Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "taktaa"

Nazm MATCHES FOR "taktaa"

Nazm

aaj bazar mein pa-ba-jaulan chalo

chashm-e-nam jaan-e-shoriida kaafii nahii.n
tohmat-e-ishq-e-poshiida kaafii nahii.n
aaj baazaar me.n paa-ba-jaulaa.n chalo
dast-afshaa.n chalo mast o raqsaa.n chalo
KHaak-bar-sar chalo KHuu.n-ba-daamaa.n chalo
raah taktaa hai sab shahr-e-jaanaa.n chalo
haakim-e-shahr bhii majma-e-aam bhii
tiir-e-ilzaam bhii sang-e-dushnaam bhii
sub.h-e-naashaad bhii roz-e-naakaam bhii
un kaa dam-saaz apne sivaa kaun hai
shahr-e-jaanaa.n me.n ab baa-safaa kaun hai
dast-e-qaatil ke shaayaa.n rahaa kaun hai

Faiz Ahmad Faiz
Nazm

duri

ab vo KHvaab me.n dulhan ban kar
mere paas chalii aatii hai
mai.n us ko taktaa rahtaa huu.n
lekin vo rotii jaatii hai

Muneer Niyazi
Nazm

jugnu

ye soch soch ke aa.nkhe.n mirii bhar aatii thii.n
to jaa ke suune bichhaune pe leT rahtaa thaa
kisii se ghar me.n na raaz apne dil ke kahtaa thaa
yatiim thii mirii duniyaa, yatiim merii hayaat
yatiim shaam-o-sahar thii, yatiim the shab-o-roz
yatiim merii pa.Dhaa.ii thii mere khel yatiim
yatiim merii masarrat thii meraa Gam bhii yatiim
yatiim aa.nsu.o.n se takiya bhiig jaataa thaa
kisii se ghar me.n na kahtaa thaa apne dil kaa bhed
har ik se duur akelaa udaas rahtaa thaa
kisii shamaa.il-e-naadiida ko mai.n taktaa thaa
mai.n ek vahshat-e-be-naam se ha.Daktaa thaa

