Gham Ki Shayari

ai ġham-e-zindagī na ho nārāz

mujh ko aadat hai muskurāne kī

ai gham-e-zindagi na ho naraaz

mujh ko aadat hai muskurane ki

ġham aur hotā sun ke gar aate na vo 'vasīm'

achchhā hai mere haal kī un ko ḳhabar nahīñ

gham aur hota sun ke gar aate na wo 'wasim'

achchha hai mere haal ki un ko KHabar nahin

ġham agarche jāñ-gusil hai pa kahāñ bacheñ ki dil hai

ġham-e-ishq gar na hotā ġham-e-rozgār hotā

gham agarche jaan-gusil hai pa kahan bachen ki dil hai

gham-e-ishq gar na hota gham-e-rozgar hota

ġham bahut din muft kī khātā rahā

ab use dil se nikālā chāhiye

gham bahut din muft ki khata raha

ab use dil se nikala chahiye

ġham apne hī ashkoñ kā ḳharīdā huā hai

dil apnī hī hālat kā tamāshā.ī hai dekho

gham apne hi ashkon ka KHarida hua hai

dil apni hi haalat ka tamashai hai dekho

aaj bhī shām-e-ġham! udaas na ho

maañg kar maiñ charāġh laatā huuñ

aaj bhi sham-e-gham! udas na ho

mang kar main charagh lata hun

ab ġham kā koī ġham na ḳhushī kī ḳhushī mujhe

āḳhir ko raas aa hī ga.ī zindagī mujhe

ab gham ka koi gham na KHushi ki KHushi mujhe

aaKHir ko ras aa hi gai zindagi mujhe

ġham azīzoñ kā hasīnoñ kī judā.ī dekhī

dekheñ dikhlā.e abhī gardish-e-daurāñ kyā kyā

gham azizon ka hasinon ki judai dekhi

dekhen dikhlae abhi gardish-e-dauran kya kya

aa gayā yaad unheñ apne kisī ġham kā hisāb

hañsne vāloñ ne mire ashk jo gin ke dekhe

aa gaya yaad unhen apne kisi gham ka hisab

hansne walon ne mere ashk jo gin ke dekhe

din chhupā aur ġham ke saa.e Dhale

aarzū ke na.e charāġh jale

din chhupa aur gham ke sae Dhale

aarzu ke nae charagh jale