Sher on Ghamand

āsmāñ itnī bulandī pe jo itrātā hai

bhuul jaatā hai zamīñ se hī nazar aatā hai

aasman itni bulandi pe jo itraata hai

bhul jata hai zamin se hi nazar aata hai

shohrat kī bulandī bhī pal bhar kā tamāshā hai

jis Daal pe baiThe ho vo TuuT bhī saktī hai

shohrat ki bulandi bhi pal bhar ka tamasha hai

jis Dal pe baiThe ho wo TuT bhi sakti hai

adā aa.ī jafā aa.ī ġhurūr aayā hijāb aayā

hazāroñ āfateñ le kar hasīnoñ par shabāb aayā

ada aai jafa aai ghurur aaya hijab aaya

hazaron aafaten le kar hasinon par shabab aaya

āsmānoñ meñ uḌā karte haiñ phūle phūle

halke logoñ ke baḌe kaam havā kartī hai

aasmanon mein uDa karte hain phule phule

halke logon ke baDe kaam hawa karti hai

roz dīvār meñ chun detā huuñ maiñ apnī anā

roz vo toḌ ke dīvār nikal aatī hai

roz diwar mein chun deta hun main apni ana

roz wo toD ke diwar nikal aati hai

vo jis ghamanD se bichhḌā gila to is kā hai

ki saarī baat mohabbat meñ rakh-rakhāv kī thī

wo jis ghamanD se bichhDa gila to is ka hai

ki sari baat mohabbat mein rakh-rakhaw ki thi

ye soch ke dānista rahā us se bahut duur

maġhrūr hai dariyā mujhe pyāsā na samajh le

ye soch ke danista raha us se bahut dur

maghrur hai dariya mujhe pyasa na samajh le

rangīnī-o-nuz.hat pe na maġhrūr ho bulbul

hai rang bahār-e-chamanistāñ koī din aur

rangini-o-nuzhat pe na maghrur ho bulbul

hai rang bahaar-e-chamanistan koi din aur

paḌe haiñ phīke ye chāñd taare bhī is ke aage

kahāñ se laa.ī ho tum ye husn-o-jamāl laḌkī

paDe hain phike ye chand tare bhi is ke aage

kahan se lai ho tum ye husn-o-jamal laDki

zo'm kitnā karte ho ik charāġh par apne

aur havā ke chalne meñ der kitnī lagtī hai

zo'm kitna karte ho ek charagh par apne

aur hawa ke chalne mein der kitni lagti hai

bulandiyoñ par zarā takabbur se duur rahnā

vagarna ye hī banegā vaj.h-e-zavāl laḌkī

bulandiyon par zara takabbur se dur rahna

wagarna ye hi banega wajh-e-zawal laDki

zabt-e-ġham vufūr-e-shauq aur dil-e-nā-subūr-e-ishq

mujh ko to hai ġhurūr-e-ishq aap ko naaz ho na ho

zabt-e-gham wufur-e-shauq aur dil-e-na-subur-e-ishq

mujh ko to hai ghurur-e-ishq aap ko naz ho na ho

ġhurūr toḌā hai rāvan kā mere angad ne

hilā sake na jo pā ko pachās ho kar bhī

ghurur toDa hai rawan ka mere angad ne

hila sake na jo pa ko pachas ho kar bhi