Firaq Gorakhpuri
Nazm

yaad-e-aligarh

vo chaa.e kii pyaalii pe yaaro.n ke jalse
vo sardii kii raate.n vo zulfo.n ke qisse
kabhii tazkire husn-e-sho.ala-ruKHaa.n ke
mohabbat hu.ii thii kisii ko kisii se
har ik dil vahaa.n thaa nazar kaa nishaana
bahut yaad aataa hai guzraa zamaana
bahut apnaa andaaz thaa laa-ubaalii
kabhii the jalaalii kabhii the jamaalii
kabhii baat me.n baat yuu.nhii nikaalii
sar-e-raah ko.ii qayaamat uThaa lii
kisii ko la.Daanaa kisii ko bachaanaa
bahut yaad aataa hai guzraa zamaana
kabhii sachchii baato.n ko jhuuTaa bataayaa
kabhii jhuuTii baato.n ko sach kar dikhaayaa
kabhii raaz-e-dil kah ke us ko chhupaayaa
kabhii dosto.n me.n yuu.nhii kuchh u.Daayaa
bataa kar chhupaanaa chhupaa kar bataanaa
bahut yaad aataa hai guzraa zamaana
kabhii bazm-e-ahbaab me.n sho.ala-afshaa.n
kabhii union me.n the shamshiir-e-burraa.n
kabhii bazm-e-vaa.iz me.n the paa-ba-jaulaa.n
badalte the har roz taqdiir-e-dauraa.n
jahaa.n jaisii Daflii vahaa.n vaisaa gaanaa
bahut yaad aataa hai guzraa zamaana
zamaana thaa vo ek haivaaniyat kaa
vo daur-e-malaamat thaa shaitaaniyat kaa
hame.n dard thaa ek insaaniyat kaa
uThaa.e alam ham the haqqaaniyat kaa
ba.Dhe jaa rahe the magar baaGiyaana
bahut yaad aataa hai guzraa zamaana
muqaabil me.n aa.e jasaarat thii kis ko
ko.ii rok de ba.Dh ke himmat thii kis ko
pukaare ko.ii ham ko taaqat thii kis ko
ki har bul-havas ko the ham taaziyaana
bahut yaad aataa hai guzraa zamaana
KHayaalaat-e-pur-shauq kaa silsila thaa
badal de.n zamaane ko vo hausla thaa
har ik dil me.n paidaa nayaa valvala thaa
har ik gaam ahbaab kaa qaafila thaa
idhar da.avaa karnaa udhar kar dikhaanaa
bahut yaad aataa hai guzraa zamaana
vo shah-raah-e-marrice ke pur-pech chakkar
vo shamshaad building pe ik shor-e-mahshar
vo mub.ham sii baate.n vo poshiida nashtar
vo be-fikr duniyaa vo lafzo.n ke daftar
ki jin kaa siraa thaa na ko.ii Thikaana
bahut yaad aataa hai guzraa zamaana
kisii ko hu.ii thii kisii se mohabbat
ko.ii kar rahaa thaa kisii kii shikaayat
Garaz roz Dhaatii thii taaza qayaamat
kisii kii shabaahat kisii kii malaamat
kisii kii tasallii kisii kaa sataanaa
bahut yaad aataa hai guzraa zamaana
ko.ii Gam-zada thaa ko.ii ha.ns rahaa thaa
ko.ii husn-e-naahiid par mar miTaa thaa
ko.ii chashm-e-nargis kaa biimaar saa thaa
ko.ii bas yuu.nhii taaktaa jhaa.nktaa thaa
kabhii choT khaanaa kabhii muskuraanaa
bahut yaad aataa hai guzraa zamaana
vo har january me.n numaa.ish ke charche
vo pur-shauq aa.nkhe.n vo hairaan jalve
vo chakkar pe chakkar the baara-darii ke
vo hasrat ki sau baar mil kar bhii milte
hazaaro.n bahaano.n kaa vo ik bahaanaa
bahut yaad aataa hai guzraa zamaana
vo ruKH aaftaabii pe abruu hilaalii
vo timsaal-e-siimii.n vo husn-misaalii
shaguufo.n me.n khelii gulaabo.n me.n paalii
vo KHud ik adaa thii adaa bhii niraalii
nigaahe.n bachaa kar nigaahe.n milaa kar
bahut yaad aataa hai guzraa zamaana
vo har-chand mujh ko nahii.n jaantii thii
magar merii nazro.n ko pahchaantii thii
agarche mire dil me.n vo bas ga.ii thii
magar baat bas dil kii dil me.n rahii thii
magar aaj ahbaab se kyaa chhupaanaa
bahut yaad aataa hai guzraa zamaana
vo ik shaam barsaat kii din Dhalaa thaa
abhii raat aa.ii na thii jhuTpuTaa thaa
vo baad-e-bahaarii se ik gul khilaa thaa
dha.Dakte hu.e dil se ik dil milaa thaa
nazar sun rahii thii nazar kaa fasaana
bahut yaad aataa hai guzraa zamaana
javaanii adaa.o.n me.n bal khaa rahii thii
kahaanii nigaaho.n me.n lahraa rahii thii
mohabbat mohabbat ko samjhaa rahii thii
vo chashm-e-tamannaa jhukii jaa rahii thii
qayaamat se pahle qayaamat vo Dhaanaa
bahut yaad aataa hai guzraa zamaana
hame.n biitii baate.n jo yaad aa rahii thii.n
vo maKHmuur nazre.n jo sharmaa rahii thii.n
bahut aql-e-saada ko bahkaa rahii thii.n
ba.Dii be-niyaazii se farmaa rahii thii.n
unhe.n yaad rakhnaa hame.n bhuul jaanaa
bahut yaad aataa hai guzraa zamaana
ab vo uma.nge.n na dil me.n muraade.n
ab rah ga.ii.n chand maazii kii yaade.n
ye jii chaahtaa hai unhe.n bhii bhalaa de.n
Gam-e-zindagii ko kahaa.n tak du.aa de.n
haqiiqat bhii ab ban ga.ii hai fasaana
bahut yaad aataa hai guzraa zamaana
aligarh hai ba.Dh kar hame.n kul jahaa.n se
hame.n ishq hai apnii urdu zabaa.n se
hame.n pyaar hai apne naam-o-nishaa.n se
yahaa.n aa ga.e ham na jaane kahaa.n se
qasam de ke ham ko kasii kaa bulaanaa
bahut yaad aataa hai guzraa zamaana
mohabbat se yaksar hai anjaan duniyaa
ye viiraan bastii pareshaan duniyaa
kamaal-e-KHirad se ye hairaan duniyaa
KHud apne kiye par pashemaan duniyaa
kahaa.n le ke aayaa hame.n aab-o-daana
bahut yaad aataa hai guzraa zamaana

