Ahd-e-wafa:on promise day

ādatan tum ne kar diye va.ade

ādatan ham ne e'tibār kiyā

aadatan tum ne kar diye wade

aadatan hum ne e'tibar kiya

vo jo ham meñ tum meñ qarār thā tumheñ yaad ho ki na yaad ho

vahī yaanī va.ada nibāh kā tumheñ yaad ho ki na yaad ho

wo jo hum mein tum mein qarar tha tumhein yaad ho ki na yaad ho

wahi yani wada nibah ka tumhein yaad ho ki na yaad ho

subūt hai ye mohabbat kī sāda-lauhī kā

jab us ne va.ada kiyā ham ne e'tibār kiyā

subut hai ye mohabbat ki sada-lauhi ka

jab us ne wada kiya hum ne e'tibar kiya

yuuñ mohabbat se na de merī mohabbat kā javāb

ye sazā saḳht hai thoḌī sī ri.āyat kar de

yun mohabbat se na de meri mohabbat ka jawab

ye saza saKHt hai thoDi si riayat kar de

maiñ bhī hairān huuñ ai 'dāġh' ki ye baat hai kyā

va.ada vo karte haiñ aatā hai tabassum mujh ko

main bhi hairan hun ai 'dagh' ki ye baat hai kya

wada wo karte hain aata hai tabassum mujh ko

jānte the donoñ ham us ko nibhā sakte nahīñ

us ne va.ada kar liyā maiñ ne bhī va.ada kar liyā

jaante the donon hum us ko nibha sakte nahin

us ne wada kar liya main ne bhi wada kar liya

ummīd to bañdh jaatī taskīn to ho jaatī

va.ada na vafā karte va.ada to kiyā hotā

ummid to bandh jati taskin to ho jati

wada na wafa karte wada to kiya hota

be-uzr vo kar lete haiñ va.ada ye samajh kar

ye ahl-e-muravvat haiñ taqāzā na kareñge

be-uzr wo kar lete hain wada ye samajh kar

ye ahl-e-murawwat hain taqaza na karenge

fareb-e-ahd-e-mohabbat kī sādgī kī qasam

vo jhuuT bol ki sach ko bhī pyaar aa jaa.e

fareb-e-ahd-e-mohabbat ki sadgi ki qasam

wo jhuT bol ki sach ko bhi pyar aa jae

tirī tasvīr to va.ade ke din khiñchne ke qābil hai

ki sharmā.ī huī āñkheñ haiñ ghabrāyā huā dil hai

teri taswir to wade ke din khinchne ke qabil hai

ki sharmai hui aankhen hain ghabraya hua dil hai

us ke vādoñ se itnā to sābit huā us ko thoḌā sā pās-e-ta.alluq to hai

ye alag baat hai vo hai vāda-shikan ye bhī kuchh kam nahīñ us ne vaade kiye

us ke wadon se itna to sabit hua us ko thoDa sa pas-e-talluq to hai

ye alag baat hai wo hai wada-shikan ye bhi kuchh kam nahin us ne wade kiye

mujhe hai e'tibār-e-va.ada lekin

tumheñ ḳhud e'tibār aa.e na aa.e

mujhe hai e'tibar-e-wada lekin

tumhein KHud e'tibar aae na aae

maiñ ek ek tamannā se pūchh baiThā huuñ

mujhe yaqīñ nahīñ aatā ki merā sab hai tū

main ek ek tamanna se puchh baiTha hun

mujhe yaqin nahin aata ki mera sab hai tu

aaj dekhā hai use aisī mohabbat se 'atā'

vo yahī bhuul gayā us ko kahīñ jaanā thā

aaj dekha hai use aisi mohabbat se 'ata'

wo yahi bhul gaya us ko kahin jaana tha

koī va.ada vo kar jo puurā ho

koī sikka vo de ki jaarī ho

koi wada wo kar jo pura ho

koi sikka wo de ki jari ho

ab to kar Dāliye vafā us ko

vo jo va.ada udhār rahtā hai

ab to kar Daliye wafa us ko

wo jo wada udhaar rahta hai

vo kareñge vasl kā va.ada vafā

rañg gahre haiñ hamārī shaam ke

wo karenge wasl ka wada wafa

rang gahre hain hamari sham ke

tū nigāhoñ se pilāne kā jo va.ada kar le

pheñk dūñgā ye surāhī ye bharā jaam abhī

tu nigahon se pilane ka jo wada kar le

phenk dunga ye surahi ye bhara jam abhi

ik qayāmat hai aap kā va.ada

chaliye ye bhī azaab ho jaa.e

ek qayamat hai aap ka wada

chaliye ye bhi azab ho jae

yūñhī va.ada karo yaqīñ ho jaa.e

kyuuñ qasam luuñ qasam ke kyā ma.anī

yunhi wada karo yaqin ho jae

kyun qasam lun qasam ke kya mani