maiñ pā sakā na kabhī is ḳhalish se chhuTkārā

vo mujh se jiit bhī saktā thā jaane kyuuñ haarā

main pa saka na kabhi is KHalish se chhuTkara

wo mujh se jit bhi sakta tha jaane kyun haara

us darīche meñ bhī ab koī nahīñ aur ham bhī

sar jhukā.e hue chup-chāp guzar jaate haiñ

us dariche mein bhi ab koi nahin aur hum bhi

sar jhukae hue chup-chap guzar jate hain

khulā hai dar pa tirā intizār jaatā rahā

ḳhulūs to hai magar e'tibār jaatā rahā

khula hai dar pa tera intizar jata raha

KHulus to hai magar e'tibar jata raha

bahāna DhūñDte rahte haiñ koī rone kā

hameñ ye shauq hai kyā āstīñ bhigone kā

bahana DhunDte rahte hain koi rone ka

hamein ye shauq hai kya aastin bhigone ka

mujhe māyūs bhī kartī nahīñ hai

yahī aadat tirī achchhī nahīñ hai

mujhe mayus bhi karti nahin hai

yahi aadat teri achchhi nahin hai

ġhalat bātoñ ko ḳhāmoshī se sunñā haamī bhar lenā

bahut haiñ fā.ede is meñ magar achchhā nahīñ lagtā

ghalat baaton ko KHamoshi se sunna hami bhar lena

bahut hain faede is mein magar achchha nahin lagta

ham to bachpan meñ bhī akele the

sirf dil kī galī meñ khele the

hum to bachpan mein bhi akele the

sirf dil ki gali mein khele the

Dar ham ko bhī lagtā hai raste ke sannāTe se

lekin ek safar par ai dil ab jaanā to hogā

Dar hum ko bhi lagta hai raste ke sannaTe se

lekin ek safar par ai dil ab jaana to hoga

jidhar jaate haiñ sab jaanā udhar achchhā nahīñ lagtā

mujhe pāmāl rastoñ kā safar achchhā nahīñ lagtā

jidhar jate hain sab jaana udhar achchha nahin lagta

mujhe pamal raston ka safar achchha nahin lagta

chhat kī kaḌiyoñ se utarte haiñ mire ḳhvāb magar

merī dīvāroñ se Takrā ke bikhar jaate haiñ

chhat ki kaDiyon se utarte hain mere KHwab magar

meri diwaron se Takra ke bikhar jate hain

ik mohabbat kī ye tasvīr hai do rañgoñ meñ

shauq sab merā hai aur saarī hayā us kī hai

ek mohabbat ki ye taswir hai do rangon mein

shauq sab mera hai aur sari haya us ki hai

maiñ bachpan meñ khilaune toḌtā thā

mire anjām kī vo ibtidā thī

main bachpan mein khilaune toDta tha

mere anjam ki wo ibtida thi

dhuāñ jo kuchh gharoñ se uTh rahā hai

na puure shahar par chhā.e to kahnā

dhuan jo kuchh gharon se uTh raha hai

na pure shahar par chhae to kahna

us kī ā.ankhoñ meñ bhī kājal phail rahā hai

maiñ bhī muḌ ke jaate jaate dekh rahā huuñ

us ki aaankhon mein bhi kajal phail raha hai

main bhi muD ke jate jate dekh raha hun

kabhī jo ḳhvāb thā vo pā liyā hai

magar jo kho ga.ī vo chiiz kyā thī

kabhi jo KHwab tha wo pa liya hai

magar jo kho gai wo chiz kya thi

nekī ik din kaam aatī hai ham ko kyā samjhāte ho

ham ne be-bas marte dekhe kaise pyāre pyāre log

neki ek din kaam aati hai hum ko kya samjhate ho

hum ne be-bas marte dekhe kaise pyare pyare log

is shahr meñ jiine ke andāz nirāle haiñ

hoñToñ pe latīfe haiñ āvāz meñ chhāle haiñ

is shahr mein jine ke andaz nirale hain

honTon pe latife hain aawaz mein chhaale hain

tum ye kahte ho ki maiñ ġhair huuñ phir bhī shāyad

nikal aa.e koī pahchān zarā dekh to lo

tum ye kahte ho ki main ghair hun phir bhi shayad

nikal aae koi pahchan zara dekh to lo

tab ham donoñ vaqt churā kar laate the

ab milte haiñ jab bhī fursat hotī hai

tab hum donon waqt chura kar late the

ab milte hain jab bhi fursat hoti hai

ūñchī imāratoñ se makāñ merā ghir gayā

kuchh log mere hisse kā sūraj bhī khā ga.e

unchi imaraton se makan mera ghir gaya

kuchh log mere hisse ka suraj bhi kha gae