tumhāre sañg-e-taġhāful kā kyuuñ kareñ shikva

is aa.ine kā muqaddar hī TūTnā hogā

tumhaare sang-e-taghaful ka kyun karen shikwa

is aaine ka muqaddar hi TuTna hoga

khaḌā huā huuñ sar-e-rāh muntazir kab se

ki koī guzre to ġham kā ye bojh uThvā de

khaDa hua hun sar-e-rah muntazir kab se

ki koi guzre to gham ka ye bojh uThwa de

sadā kise deñ 'na.īmī' kise dikhā.eñ zaḳhm

ab itnī raat ga.e kaun jāgtā hogā

sada kise den 'naimi' kise dikhaen zaKHm

ab itni raat gae kaun jagta hoga

maazī ke reg-zār pe rakhnā sambhal ke paañv

bachchoñ kā is meñ koī gharauñdā banā na ho

mazi ke reg-zar pe rakhna sambhal ke panw

bachchon ka is mein koi gharaunda bana na ho

mire ḳhulūs pe shak kī to koī vaj.h nahīñ

mire libās meñ ḳhanjar agar chhupā niklā

mere KHulus pe shak ki to koi wajh nahin

mere libas mein KHanjar agar chhupa nikla

maiñ bhī is safha-e-hastī pe ubhar saktā huuñ

rañg to tum mirī tasvīr meñ bhar kar dekho

main bhi is safha-e-hasti pe ubhar sakta hun

rang to tum meri taswir mein bhar kar dekho

sajde ke har nishāñ pe hai ḳhuuñ sā jamā huā

yaaro ye us ke ghar kā kahīñ rāsta na ho

sajde ke har nishan pe hai KHun sa jama hua

yaro ye us ke ghar ka kahin rasta na ho

ye haath raakh meñ ḳhvāboñ kī Dālte to ho

magar jo raakh meñ shola koī dabā niklā

ye hath rakh mein KHwabon ki Dalte to ho

magar jo rakh mein shola koi daba nikla

husn ik dariyā hai sahrā bhī haiñ us kī raah meñ

kal kahāñ hogā ye dariyā ye bhī to socho zarā

husn ek dariya hai sahra bhi hain us ki rah mein

kal kahan hoga ye dariya ye bhi to socho zara

mire ḳhvāboñ kī chiknī sīḌhiyoñ par

na jaane kis kā but TuuTā paḌā hai

mere KHwabon ki chikni siDhiyon par

na jaane kis ka but TuTa paDa hai