ishq meñ ye majbūrī to ho jaatī hai

duniyā ġhair-zarūrī to ho jaatī hai

ishq mein ye majburi to ho jati hai

duniya ghair-zaruri to ho jati hai

ye hijrateñ haiñ zamīn o zamāñ se aage kī

jo jā chukā hai use lauT kar nahīñ aanā

ye hijraten hain zamin o zaman se aage ki

jo ja chuka hai use lauT kar nahin aana

dil aur duniyā donoñ ko ḳhush rakhne meñ

apne-āp se duurī to ho jaatī hai

dil aur duniya donon ko KHush rakhne mein

apne-ap se duri to ho jati hai

kyā raat ke āshob meñ vo ḳhud se laḌā thā

ā.īne ke chehre pe ḳharāsheñ sī paḌī haiñ

kya raat ke aashob mein wo KHud se laDa tha

aaine ke chehre pe KHarashen si paDi hain

lafzoñ meñ ḳhālī jag.heñ bhar lene se

baat adhūrī, puurī to ho jaatī hai

lafzon mein KHali jaghen bhar lene se

baat adhuri, puri to ho jati hai

ḳhvāb ke aage shikast-e-ḳhvāb kā thā sāmnā

ye safar thā marhala-dar-marhala TuuTā huā

KHwab ke aage shikast-e-KHwab ka tha samna

ye safar tha marhala-dar-marhala TuTa hua

lamha munsif bhī hai mujrim bhī hai majbūrī kā

fā.eda shak kā mujhe de ke barī kar jaa.e

lamha munsif bhi hai mujrim bhi hai majburi ka

faeda shak ka mujhe de ke bari kar jae

phir se tālīf-e-dil ho phir koī

is sahīfe kī rū-numā.ī kare

phir se talif-e-dil ho phir koi

is sahife ki ru-numai kare

kahā thā kis ne ki shāḳh-e-nahīf se phūTeñ

gunāh ham se huā be-gunāhiyoñ jaisā

kaha tha kis ne ki shaKH-e-nahif se phuTen

gunah hum se hua be-gunahiyon jaisa