ḳhudā se tirā chāhnā chāhtā huuñ

merā chāhnā dekh kyā chāhtā huuñ

KHuda se tera chahna chahta hun

mera chahna dekh kya chahta hun

ai junūñ phir mire sar par vahī shāmat aa.ī

phir phañsā zulfoñ meñ dil phir vahī aafat aa.ī

ai junun phir mere sar par wahi shamat aai

phir phansa zulfon mein dil phir wahi aafat aai

ishq kahtā hai do-ālam se judā ho jaao

husn kahtā hai jidhar jaao nayā aalam hai

ishq kahta hai do-alam se juda ho jao

husn kahta hai jidhar jao naya aalam hai

bīmār-e-ġham kī chāragarī kuchh zarūr hai

vo dard dil meñ de ki masīhā kaheñ jise

bimar-e-gham ki chaaragari kuchh zarur hai

wo dard dil mein de ki masiha kahen jise

vo yahāñ tak jo aa nahīñ sakte

kyā mujhe bhī bulā nahīñ sakte

wo yahan tak jo aa nahin sakte

kya mujhe bhi bula nahin sakte

lab-e-nāzuk ke bose luuñ to missī muñh banātī hai

kaf-e-pā ko agar chūmūñ to mehñdī rañg laatī hai

lab-e-nazuk ke bose lun to missi munh banati hai

kaf-e-pa ko agar chumun to mehndi rang lati hai

dard-e-dil kitnā pasand aayā use

maiñ ne jab kī aah us ne vaah kī

dard-e-dil kitna pasand aaya use

main ne jab ki aah us ne wah ki

vo ḳhat vo chehra vo zulf-e-siyāh to dekho

ki shaam sub.h ke baad aa.e sub.h shaam ke baad

wo KHat wo chehra wo zulf-e-siyah to dekho

ki sham subh ke baad aae subh sham ke baad

vo kahte haiñ maiñ zindagānī huuñ terī

ye sach hai to un kā bharosā nahīñ hai

wo kahte hain main zindagani hun teri

ye sach hai to un ka bharosa nahin hai

dil diyā jis ne kisī ko vo huā sāhib-e-dil

haath aa jaatī hai kho dene se daulat dil kī

dil diya jis ne kisi ko wo hua sahib-e-dil

hath aa jati hai kho dene se daulat dil ki

sub.h tak vo bhī na chhoḌī tū ne ai bād-e-sabā

yādgār-e-raunaq-e-mahfil thī parvāne kī ḳhaak

subh tak wo bhi na chhoDi tu ne ai baad-e-saba

yaadgar-e-raunaq-e-mahfil thi parwane ki KHak

milne vaale se raah paidā kar

us se milne kī aur sūrat kyā

milne wale se rah paida kar

us se milne ki aur surat kya

merī āñkheñ aur dīdār aap kā

yā qayāmat aa ga.ī yā ḳhvāb hai

meri aankhen aur didar aap ka

ya qayamat aa gai ya KHwab hai

kis ko dekhā un kī sūrat dekh kar

jī meñ aatā hai ki sajda kījiye

kis ko dekha un ki surat dekh kar

ji mein aata hai ki sajda kijiye

tabī.at kī mushkil-pasandī to dekho

hasīnoñ se tark-e-vafā chāhtā huuñ

tabiat ki mushkil-pasandi to dekho

hasinon se tark-e-wafa chahta hun

vo phir va.ada milne kā karte haiñ yaanī

abhī kuchh dinoñ ham ko jiinā paḌegā

wo phir wada milne ka karte hain yani

abhi kuchh dinon hum ko jina paDega