Aabidullah Ghazi
Nazm

ek nazm

mai.n duur kahii.n tum se baiThaa ik diip kii jaanib taktaa huu.n
ik bazm sajaa.e rakkhii hai ik dard jagaa.e rakhtaa huu.n

Waseem Barelvi
Nazm

bhuk

dopahar kii garmii me.n
be-iraada qadmo.n se
ik sa.Dak pe chaltaa huu.n
ta.ng sii sa.Dak par hai.n
dono.n samt dokaane.n
KHaalii KHaalii aa.nkho.n se
har dukaan kaa taKHta
sirf dekh saktaa huu.n
ab pa.Dhaa nahii.n jaataa
log aate jaate hai.n
paas se guzarte hai.n
phir bhii kitne dhu.ndle hai.n
sab hai.n jaise be-chehra
shor in dukaano.n kaa
raah chaltii ik gaalii
radio kii aavaaze.n
duur kii sadaa.e.n hai.n
aa rahii miilo.n se
jo bhii sun rahaa huu.n mai.n
jo bhii dekhtaa huu.n mai.n
KHvaab jaisaa lagtaa hai
hai bhii aur nahii.n bhii hai
dopahar kii garmii me.n
be-iraada qadmo.n se
ik sa.Dak pe chaltaa huu.n
saamne ke nukka.D par
nal dikhaa.ii detaa hai
saKHt kyuu.n hai ye paanii
kyuu.n gale me.n pha.nstaa hai
mere peT me.n jaise
ghuu.nsa ek lagtaa hai
aa rahaa hai chakkar saa
jism par pasiina hai
ab sakat nahii.n baaqii
aaj tiisraa din hai
aaj tiisraa din hai

