جمال مجھ پہ یہ اک دن میں تو نہیں آیا

ہزار آئینے ٹوٹے مرے سنورتے ہوئے

کنارہ کر نہ اے دنیا مری ہست زبونی سے

کوئی دن میں مرا روشن ستارہ ہونے والا ہے

کھول دیتے ہیں پلٹ آنے پہ دروازۂ دل

آنے والے کا ارادہ نہیں دیکھا جاتا

رات رو رو کے گزاری ہے چراغوں کی طرح

تب کہیں حرف میں تاثیر نظر آئی ہے

یہ ویرانی سی یوں ہی تو نہیں رہتی ہے آنکھوں میں

مرے دل ہی سے کوئی جادۂ وحشت نکلتا ہے

ابھی پھر رہا ہوں میں آپ اپنی تلاش میں

ابھی مجھ سے میرا مزاج ہی نہیں مل رہا

اٹھا اٹھا کے ترے ناز اے غم دنیا

خود آپ ہی تری عادت خراب کی ہم نے

عجیب درد کا رشتہ تھا سب کے سب روئے

شجر گرا تو پرندے تمام شب روئے

ترے خیال کی لو ہی سفر میں کام آئی

مرے چراغ تو لگتا تھا روئے اب روئے

وہ آئینہ ہے تو حیرت کسی جمال کی ہو

جو سنگ ہے تو کہیں رہ گزر میں رکھا جائے

زمین اتنی نہیں ہے کہ پاؤں رکھ پائیں

دل خراب کی ضد ہے کہ گھر بنایا جائے

کوئی کب دیوار بنا ہے میرے سفر میں

خود ہی اپنے رستے کی دیوار رہا ہوں

خوش ارزانی ہوئی ہے اس قدر بازار ہستی میں

گراں جس کو سمجھتا ہوں وہ کم قیمت نکلتا ہے

ابھی تو منصب ہستی سے میں ہٹا ہی نہیں

بدل گئے ہیں مرے دوستوں کے لہجے بھی

اب آسمان بھی کم پڑ رہے ہیں اس کے لیے

قدم زمین پر رکھا تھا جس نے ڈرتے ہوئے

بے وجہ نہ بدلے تھے مصور نے ارادے

میں اس کے خیالات میں پہلے بھی کہیں تھا

یہ خیال تھا کبھی خواب میں تجھے دیکھتے

کبھی زندگی کی کتاب میں تجھے دیکھتے

عجب نہیں در و دیوار جیسے ہو جائیں

ہم ایسے لوگ جو خود سے کلام کرتے ہیں