عہد وفا:پرومس ڈے کے موقع پر

عادتاً تم نے کر دیے وعدے

عادتاً ہم نے اعتبار کیا

وہ جو ہم میں تم میں قرار تھا تمہیں یاد ہو کہ نہ یاد ہو

وہی یعنی وعدہ نباہ کا تمہیں یاد ہو کہ نہ یاد ہو

ثبوت ہے یہ محبت کی سادہ لوحی کا

جب اس نے وعدہ کیا ہم نے اعتبار کیا

یوں محبت سے نہ دے میری محبت کا جواب

یہ سزا سخت ہے تھوڑی سی رعایت کر دے

میں بھی حیران ہوں اے داغؔ کہ یہ بات ہے کیا

وعدہ وہ کرتے ہیں آتا ہے تبسم مجھ کو

جانتے تھے دونوں ہم اس کو نبھا سکتے نہیں

اس نے وعدہ کر لیا میں نے بھی وعدہ کر لیا

امید تو بندھ جاتی تسکین تو ہو جاتی

وعدہ نہ وفا کرتے وعدہ تو کیا ہوتا

بے عذر وہ کر لیتے ہیں وعدہ یہ سمجھ کر

یہ اہل مروت ہیں تقاضا نہ کریں گے

فریب عہد محبت کی سادگی کی قسم

وہ جھوٹ بول کہ سچ کو بھی پیار آ جائے

تری تصویر تو وعدے کے دن کھنچنے کے قابل ہے

کہ شرمائی ہوئی آنکھیں ہیں گھبرایا ہوا دل ہے

اس کے وعدوں سے اتنا تو ثابت ہوا اس کو تھوڑا سا پاس تعلق تو ہے

یہ الگ بات ہے وہ ہے وعدہ شکن یہ بھی کچھ کم نہیں اس نے وعدے کیے

مجھے ہے اعتبار وعدہ لیکن

تمہیں خود اعتبار آئے نہ آئے

میں ایک ایک تمنا سے پوچھ بیٹھا ہوں

مجھے یقیں نہیں آتا کہ میرا سب ہے تو

آج دیکھا ہے اسے ایسی محبت سے عطاؔ

وہ یہی بھول گیا اس کو کہیں جانا تھا

کوئی وعدہ وہ کر جو پورا ہو

کوئی سکہ وہ دے کہ جاری ہو

اب تو کر ڈالیے وفا اس کو

وہ جو وعدہ ادھار رہتا ہے

وہ کریں گے وصل کا وعدہ وفا

رنگ گہرے ہیں ہماری شام کے

تو نگاہوں سے پلانے کا جو وعدہ کر لے

پھینک دوں گا یہ صراحی یہ بھرا جام ابھی

اک قیامت ہے آپ کا وعدہ

چلئے یہ بھی عذاب ہو جائے

یوں ہی وعدہ کرو یقیں ہو جائے

کیوں قسم لوں قسم کے کیا معنی