Ishq hai to ishq ka izhaar hona chahiye:on propose day

ye kahnā thā un se mohabbat hai mujh ko

ye kahne meñ mujh ko zamāne lage haiñ

ye kahna tha un se mohabbat hai mujh ko

ye kahne mein mujh ko zamane lage hain

ishq ke iz.hār meñ har-chand rusvā.ī to hai

par karūñ kyā ab tabī.at aap par aa.ī to hai

ishq ke izhaar mein har-chand ruswai to hai

par karun kya ab tabiat aap par aai to hai

ek din kah lījiye jo kuchh hai dil meñ aap ke

ek din sun lījiye jo kuchh hamāre dil meñ hai

ek din kah lijiye jo kuchh hai dil mein aap ke

ek din sun lijiye jo kuchh hamare dil mein hai

hāl-e-dil kyuuñ kar kareñ apnā bayāñ achchhī tarah

rū-ba-rū un ke nahīñ chaltī zabāñ achchhī tarah

haal-e-dil kyun kar karen apna bayan achchhi tarah

ru-ba-ru un ke nahin chalti zaban achchhi tarah

tujh se kis tarah maiñ iz.hār-e-tamannā kartā

lafz sūjhā to ma.ānī ne baġhāvat kar dī

tujh se kis tarah main izhaar-e-tamanna karta

lafz sujha to maani ne baghawat kar di

sab kuchh ham un se kah ga.e lekin ye ittifāq

kahne kī thī jo baat vahī dil meñ rah ga.ī

sab kuchh hum un se kah gae lekin ye ittifaq

kahne ki thi jo baat wahi dil mein rah gai

zabāñ ḳhāmosh magar nazroñ meñ ujālā dekhā

us kā iz.hār-e-mohabbat bhī nirālā dekhā

zaban KHamosh magar nazron mein ujala dekha

us ka izhaar-e-mohabbat bhi nirala dekha

aur is se pahle ki sābit ho jurm-e-ḳhāmoshī

ham apnī raa.e kā iz.hār karnā chāhte haiñ

aur is se pahle ki sabit ho jurm-e-KHamoshi

hum apni rae ka izhaar karna chahte hain

dil pe kuchh aur guzartī hai magar kyā kiije

lafz kuchh aur hī iz.hār kiye jaate haiñ

dil pe kuchh aur guzarti hai magar kya kije

lafz kuchh aur hi izhaar kiye jate hain

zabān dil kī haqīqat ko kyā bayāñ kartī

kisī kā haal kisī se kahā nahīñ jaatā

zaban dil ki haqiqat ko kya bayan karti

kisi ka haal kisi se kaha nahin jata

kiije iz.hār-e-mohabbat chāhe jo anjām ho

zindagī meñ zindagī jaisā koī to kaam ho

kije izhaar-e-mohabbat chahe jo anjam ho

zindagi mein zindagi jaisa koi to kaam ho

koī milā hī nahīñ jis se hāl-e-dil kahte

milā to rah ga.e lafzoñ ke intiḳhāb meñ ham

koi mila hi nahin jis se haal-e-dil kahte

mila to rah gae lafzon ke intiKHab mein hum

iz.hār pe bhārī hai ḳhamoshī kā takallum

harfoñ kī zabāñ aur hai āñkhoñ kī zabāñ aur

izhaar pe bhaari hai KHamoshi ka takallum

harfon ki zaban aur hai aankhon ki zaban aur

ishq hai to ishq kā iz.hār honā chāhiye

aap ko chehre se bhī bīmār honā chāhiye

ishq hai to ishq ka izhaar hona chahiye

aap ko chehre se bhi bimar hona chahiye

hāl-e-dil sunte nahīñ ye kah ke ḳhush kar dete haiñ

phir kabhī fursat meñ sun leñge kahānī aap kī

haal-e-dil sunte nahin ye kah ke KHush kar dete hain

phir kabhi fursat mein sun lenge kahani aap ki

hāl-e-dil yaar ko mahfil meñ sunā.eñ kyūñ-kar

mudda.ī kaan idhar aur udhar rakhte haiñ

haal-e-dil yar ko mahfil mein sunaen kyun-kar

muddai kan idhar aur udhar rakhte hain

muskurā.e vo hāl-e-dil sun kar

aur goyā javāb thā hī nahīñ

muskurae wo haal-e-dil sun kar

aur goya jawab tha hi nahin

kyā balā thī adā-e-pursish-e-yār

mujh se iz.hār-e-mudda.ā na huā

kya bala thi ada-e-pursish-e-yar

mujh se izhaar-e-muddaa na hua

mudda.ā iz.hār se khultā nahīñ hai

ye zabān-e-be-zabānī aur hai

muddaa izhaar se khulta nahin hai

ye zaban-e-be-zabani aur hai

kyuuñ na 'tanvīr' phir iz.hār kī jur.at kiije

ḳhāmushī bhī to yahāñ bā.is-e-rusvā.ī hai

kyun na 'tanwir' phir izhaar ki jurat kije

KHamushi bhi to yahan bais-e-ruswai hai