Ahmad Faraz: Abhi kuch aur karishme ghazal ke dekhte hain

ab ke ham bichhḌe to shāyad kabhī ḳhvāboñ meñ mileñ

jis tarah sūkhe hue phuul kitāboñ meñ mileñ

ab ke hum bichhDe to shayad kabhi KHwabon mein milen

jis tarah sukhe hue phul kitabon mein milen

kis kis ko batā.eñge judā.ī kā sabab ham

tū mujh se ḳhafā hai to zamāne ke liye aa

kis kis ko bataenge judai ka sabab hum

tu mujh se KHafa hai to zamane ke liye aa

kisī ko ghar se nikalte hī mil ga.ī manzil

koī hamārī tarah umr bhar safar meñ rahā

kisi ko ghar se nikalte hi mil gai manzil

koi hamari tarah umr bhar safar mein raha

agar tumhārī anā hī kā hai savāl to phir

chalo maiñ haath baḌhātā huuñ dostī ke liye

agar tumhaari ana hi ka hai sawal to phir

chalo main hath baDhata hun dosti ke liye

ham ko achchhā nahīñ lagtā koī hamnām tirā

koī tujh sā ho to phir naam bhī tujh sā rakkhe

hum ko achchha nahin lagta koi hamnam tera

koi tujh sa ho to phir nam bhi tujh sa rakkhe

dil bhī pāgal hai ki us shaḳhs se vābasta hai

jo kisī aur kā hone de na apnā rakkhe

dil bhi pagal hai ki us shaKHs se wabasta hai

jo kisi aur ka hone de na apna rakkhe

chalā thā zikr zamāne kī bevafā.ī kā

so aa gayā hai tumhārā ḳhayāl vaise hī

chala tha zikr zamane ki bewafai ka

so aa gaya hai tumhaara KHayal waise hi

ab tak dil-e-ḳhush-fahm ko tujh se haiñ umīdeñ

ye āḳhirī sham.eñ bhī bujhāne ke liye aa

ab tak dil-e-KHush-fahm ko tujh se hain umiden

ye aaKHiri shamen bhi bujhane ke liye aa

kitnā āsāñ thā tire hijr meñ marnā jānāñ

phir bhī ik umr lagī jaan se jaate jaate

kitna aasan tha tere hijr mein marna jaanan

phir bhi ek umr lagi jaan se jate jate

ab tire zikr pe ham baat badal dete haiñ

kitnī raġhbat thī tire naam se pahle pahle

ab tere zikr pe hum baat badal dete hain

kitni raghbat thi tere nam se pahle pahle

tū sāmne hai to phir kyuuñ yaqīñ nahīñ aatā

ye baar baar jo āñkhoñ ko mal ke dekhte haiñ

tu samne hai to phir kyun yaqin nahin aata

ye bar bar jo aankhon ko mal ke dekhte hain

kaun tāqoñ pe rahā kaun sar-e-rāhguzar

shahr ke saare charāġhoñ ko havā jāntī hai

kaun taqon pe raha kaun sar-e-rahguzar

shahr ke sare charaghon ko hawa jaanti hai

maiñ raat TuuT ke royā to chain se soyā

ki dil kā zahr mirī chashm-e-tar se niklā thā

main raat TuT ke roya to chain se soya

ki dil ka zahr meri chashm-e-tar se nikla tha

abhī to jaag rahe haiñ charāġh rāhoñ ke

abhī hai duur sahar thoḌī duur saath chalo

abhi to jag rahe hain charagh rahon ke

abhi hai dur sahar thoDi dur sath chalo

dekhā mujhe to tark-e-ta.alluq ke bāvajūd

vo muskurā diyā ye hunar bhī usī kā thā

dekha mujhe to tark-e-talluq ke bawajud

wo muskura diya ye hunar bhi usi ka tha

aaj ham daar pe khīñche ga.e jin bātoñ par

kyā ajab kal vo zamāne ko nisāboñ meñ mileñ

aaj hum dar pe khinche gae jin baaton par

kya ajab kal wo zamane ko nisabon mein milen

shikva-e-zulmat-e-shab se to kahīñ behtar thā

apne hisse kī koī sham.a jalāte jaate

shikwa-e-zulmat-e-shab se to kahin behtar tha

apne hisse ki koi shama jalate jate

ab to ye aarzū hai ki vo zaḳhm khā.iye

tā-zindagī ye dil na koī aarzū kare

ab to ye aarzu hai ki wo zaKHm khaiye

ta-zindagi ye dil na koi aarzu kare

ye kaun phir se unhīñ rāstoñ meñ chhoḌ gayā

abhī abhī to azāb-e-safar se niklā thā

ye kaun phir se unhin raston mein chhoD gaya

abhi abhi to azab-e-safar se nikla tha

jaane kis aalam meñ tū bichhḌā ki hai tere baġhair

aaj tak har naqsh fariyādī mirī tahrīr kā

jaane kis aalam mein tu bichhDa ki hai tere baghair

aaj tak har naqsh fariyaadi meri tahrir ka