Javed Akhtar
Nazm

hubb-e-watan

ahl-e-daulat kaa sun chuke tum haal
ab suno ruu.edaad-e-ahl-e-kamaal
faazilo.n ko hai faazilo.n se inaad
pandito.n me.n pa.De hu.e hai.n fasaad
hai tabiibo.n me.n nok-jhok sadaa
ek se ek kaa hai thuuk judaa
rahne do ahl-e-ilm hai.n is tarah
pahalvaano.n me.n laag ho jis tarah
iiduu vaalo.n kaa hai agar paTThaa
sheKHuu vaalo.n me.n jaa nahii.n saktaa
shaa.iro.n me.n bhii hai yahii takraar
KHushnaveso.n ko hai yahii aazaar
laakh neko.n kaa kyuu.n na ho ik nek
dekh saktaa nahii.n hai ek ko ek
is pe turra ye hai ki ahl-e-hunar
duur samjhe hu.e hai.n apnaa ghar
milii ik gaa.nTh jis ko haldii kii
us ne samjhaa ki mai.n huu.n pansaarii
nusKHa ik tib kaa jis ko aataa hai
sage-bhaa.ii se vo chhupaataa hai
jis ko aataa hai phuu.nknaa kushta
hai hamaarii taraf se vo guu.ngaa
jis ko hai kuchh ramal me.n maaluumaat
vo nahii.n kartaa siidhe mu.nh se baat
baap bhaa.ii ho yaa ki ho beTaa
bhed paataa nahii.n munajjam kaa
kaam ka.ndle kaa jis ko hai ma.aluum
hai zamaane me.n us kii buKHl kii dhuum
al-Garaz jis ke paas hai kuchh chiiz
jaan se bhii sivaa hai us ko aziiz
qaum par un kaa kuchh nahii.n ehsaa.n
un kaa honaa na honaa hai yaksaa.n
sab kamaalaat aur hunar un ke
qabr me.n un ke saath jaa.e.nge
qaum kyaa kah ke un ko ro.egii
naam par kyuu.n ki jaan kho.egii
tarbiyat-yaafta hai.n jo yaa.n ke
KHvaah b-a ho.n is me.n yaa m.a
bharte hubb-e-vatan kaa go dam hai.n
par muhibb-e-vatan bahut kam hai.n
qaum ko un se jo umiide.n thii.n
ab jo dekhaa to sab Galat niklii.n
history un kii aur geography
saat parde me.n mu.nh diye hai pa.Dii
band us qufl me.n hai ilm un kaa
jis kii kunjii kaa kuchh nahii.n hai pataa
lete hai.n apne dil hii dil me.n maze
goyaa guu.nge kaa gu.D hai.n khaa.e hu.e
karte phirte hai.n sair-e-gul tanhaa
ko.ii paas un ke jaa nahii.n saktaa
ahl-e-insaaf sharm kii jaa hai
gar nahii.n buKHl ye to phir kyaa hai
tum ne dekhaa hai jo vo sab ko dikhaa.o
tum ne chakhaa hai jo vo sab ko chakhaa.o
ye jo daulat tumhaare paas hai aaj
ham-vatan is ke hai.n bahut mohtaaj
mu.nh ko ek ik tumhaare hai taktaa
ki nikaltaa hai mu.nh se aap ke kyaa
aap shaa.ista hai.n to apne liye
kuchh suluuk apnii qaum se bhii kiye
mez kursii agar lagaate hai.n aap
qaum se puuchhiye to pun hai na paap
mu.nDaa juutaa gar aap ko hai pasand
qaum ko is se faa.eda na gazand
qaum par karte ho agar ehsaa.n
to dikhaa.o kuchh apnaa josh-e-nihaa.n
kuchh dino.n aish me.n KHalal Daalo
peT me.n jo hai sab ugal Daalo
ilm ko kar do kuu-ba-kuu arzaa.n
hind ko kar dikhaa.o englistaa.n

Altaf Hussain Hali
Nazm

tanhai mein

ab iraada hai ki patthar ke sanam puujuu.ngaa
taaki ghabraa.uu.n to Takraa bhii sakuu.n mar bhii sakuu.n

Akhtarul Iman
Nazm

jahan zad

buu.Dhaa attaar vo kiimiyaa-gar ki jis ne
zamaano.n ke jangal se
chehro.n ke phuul aur buuTe chune
vo mujhe aur tujhe jaantaa thaa magar
mai.n ne baazaar me.n
tujh se aa.nkho.n kaa aur dil kaa saudaa kiyaa
ai hasan mere ek ik dariiche pe
kohna rivaayaat o zaalim aqaa.ed kaa jangal ugaa thaa
hasan
kaash to merii aa.nkho.n se mere dariiche ko taktaa
to ye jaan saktaa
jahaa.n tuu kha.Daa thaa vahaa.n ek ik darz se
merii aa.nkhe.n miraa jism
chhan chhan ke kaT kaT ke girtaa rahaa thaa

Ishrat Afreen
Nazm

ai mere be-dard shahr

duur har shab jaag uThte hai.n ka.ii maah-o-nujuum
aag bha.Dkaatii hai.n sang-o-KHisht kii raa'naa.iyaa.n
raasto.n se KHvaab-gaaho.n tak musalsal mauj-e-rang
jis tarah qaus-e-quzah kii TuuTtii a.ng.Daa.iyaa.n
zaKHm-e-nazzaara liye aa.nkho.n me.n chup taktaa rahaa
go mirii nii.nde.n bhii mujh se le u.Dii.n shahnaa.iyaa.n

