Sher on Khwab

ab judā.ī ke safar ko mire āsān karo

tum mujhe ḳhvāb meñ aa kar na pareshān karo

ab judai ke safar ko mere aasan karo

tum mujhe KHwab mein aa kar na pareshan karo

aur to kyā thā bechne ke liye

apnī āñkhoñ ke ḳhvāb beche haiñ

aur to kya tha bechne ke liye

apni aankhon ke KHwab beche hain

uTho ye manzar-e-shab-tāb dekhne ke liye

ki niiñd shart nahīñ ḳhvāb dekhne ke liye

uTho ye manzar-e-shab-tab dekhne ke liye

ki nind shart nahin KHwab dekhne ke liye

ḳhvāb kī tarah bikhar jaane ko jī chāhtā hai

aisī tanhā.ī ki mar jaane ko jī chāhtā hai

KHwab ki tarah bikhar jaane ko ji chahta hai

aisi tanhai ki mar jaane ko ji chahta hai

har ek raat ko mahtāb dekhne ke liye

maiñ jāgtā huuñ tirā ḳhvāb dekhne ke liye

har ek raat ko mahtab dekhne ke liye

main jagta hun tera KHwab dekhne ke liye

āshiqī meñ 'mīr' jaise ḳhvāb mat dekhā karo

bāvle ho jāoge mahtāb mat dekhā karo

aashiqi mein 'mir' jaise KHwab mat dekha karo

bawle ho jaoge mahtab mat dekha karo

ḳhvāb hī ḳhvāb kab talak dekhūñ

kaash tujh ko bhī ik jhalak dekhūñ

KHwab hi KHwab kab talak dekhun

kash tujh ko bhi ek jhalak dekhun

ḳhvāb hote haiñ dekhne ke liye

un meñ jā kar magar rahā na karo

KHwab hote hain dekhne ke liye

un mein ja kar magar raha na karo

kabhī jo ḳhvāb thā vo pā liyā hai

magar jo kho ga.ī vo chiiz kyā thī

kabhi jo KHwab tha wo pa liya hai

magar jo kho gai wo chiz kya thi

yahī hai zindagī kuchh ḳhvāb chand ummīdeñ

inhīñ khilaunoñ se tum bhī bahal sako to chalo

yahi hai zindagi kuchh KHwab chand ummiden

inhin khilaunon se tum bhi bahal sako to chalo

kahānī likhte hue dāstāñ sunāte hue

vo so gayā hai mujhe ḳhvāb se jagāte hue

kahani likhte hue dastan sunate hue

wo so gaya hai mujhe KHwab se jagate hue

ye zarūrī hai ki āñkhoñ kā bharam qaa.em rahe

niiñd rakkho yā na rakkho ḳhvāb meyārī rakho

ye zaruri hai ki aankhon ka bharam qaem rahe

nind rakkho ya na rakkho KHwab meyari rakho

beTiyāñ baap kī āñkhoñ meñ chhupe ḳhvāb ko pahchāntī haiñ

aur koī dūsrā is ḳhvāb ko paḌh le to burā māntī haiñ

beTiyan bap ki aankhon mein chhupe KHwab ko pahchanti hain

aur koi dusra is KHwab ko paDh le to bura manti hain

ik muamma hai samajhne kā na samjhāne kā

zindagī kaahe ko hai ḳhvāb hai dīvāne kā

ek muamma hai samajhne ka na samjhane ka

zindagi kahe ko hai KHwab hai diwane ka

tumhāre ḳhvāb se har shab lipaT ke sote haiñ

sazā.eñ bhej do ham ne ḳhatā.eñ bhejī haiñ

tumhaare KHwab se har shab lipaT ke sote hain

sazaen bhej do hum ne KHataen bheji hain

merī rusvā.ī ke asbāb haiñ mere andar

aadmī huuñ so bahut ḳhvāb haiñ mere andar

meri ruswai ke asbab hain mere andar

aadmi hun so bahut KHwab hain mere andar

roz vo ḳhvāb meñ aate haiñ gale milne ko

maiñ jo sotā huuñ to jaag uThtī hai qismat merī

