب عقل و فہم ہوں
بہتا ہوا پانی ہوں
ہر صدی کی میں ہی کہانی ہوں

نادیہ عنبر لودھی

نظم

وہ فسانہ جسے تاریکی نے دہرایا ہے
میری آنکھوں نے سنا
میری آنکھوں میں لرزتا ہوا قطرہ جاگا
میری آنکھوں میں لرزتے ہوئے قطرے نے کسی جھیل کی صورت لے لی
جس کے خاموش کنارے پہ کھڑا کوئی جواں
دور جاتی ہوئی دوشیزہ کو
حسرت و یاس کی تصویر بنے تکتا ہے

احمد ندیم قاسمی

نظم

شام شام جیسی تھی راستوں پہ ہلچل تھی
کام کرنے والے سب
اپنا فرض ادا کر کے
اپنے اپنے میداں سے
کچھ تھکے تو کچھ ہارے
اپنے گھر کو جاتے تھے
بھیڑ تھی دکانوں پر
گھر کو لوٹنے والے
اگلی صبح کی خاطر
رک کے مال لیتے تھے
ہر کسی کو جلدی تھی
اور شام ڈھلتی تھی
ایک ہم تھے آوارہ
کل نہ تھا کوئی سودا
اس لئے سڑک پر ہم
دھیرے دھیرے بڑھتے تھے
بھاگتے ہوئے لوگوں پر نگاہ کرتے تھے
اور ان پہ ہنستے تھے
اپنی مستیوں میں گم
بے نیاز دنیا سے
آگے بڑھ رہے تھے ہم
مسکرا رہے تھے ہم
لیکن ایک منزل پر
ہم ٹھٹھک گئے اک دم
ایک اجنبی لڑکی
ہم پہ اک نظر کر کے
خوب خوب ہنستی تھی
منہ کو پھیر لیتی تھی
پھر پلٹ کے وہ ہم کو دیکھتی تھی ہنستی تھی
جانے اپنے جیسوں پر
اس کی کھلکھلاہٹ نے
کون سا اثر ڈالا
کس نے جانے کیا سوچا
کس نے جانے کیا سمجھا
ہے خبر مجھے اپنی
میری مستیاں ساری
شام کے دھندلکے میں
دور ہوتی جاتی تھیں
خود پہ شرم آتی تھی
اور وہ شوخ سی لڑکی
ہم پہ ہنستی جاتی تھی
اب مری نگاہوں کو اپنا دھیان آیا تھا
اجنبی سی لڑکی نے دل بہت جلایا تھا
اب میں ذات کا اپنی خود طواف کرتا تھا
اپنے عکس کو اپنے آئنے میں تکتا تھا
اب نیاز مندی تھی میری بے نیازی میں
اب وہ اجنبی لڑکی
دوسرے اک آوارہ
پر نگاہ کرتی تھی
اس کو دیکھ کر پھر وہ
بے پناہ ہنستی تھی
وہ عجیب لڑکی تھی وہ عجیب لڑکی تھی

عفیف سراج

نظم

پھر تری تتلی نما صورت مجھے یاد آ گئی
مجھ کو وہ لمحہ ابھی بھولا نہیں
ایک کونے میں کئی لوگوں کے ساتھ
گفتگو میں منہمک کھویا ہوا
میری آنکھوں نے کبھی تجھ سا کوئی دیکھا نہ تھا
میں تجھے تکنے لگا
دیر تک تکتا رہا
آنکھ سے کانوں سے ہونٹوں سے تجھے تکتا رہا
کیا عجب دیوانگی تھی
رشک آیا بخت پہ اپنے مجھے
لفظ کے اسرار مجھ پہ وا ہوئے
گھنٹیاں سی میرے کانوں میں بجیں
نور کے سیلاب میں ڈوبی ہوئی اس شام کی
ایک اک ساعت ترے ہمراہ ہے
رک گیا ہے وقت اس اک موڑ پر
میں جدائی کے لئے مجبور تھا
تو جدائی پر جہاں مسرور تھا

شہریار

نظم

مت پوچھ یہ مجھ سے دوست مرے
کیوں شام ڈھلے ان آنکھوں میں
بے نام سی ایک اداسی کی
گھنگھور گھٹائیں رہتی ہیں
کیوں بے خود ہو کر اس لمحے
ڈھلتا ہوا سورج تکتا ہوں
آنکھوں میں کسی کا عکس لیے
کیوں بدن کتابیں تکتا ہوں
مت پوچھ یہ وقت ہی ایسا ہے
مجھے دل پر زور نہیں رہتا
میں لاکھ چھپاتا ہوں لیکن
اشکوں کو روک نہیں سکتا
اک قرض چکانے کی خاطر
یہ کچھ لمحوں کی چوری ہے
بس یوں ہی سمجھ لے یار مرے
یہ شام مری کمزوری ہے

شکیل جاذب

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے