پریشان دلوں کی شاعری

چاند بھی حیران دریا بھی پریشانی میں ہے

عکس کس کا ہے کہ اتنی روشنی پانی میں ہے

کیوں میری طرح راتوں کو رہتا ہے پریشاں

اے چاند بتا کس سے تری آنکھ لڑی ہے

اپنے قاتل کی ذہانت سے پریشان ہوں میں

روز اک موت نئے طرز کی ایجاد کرے

دیکھ لیتے جو مرے دل کی پریشانی کو

آپ بیٹھے ہوئے زلفیں نہ سنوارا کرتے

بے نام سے اک خوف سے دل کیوں ہے پریشاں

جب طے ہے کہ کچھ وقت سے پہلے نہیں ہوگا

ہم کو جنوں کیا سکھلاتے ہو ہم تھے پریشاں تم سے زیادہ

چاک کئے ہیں ہم نے عزیزو چار گریباں تم سے زیادہ

پریشاں ہو کے دل ترک تعلق پر ہے آمادہ

محبت میں یہ صورت بھی نہ راس آئی تو کیا ہوگا

جانے کس خواب پریشاں کا ہے چکر سارا

بکھرا بکھرا ہوا رہتا ہے مرا گھر سارا

تم اپنا رنج و غم اپنی پریشانی مجھے دے دو

تمہیں غم کی قسم اس دل کی ویرانی مجھے دے دو

خاک میں اس کی جدائی میں پریشان پھروں

جب کہ یہ ملنا بچھڑنا مری مرضی نکلا

ہم تیرے پاس آ کے پریشان ہیں بہت

ہم تجھ سے دور رہنے کو تیار بھی نہیں

چھلکے ہوئے تھے جام پریشاں تھی زلف یار

کچھ ایسے حادثات سے گھبرا کے پی گیا

ذہن پر بوجھ رہا، دل بھی پریشان ہوا

ان بڑے لوگوں سے مل کر بڑا نقصان ہوا

عقل گم ہے دل پریشاں ہے نظر بیتاب ہے

جستجو سے بھی نہیں ملتا سراغ زندگی

سنبل کو پریشان کیا باد صبا نے

جب باغ میں باتیں تری زلفوں کی چلائیں

گفتگو کر کے پریشاں ہوں کہ لہجے میں ترے

وہ کھلا پن ہے کہ دیوار ہوا جاتا ہے

زندگی میں پہلے اتنی تو پریشانی نہ تھی

تنگ دامانی تھی لیکن چاک دامانی نہ تھی

اس چشم سیہ مست پہ گیسو ہیں پریشاں

مے خانے پہ گھنگھور گھٹا کھیل رہی ہے

پھرتے ہیں کئی قیس سے حیران و پریشان

اس عشق کی سرکار میں بہبود نہیں ہے

سچ بتا عشق مجھے سخت پریشاں ہوں میں

کیوں خفا ہوتا نہیں دوست خطا پر میری

اب میں ہوں اور خواب پریشاں ہے میرے ساتھ

کتنا پڑے گا اور ابھی جاگنا مجھے

دل ہے پریشاں ان کی خاطر

پل بھر کو آرام نہیں ہے

دل خوش نہ ہوا زلف پریشاں سے نکل کر

پچھتائے ہم اس شام غریباں سے نکل کر

ہم گبرو ہم مسلماں ہم جمع ہم پریشاں

اک سلسلہ بندھا اس زلف دوتا سے دیکھا