Ahmad Faraz
Nazm

tanhai

khi.Dkiyo.n kii aa.ankho.n se
aasmaa.n ko taktaa huu.n
aaj apne kamre me.n
kis qadar akelaa huu.n

Rahi Masoom Raza
Nazm

ghaalib ka postmortem

marte marte bhii sharaab us kii na ho paa.ii thii kam
jaam ko taktaa rahaa jab tak rahaa aa.nkho.n me.n dam

Nashtar Amrohvi
Nazm

main aur tu

aasmaa.n TuuTe
zamii.n kaa.npe
KHudaa.ii mar miTe
mujh ko dukh hotaa hai
mai.n vo patthar huu.n ki jis me.n ko.ii chi.ngaarii nahii.n
vo payambar huu.n ki jis ke dil me.n bedaarii nahii.n
tum mujhe itnii haqaarat se na dekho
ain-mumkin hai ki tum meraa hayuulaa dekh kar
Gaur se pahchaan kar
apnii aa.nkhe.n pho.D lo
aur mai.n KHaalii nigaaho.n se tumhe.n taktaa rahuu.n

Shahzad Ahmad
Nazm

gum-shuda

mai.n is duniyaa ke mele me.n
khilauno.n ki dukaano.n par saje ek ik khilaune ko ba.Dii hasrat se taktaa jaa rahaa huu.n
us ik bachche kii suurat jis ko ye ma.aluum tak hotaa nahii.n vo kho gayaa hai
vo jin ke saath aayaa thaa vo us ko Dhuu.nDte phirte hai.n
lekin vo to is mele me.n chaltaa jaa rahaa hai
binaa soche ki us ke chalte jaane kaa bhalaa anjaam kyaa hogaa
binaa jaane ki jab Dhal jaa.egaa din aur hogii shaam
kyaa hogaa

Ameer Imam
Nazm

lab-e-ju-e-bare

aur mai.n kirmak-e-be-naam, ghaTaa kii suurat
isii ummiid me.n taktaa rahaa taktaa hii rahaa
ab isii vaqt ko.ii jal kii parii aa jaa.e
baa.nsurii haath me.n le kar mai.n gvaalaa ban jaa.uu.n
jal-parii aa.e kahaa.n se? vo isii bistar par
mai.n ne dekhaa abhii aasuuda hu.ii leT ga.ii
lekin afsos ki mai.n ab bhii kha.Daa huu.n tanhaa
haath aaluuda hai, nam-daar hai, dhundlii hai nazar,
haath se aa.nkho.n ke aa.nsuu to nahii.n po.nchhe the!

Meeraji
Nazm

aurat

tum mirii aavaaz dabaa nahii.n sakte
mire likkhe hu.e alfaaz miTaa nahii.n sakte
nahii.n rakh sakte mujhe paaband-e-salaasil
tum mirii aavaaz dabaa nahii.n sakoge
naaKHun-e-shauq se rozaana kureduu.ngii
mai.n ek na.ii diivaar
taaktaa parvaaz se musaKHKHar karuu.ngii
na.e jahaan
par kaaT kar mire
pinjre me.n muqayyad nahii.n kar sakte tum
KHvaab noch kar mirii aa.nkhe.n tasKHiir nahii.n kar sakte tum
aurat huu.n mai.n
saahab-e-aql-o-faham huu.n
bahtaa hu.aa paanii huu.n
har sadii kii mai.n hii kahaanii huu.n

Nadiya ambar lodhi
Nazm

larazte sae

vo fasaana jise taariikii ne dohraayaa hai
merii aa.nkho.n ne sunaa
merii aa.nkho.n me.n laraztaa hu.aa qatra jaagaa
merii aa.nkho.n me.n larazte hu.e qatre ne kisii jhiil kii suurat le lii
jis ke KHaamosh kinaare pe kha.Daa ko.ii javaa.n
duur jaatii hu.ii doshiiza ko
hasrat o yaas kii tasviir bane taktaa hai

