kuchh ġhazleñ un zulfoñ par haiñ kuchh ġhazleñ un āñkhoñ par

jaane vaale dost kī ab ik yahī nishānī baaqī hai

kuchh ghazlen un zulfon par hain kuchh ghazlen un aankhon par

jaane wale dost ki ab ek yahi nishani baqi hai

oḌh liyā hai maiñ ne libādā shīshe kā

ab mujh ko kisī patthar se Takrāne do

oDh liya hai main ne libaada shishe ka

ab mujh ko kisi patthar se Takrane do

terī yaad kā har manzar pas-manzar likhtā rahtā huuñ

dil ko varaq banātā huuñ aur shab bhar likhtā rahtā huuñ

teri yaad ka har manzar pas-manzar likhta rahta hun

dil ko waraq banata hun aur shab bhar likhta rahta hun

koī to DhūñD ke mujh ko kahīñ se le aa.e

ki ḳhud ko dekhā nahīñ hai bahut zamānoñ se

koi to DhunD ke mujh ko kahin se le aae

ki KHud ko dekha nahin hai bahut zamanon se

kabhī dikhā de vo manzar jo maiñ ne dekhe nahīñ

kabhī to niind meñ ai ḳhvāb ke farishte aa

kabhi dikha de wo manzar jo main ne dekhe nahin

kabhi to nind mein ai KHwab ke farishte aa

kyuuñ logoñ se mehr-o-vafā kī aas lagā.e baiThe ho

jhuuT ke is makrūh nagar meñ logoñ kā kirdār kahāñ

kyun logon se mehr-o-wafa ki aas lagae baiThe ho

jhuT ke is makruh nagar mein logon ka kirdar kahan

aayā basant phuul bhī sho.aloñ meñ Dhal ga.e

maiñ chūmne lagā to mire hoñT jal ga.e

aaya basant phul bhi shoalon mein Dhal gae

main chumne laga to mere honT jal gae

dasht-e-junūñ kī ḳhaak uḌāne vāloñ kī himmat dekho

TuuT chuke haiñ andar se lekin man-mānī baaqī hai

dasht-e-junun ki KHak uDane walon ki himmat dekho

TuT chuke hain andar se lekin man-mani baqi hai

mirī dahlīz par chupke se 'pāshī'

ye kis ne rakh dī merī laash lā kar

meri dahliz par chupke se 'pashi'

ye kis ne rakh di meri lash la kar

huī haiñ dair o haram meñ ye sāzisheñ kaisī

dhuāñ sā uThne lagā shahr ke makānoñ se

hui hain dair o haram mein ye sazishen kaisi

dhuan sa uThne laga shahr ke makanon se

apne gird-o-pesh kā bhī kuchh patā rakh

dil kī duniyā to magar sab se judā rakh

apne gird-o-pesh ka bhi kuchh pata rakh

dil ki duniya to magar sab se juda rakh

haiñ saare inkishāf apne haiñ saare mumkināt apne

ham is duniyā kā saarā ilm le jā.eñge saath apne

hain sare inkishaf apne hain sare mumkinat apne

hum is duniya ka sara ilm le jaenge sath apne

na.ī na.ī āvāzeñ ubhrīñ 'pāshī' aur phir Duub ga.iiñ

shahr-e-suḳhan meñ lekin ik āvāz purānī baaqī hai

nai nai aawazen ubhrin 'pashi' aur phir Dub gain

shahr-e-suKHan mein lekin ek aawaz purani baqi hai