kal vasl meñ bhī niiñd na aa.ī tamām shab

ek ek baat par thī laḌā.ī tamām shab

kal wasl mein bhi nind na aai tamam shab

ek ek baat par thi laDai tamam shab

burā māniye mat mire dekhne se

tumheñ haq ne aisā banāyā to dekhā

bura maniye mat mere dekhne se

tumhein haq ne aisa banaya to dekha

gumāñ na kyūñki karūñ tujh pe dil churāne kā

jhukā ke aañkh sabab kyā hai muskurāne kā

guman na kyunki karun tujh pe dil churane ka

jhuka ke aankh sabab kya hai muskurane ka

tujhe naqsh-e-hastī miTāyā to dekhā

jo parda thā haa.il uThāyā to dekhā

tujhe naqsh-e-hasti miTaya to dekha

jo parda tha hail uThaya to dekha

na kī ġhamza ne jallādī na un āñkhoñ ne saffākī

jise kahte haiñ dil apnā vahī qātil huā jaañ kā

na ki ghamza ne jalladi na un aankhon ne saffaki

jise kahte hain dil apna wahi qatil hua jaan ka

koī hamdard na hamdam na yagāna apnā

rū-ba-rū kis ke kaheñ ham ye fasānā apnā

koi hamdard na hamdam na yagana apna

ru-ba-ru kis ke kahen hum ye fasana apna

ye na jaanā the ki us mahfil meñ dil rah jā.egā

ham ye samjhe the chale ā.eñge dam bhar dekh kar

ye na jaana the ki us mahfil mein dil rah jaega

hum ye samjhe the chale aaenge dam bhar dekh kar

ḳhvāb meñ bosa liyā thā raat ba-lab-e-nāzukī

sub.h dam dekhā to us ke hoñTh pe but-ḳhāla thā

KHwab mein bosa liya tha raat ba-lab-e-nazuki

subh dam dekha to us ke honTh pe but-KHala tha