Ahmad Nadeem Qasmi
Nazm

ek ajnabi laDki

shaam shaam jaisii thii raasto.n pe halchal thii
kaam karne vaale sab
apnaa farz adaa kar ke
apne apne maidaa.n se
kuchh thake to kuchh haare
apne ghar ko jaate the
bhii.D thii dukaano.n par
ghar ko lauTne vaale
aglii sub.h kii KHaatir
ruk ke maal lete the
har kisii ko jaldii thii
aur shaam Dhaltii thii
ek ham the aavaara
kal na thaa ko.ii saudaa
is liye sa.Dak par ham
dhiire dhiire ba.Dhte the
bhaagte hu.e logo.n par nigaah karte the
aur un pe ha.nste the
apnii mastiyo.n me.n gum
be-niyaaz duniyaa se
aage ba.Dh rahe the ham
muskuraa rahe the ham
lekin ek manzil par
ham ThiThak ga.e ik dam
ek ajnabii la.Dkii
ham pe ik nazar kar ke
KHuub KHuub ha.nstii thii
mu.nh ko pher letii thii
phir palaT ke vo ham ko dekhtii thii ha.nstii thii
jaane apne jaiso.n par
us kii khilkhilaahaT ne
kaun saa asar Daalaa
kis ne jaane kyaa sochaa
kis ne jaane kyaa samjhaa
hai KHabar mujhe apnii
merii mastiyaa.n saarii
shaam ke dhundalke me.n
duur hotii jaatii thii.n
KHud pe sharm aatii thii
aur vo shoKH sii la.Dkii
ham pe ha.nstii jaatii thii
ab mirii nigaaho.n ko apnaa dhyaan aayaa thaa
ajnabii sii la.Dkii ne dil bahut jalaayaa thaa
ab mai.n zaat kaa apnii KHud tavaaf kartaa thaa
apne aks ko apne aa.ine me.n taktaa thaa
ab niyaaz-mandii thii merii be-niyaazii me.n
ab vo ajnabii la.Dkii
duusre ik aavaara
par nigaah kartii thii
us ko dekh kar phir vo
be-panaah ha.nstii thii
vo ajiib la.Dkii thii vo ajiib la.Dkii thii

Afeef Siraj
Nazm

wo moD

phir tirii titlii-numaa suurat mujhe yaad aa ga.ii
mujh ko vo lamha abhii bhuulaa nahii.n
ek kone me.n ka.ii logo.n ke saath
guftuguu me.n munhamik khoyaa hu.aa
merii aa.ankho.n ne kabhii tujh saa ko.ii dekhaa na thaa
mai.n tujhe takne lagaa
der tak taktaa rahaa
aa.nkh se kaano.n se ho.nTo.n se tujhe taktaa rahaa
kyaa ajab diivaangii thii
rashk aayaa baKHt pe apne mujhe
lafz ke asraar mujh pe vaa hu.e
ghanTiyaa.n sii mere kaano.n me.n bajii.n
nuur ke sailaab me.n Duubii hu.ii is shaam kii
ek ik saa.at tire ham-raah hai
ruk gayaa hai vaqt is ik mo.D par
mai.n judaa.ii ke liye majbuur thaa
tuu judaa.ii par jahaa.n masruur thaa

Shahryar
Nazm

sham meri kamzori hai

mat puuchh ye mujh se dost mire
kyuu.n shaam Dhale in aa.nkho.n me.n
be-naam sii ek udaasii kii
ghanghor ghaTaa.e.n rahtii hai.n
kyuu.n be-KHud ho kar is lamhe
Dhaltaa hu.aa suuraj taktaa huu.n
aa.nkho.n me.n kisii kaa aks liye
kyuu.n badan kitaabe.n taktaa huu.n
mat puuchh ye vaqt hii aisaa hai
mujhe dil par zor nahii.n rahtaa
mai.n laakh chhupaataa huu.n lekin
ashko.n ko rok nahii.n saktaa
ik qarz chukaane kii KHaatir
ye kuchh lamho.n kii chorii hai
bas yuu.nhii samajh le yaar mire
ye shaam mirii kamzorii hai

Shakeel Jazib
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now