ذہن میں یاد کے گھر ٹوٹنے لگتے ہیں شہابؔ

لوگ ہو جاتے ہیں جی جی کے پرانے کتنے

ایسا بھی کبھی ہو میں جسے خواب میں دیکھوں

جاگوں تو وہی خواب کی تعبیر بتائے

گو ترک تعلق میں بھی شامل ہیں کئی دکھ

بے کیف تعلق کے بھی آزار بہت ہیں

میں سچ سے گریزاں ہوں اور جھوٹ پہ نادم ہوں

وہ سچ پہ پشیماں ہے اور جھوٹ پر آمادہ

کہا تھا میں نے کھو کر بھی تجھے زندہ رہوں گا

وہ ایسا جھوٹ تھا جس کو نبھانا پڑ گیا ہے

بکھرا بکھرا سا ساز و ساماں ہے

ہم کہیں دل کہیں عقیدہ کہیں

شاید وہ بھولی بسری نہ ہو آرزو کوئی

کچھ اور بھی کمی سی ہے تیری کمی کے ساتھ

میں اور میرا شوق سفر ساتھ ہیں مگر

یہ اور بات ہے کہ سفر ہو گئے تمام

دل سنبھالے نہیں سنبھلتا ہے

جیسے اٹھ کر ابھی گیا ہے کوئی

بچھڑا وہ مجھ سے ایسے نہ بچھڑے کبھی کوئی

اب یوں ملا ہے جیسے وہ پہلے ملا نہ ہو

اس طرح سجا رکھے ہیں میں نے در و دیوار

گھر میں تری صورت کے سوا کچھ بھی نہیں ہے

ہوتے ہوتے میں پہنچ جاتا ہوں اپنے آپ تک

اس سے آگے اور کوئی راستہ جاتا نہیں

اپنی کشتی سر پہ رکھ کر چل رہے ہیں ہم شہابؔ

یہ بھی ممکن ہے کہ اگلے موڑ پر دریا ملے

در کنج صدا بند کا کھولیں گے کسی روز

ہم لوگ جو خاموش ہیں بولیں گے کسی روز

یہ آب دیدہ ٹھہر جائے جھیل کی صورت

کہ ایک چاند کا ٹکڑا نہانا چاہتا ہے

میں بھی شاید آپ کو تنہا ملوں

اپنی تنہائی میں جا کر دیکھیے

ہم میں اور پرندوں میں فرق صرف اتنا ہے

دست و پا ملے ہم کو بال و پر پرندوں کو

استعارے زمین سے جائیں

اک غزل آسمان سے اترے

کار زندگانی کے شور و شر میں مدت سے

اس کو بھول جانے کا احتمال رہتا ہے

صبح تک جانے کہاں مجھ کو اڑا کر لے جائے

ایک آندھی جو سر شام چلی ہے مجھ میں

حقیقت کو تماشے سے جدا کرنے کی خاطر

اٹھا کر بارہا پردہ گرانا پڑ گیا ہے

خوف اک بلندی سے پستیوں میں رلنے کا

آب جو میں رہتا ہے اور نظر نہیں آتا