roz wo KHwab mein aate hain gale milne ko

main jo sota hun to jag uThti hai qismat meri

jis tarah ḳhvāb mire ho ga.e reza reza

us tarah se na kabhī TuuT ke bikhre koī

jis tarah KHwab mere ho gae reza reza

us tarah se na kabhi TuT ke bikhre koi

ḳhvāb, ummīd, tamannā.eñ, ta.alluq, rishte

jaan le lete haiñ āḳhir ye sahāre saare

KHwab, ummid, tamannaen, talluq, rishte

jaan le lete hain aaKHir ye sahaare sare

āñkheñ khulīñ to jaag uThīñ hasrateñ tamām

us ko bhī kho diyā jise paayā thā ḳhvāb meñ

aankhen khulin to jag uThin hasraten tamam

us ko bhi kho diya jise paya tha KHwab mein

muddat se ḳhvāb meñ bhī nahīñ niiñd kā ḳhayāl

hairat meñ huuñ ye kis kā mujhe intizār hai

muddat se KHwab mein bhi nahin nind ka KHayal

hairat mein hun ye kis ka mujhe intizar hai

dekhī thī ek raat tirī zulf ḳhvāb meñ

phir jab talak jiyā maiñ pareshān hī rahā

dekhi thi ek raat teri zulf KHwab mein

phir jab talak jiya main pareshan hi raha

maiñ ne dekhā hai bahāroñ meñ chaman ko jalte

hai koī ḳhvāb kī tābīr batāne vaalā

main ne dekha hai bahaaron mein chaman ko jalte

hai koi KHwab ki tabir batane wala

bārhā terā intizār kiyā

apne ḳhvāboñ meñ ik dulhan kī tarah

barha tera intizar kiya

apne KHwabon mein ek dulhan ki tarah

ḳhvāboñ par iḳhtiyār na yādoñ pe zor hai

kab zindagī guzārī hai apne hisāb meñ

KHwabon par iKHtiyar na yaadon pe zor hai

kab zindagi guzari hai apne hisab mein

mere ḳhvāboñ meñ bhī tū mere ḳhayāloñ meñ bhī tū

kaun sī chiiz tujhe tujh se judā pesh karūñ

mere KHwabon mein bhi tu mere KHayalon mein bhi tu

kaun si chiz tujhe tujh se juda pesh karun

zindagī ḳhvāb dekhtī hai magar

zindagī zindagī hai ḳhvāb nahīñ

zindagi KHwab dekhti hai magar

zindagi zindagi hai KHwab nahin

kyā hasīñ ḳhvāb mohabbat ne dikhāyā thā hameñ

khul ga.ī aañkh to tābīr pe ronā aayā

kya hasin KHwab mohabbat ne dikhaya tha hamein

khul gai aankh to tabir pe rona aaya

raat ko sonā na sonā sab barābar ho gayā

tum na aa.e ḳhvāb meñ āñkhoñ meñ ḳhvāb aayā to kyā

raat ko sona na sona sab barabar ho gaya

tum na aae KHwab mein aankhon mein KHwab aaya to kya

niiñd ko log maut kahte haiñ

ḳhvāb kā naam zindagī bhī hai

nind ko log maut kahte hain

KHwab ka nam zindagi bhi hai

haañ kabhī ḳhvāb-e-ishq dekhā thā

ab tak āñkhoñ se ḳhuuñ Tapaktā hai

han kabhi KHwab-e-ishq dekha tha

ab tak aankhon se KHun Tapakta hai

niind bhī jāgtī rahī puure hue na ḳhvāb bhī

sub.h huī zamīn par raat Dhalī mazār meñ

nind bhi jagti rahi pure hue na KHwab bhi

subh hui zamin par raat Dhali mazar mein

talab kareñ to ye āñkheñ bhī in ko de duuñ maiñ

magar ye log in āñkhoñ ke ḳhvāb māñgte haiñ

talab karen to ye aankhen bhi in ko de dun main

magar ye log in aankhon ke KHwab mangte hain

hamāre ḳhvāb chorī ho ga.e haiñ

hameñ rātoñ ko niiñd aatī nahīñ hai

