آئیں ہیں سمجھانے لوگ

ہیں کتنے دیوانے لوگ

ہر لمحہ مانگتے ہیں دعا دید یار کی

یاد بتاں بھی دل میں ہے یاد خدا کے ساتھ

ان شوخ حسینوں کی نرالی ہے ادا بھی

بت ہو کے سمجھتے ہیں کہ جیسے ہیں خدا بھی

ساقی مے ساغر پیمانہ میرے بس کی بات نہیں

صرف انہی سے دل بہلانا میرے بس کی بات نہیں

زندگی موت بن گئی ہوتی جان سے ہم گزر گئے ہوتے

اتنے عشرت زدہ ہیں ہم کہ اگر غم نہ ہوتا تو مر گئے ہوتے

غم سود و زیاں سے بے نیازانہ نکلتا ہے

بڑی فرزانگی سے تیرا دیوانہ نکلتا ہے

اٹھا صراحی یہ شیشہ وہ جام لے ساقی

پھر اس کے بعد خدا کا بھی نام لے ساقی

عشق و محبت کیا ہوتے ہیں کیا سمجھاؤں واعظ کو

بھینس کے آگے بین بجانا میرے بس کی بات نہیں

کسی اک آدھ مے کش سے خطا کچھ ہو گئی ہوگی

مگر کیوں مے کدے کا مے کدہ بد نام ہے ساقی

مرنا تو لازم ہے اک دن جی بھر کے اب جی تو لوں

مرنے سے پہلے مر جانا میرے بس کی بات نہیں

جستجو ان کی در غیر پہ لے آئی ہے

اب خدا جانے کہاں تک مری رسوائی ہے

مسکرانا کبھی نہ راس آیا

ہر ہنسی ایک واردات بنی

مرے سوال وصال پر تم نظر جھکا کر کھڑے ہوئے ہو

تمہیں بتاؤ یہ بات کیا ہے سوال پورا جواب آدھا

ابھی وہ کمسن ابھر رہا ہے ابھی ہے اس پر شباب آدھا

ابھی جگر میں خلش ہے آدھی ابھی ہے مجھ پر عتاب آدھا

پھر اس کے بعد ہمیں تشنگی رہے نہ رہے

کچھ اور دیر مروت سے کام لے ساقی

شوخی شباب حسن تبسم حیا کے ساتھ

دل لے لیا ہے آپ نے کس کس ادا کے ساتھ

پریشاں تھے تری محفل سے باہر

پشیماں ہیں تری محفل میں آ کر

ہم ان کے ستم کو بھی کرم جان رہے ہیں

اور وہ ہیں کہ اس پر بھی برا مان رہے ہیں