آنکھ کھلتے ہی بستیاں تاراج

کوئی لذت نہیں ہے خوابوں میں

عرصے سے اس دیار کی کوئی خبر نہیں

مہلت ملے تو آج کا اخبار دیکھ لیں

سڑک پہ چلتے ہوئے آنکھیں بند رکھتا ہوں

ترے جمال کا ایسا مزہ پڑا ہے مجھے

تجھ سے بچھڑنا کوئی نیا حادثہ نہیں

ایسے ہزاروں قصے ہماری خبر میں ہیں

تجھ کو بھی کیوں یاد رکھا

سوچ کے اب پچھتاتے ہیں

پہلے ہی کیا کم تماشے تھے یہاں

پھر نئے منظر اٹھا لایا ہوں میں

ہے انتظار مجھے جنگ ختم ہونے کا

لہو کی قید سے باہر کوئی بلاتا ہے

کیوں کھلونے ٹوٹنے پر آب دیدہ ہو گئے

اب تمہیں ہم کیا بتائیں کیا پریشانی ہوئی

یہ بات یاد رکھیں گے تلاشنے والے

جو اس سفر پہ گئے لوٹ کر نہیں آئے

خواب جتنے دیکھنے ہیں آج سارے دیکھ لیں

کیا بھروسہ کل کہاں پاگل ہوا لے جائے گی

گھر کی حد میں صحرا ہے

آگے دریا بہتا ہے

یہ اور بات کہ تم بھی یہاں کے شہری ہو

جو میں نے تم کو سنایا تھا میرا قصہ ہے

عجیب خواب تھا تعبیر کیا ہوئی اس کی

کہ ایک دریا ہواؤں کے رخ پہ بہتا تھا

تلاش جن کو ہمیشہ بزرگ کرتے رہے

نہ جانے کون سی دنیا میں وہ خزانے تھے

کس کی تلاش ہے ہمیں کس کے اثر میں ہیں

جب سے چلے ہیں گھر سے مسلسل سفر میں ہیں

گھر کے اندر جانے کے

اور کئی دروازے ہیں

دل دیتا ہے ہر پھر کے اسی در پہ صدائیں

دیوار بنا ہے ابھی دیوانہ نہیں ہے

گھر میں اور بہت کچھ تھا

صرف در و دیوار نہ تھے

اونچی اڑان کے لیے پر تولتے تھے ہم

اونچائیوں پہ سانس گھٹے گی پتا نہ تھا

ہمیں بھی آج ہی کرنا تھا انتظار اس کا

اسے بھی آج ہی سب وعدے بھول جانے تھے

تیری خبر مل جاتی تھی

شہر میں جب اخبار نہ تھے

تجھے بھلانے کی کوشش میں پھر رہے تھے کہ ہم

کچھ اور ساتھ میں پرچھائیاں لگا لائے

سونے سے جاگنے کا تعلق نہ تھا کوئی

سڑکوں پہ اپنے خواب لیے بھاگتے رہے

کہا تھا تم سے کہ یہ راستہ بھی ٹھیک نہیں

کبھی تو قافلے والوں کی بات رکھ لیتے

سوال کرتی کئی آنکھیں منتظر ہیں یہاں

جواب آج بھی ہم سوچ کر نہیں آئے

جو ہر قدم پہ مرے ساتھ ساتھ رہتا تھا

ضرور کوئی نہ کوئی تو واسطا ہوگا

سفر تو پہلے بھی کتنے کیے مگر اس بار

یہ لگ رہا ہے کہ تجھ کو بھی بھول جائیں گے

سبھی کو اپنا سمجھتا ہوں کیا ہوا ہے مجھے

بچھڑ کے تجھ سے عجب روگ لگ گیا ہے مجھے

ایک منظر میں لپٹے بدن کے سوا

سرد راتوں میں کچھ اور دکھتا نہیں

تیزی سے بیتتے ہوئے لمحوں کے ساتھ ساتھ

جینے کا اک عذاب لیے بھاگتے رہے

دریاؤں کی نذر ہوئے

دھیرے دھیرے سب تیراک

تو کبھی اس شہر سے ہو کر گزر

راستوں کے جال میں الجھا ہوں میں

آشفتہؔ اب اس شخص سے کیا خاک نباہیں

جو بات سمجھتا ہی نہیں دل کی زباں کی

ہمیں خبر تھی زباں کھولتے ہی کیا ہوگا

کہاں کہاں مگر آنکھوں پہ ہاتھ رکھ لیتے

برا مت مان اتنا حوصلہ اچھا نہیں لگتا

یہ اٹھتے بیٹھتے ذکر وفا اچھا نہیں لگتا

بدن بھیگیں گے برساتیں رہیں گی

ابھی کچھ دن یہ سوغاتیں رہیں گی