hamare KHwab chori ho gae hain

hamein raaton ko nind aati nahin hai

āvāz de rahā thā koī mujh ko ḳhvāb meñ

lekin ḳhabar nahīñ ki bulāyā kahāñ gayā

aawaz de raha tha koi mujh ko KHwab mein

lekin KHabar nahin ki bulaya kahan gaya

kyā jaane use vahm hai kyā merī taraf se

jo ḳhvāb meñ bhī raat ko tanhā nahīñ aatā

kya jaane use wahm hai kya meri taraf se

jo KHwab mein bhi raat ko tanha nahin aata

dil kabhī ḳhvāb ke pīchhe kabhī duniyā kī taraf

ek ne ajr diyā ek ne ujrat nahīñ dī

dil kabhi KHwab ke pichhe kabhi duniya ki taraf

ek ne ajr diya ek ne ujrat nahin di

ḳhvāb kā rishta haqīqat se na joḌā jaa.e

ā.īna hai ise patthar se na toḌā jaa.e

KHwab ka rishta haqiqat se na joDa jae

aaina hai ise patthar se na toDa jae

tā phir na intizār meñ niiñd aa.e umr bhar

aane kā ahd kar ga.e aa.e jo ḳhvāb meñ

ta phir na intizar mein nind aae umr bhar

aane ka ahd kar gae aae jo KHwab mein

ye jab hai ki ik ḳhvāb se rishta hai hamārā

din Dhalte hī dil Dūbne lagtā hai hamārā

ye jab hai ki ek KHwab se rishta hai hamara

din Dhalte hi dil Dubne lagta hai hamara

kaisā jaadū hai samajh aatā nahīñ

niiñd merī ḳhvāb saare aap ke

kaisa jadu hai samajh aata nahin

nind meri KHwab sare aap ke

ḳhvāboñ ke ufuq par tirā chehra ho hamesha

aur maiñ usī chehre se na.e ḳhvāb sajā.ūñ

KHwabon ke ufuq par tera chehra ho hamesha

aur main usi chehre se nae KHwab sajaun

nīndoñ meñ phir rahā huuñ use DhūñDhtā huā

shāmil jo ek ḳhvāb mire rat-jage meñ thā

nindon mein phir raha hun use DhunDhta hua

shamil jo ek KHwab mere rat-jage mein tha

ik ḳhvāb hī to thā jo farāmosh ho gayā

ik yaad hī to thī jo bhulā dī ga.ī to kyā

ek KHwab hi to tha jo faramosh ho gaya

ek yaad hi to thi jo bhula di gai to kya

uThā laayā huuñ saare ḳhvāb apne

tirī yādoñ ke bosīda makāñ se

uTha laya hun sare KHwab apne

teri yaadon ke bosida makan se

bārūd ke badle hāthoñ meñ aa jaa.e kitāb to achchhā ho

ai kaash hamārī āñkhoñ kā ikkīsvāñ ḳhvāb to achchhā ho

barud ke badle hathon mein aa jae kitab to achchha ho

ai kash hamari aankhon ka ikkiswan KHwab to achchha ho

aisā bhī kabhī ho maiñ jise ḳhvāb meñ dekhūñ

jāgūñ to vahī ḳhvāb kī ta.abīr batā.e

aisa bhi kabhi ho main jise KHwab mein dekhun

jagun to wahi KHwab ki tabir batae

ham tire ḳhvāboñ kī jannat se nikal kar aa ga.e

dekh terā qasr-e-ālī-shān ḳhālī kar diyā

hum tere KHwabon ki jannat se nikal kar aa gae

dekh tera qasr-e-ali-shan KHali kar diya

bahtī huī āñkhoñ kī ravānī meñ mare haiñ

kuchh ḳhvāb mire ain-javānī meñ mare haiñ

bahti hui aankhon ki rawani mein mare hain

kuchh KHwab mere ain-jawani mein mare hain

hai tā-hadd-e-imkāñ koī bastī na bayābāñ

āñkhoñ meñ koī ḳhvāb dikhā.ī nahīñ detā

hai ta-hadd-e-imkan koi basti na bayaban

aankhon mein koi KHwab dikhai nahin deta