mohabbat kī to koī had, koī sarhad nahīñ hotī

hamāre darmiyāñ ye fāsle, kaise nikal aa.e

mohabbat ki to koi had, koi sarhad nahin hoti

hamare darmiyan ye fasle, kaise nikal aae

lakīreñ khīñchte rahne se ban ga.ī tasvīr

koī bhī kaam ho, be-kār thoḌī hotā hai

lakiren khinchte rahne se ban gai taswir

koi bhi kaam ho, be-kar thoDi hota hai

ajab pur-lutf manzar dekhtā rahtā huuñ bārish meñ

badan jaltā hai aur maiñ bhīgtā rahtā huuñ bārish meñ

ajab pur-lutf manzar dekhta rahta hun barish mein

badan jalta hai aur main bhigta rahta hun barish mein

haath chhuḌā kar jaane vaale

maiñ tujh ko apnā samjhā thā

hath chhuDa kar jaane wale

main tujh ko apna samjha tha

is shahr-e-fusūñ-gar ke azaab aur, savāb aur

hijr aur tarah kā hai, visāl aur tarah kā

is shahr-e-fusun-gar ke azab aur, sawab aur

hijr aur tarah ka hai, visal aur tarah ka

shaam paḌe so jaane vālā! diip bujhā kar yādoñ ke

raat ga.e tak jaag rahā thā pahlī pahlī bārish meñ

sham paDe so jaane wala! dip bujha kar yaadon ke

raat gae tak jag raha tha pahli pahli barish mein

maiñ ne tujh ko manzil jaanā

tū mujh ko rasta samjhā thā

main ne tujh ko manzil jaana

tu mujh ko rasta samjha tha

aks-dar-aks bikharnā hai mujhe

jaane kyā TuuT gayā hai mujh meñ

aks-dar-aks bikharna hai mujhe

jaane kya TuT gaya hai mujh mein

sadā.eñ Duub jaatī haiñ havā ke shor meñ aur maiñ

galī-kūchoñ meñ tanhā chīḳhtā rahtā huuñ bārish meñ

sadaen Dub jati hain hawa ke shor mein aur main

gali-kuchon mein tanha chiKHta rahta hun barish mein

mausam-e-yād kā koī jhoñkā, ab jo guzre tumhārī ḳhalvat se

soch lenā hamāre baare meñ, par hamārā malāl mat karnā

mausam-e-yaad ka koi jhonka, ab jo guzre tumhaari KHalwat se

soch lena hamare bare mein, par hamara malal mat karna

ek darīche se do āñkheñ roz sadā.eñ detī haiñ

raat ga.e ghar lauTne vaalo shaad raho ābād raho

ek dariche se do aankhen roz sadaen deti hain

raat gae ghar lauTne walo shad raho aabaad raho

munkashif! aaj talak ho na sakā

maiñ ḳhalā huuñ ki ḳhalā hai mujh meñ

munkashif! aaj talak ho na saka

main KHala hun ki KHala hai mujh mein

kaise gulfām kahūñ, kaise sitāra samjhūñ

vo badan aur hī miTTī kā banāyā huā hai

kaise gulfam kahun, kaise sitara samjhun

wo badan aur hi miTTi ka banaya hua hai