sālgirah par kitnī nek tamannā.eñ mausūl huiiñ

lekin in meñ ek mubārakbād abhī tak baaqī hai

salgirah par kitni nek tamannaen mausul huin

lekin in mein ek mubarakbaad abhi tak baqi hai

faqīr-e-shahr bhī rahā huuñ 'shahryār' bhī magar

jo itminān faqr meñ hai tāj-o-taḳht meñ nahīñ

faqir-e-shahr bhi raha hun 'shahryar' bhi magar

jo itminan faqr mein hai taj-o-taKHt mein nahin

rātoñ ko jāgte haiñ isī vāste ki ḳhvāb

dekhegā band āñkheñ to phir lauT jā.egā

raaton ko jagte hain isi waste ki KHwab

dekhega band aankhen to phir lauT jaega

na dastakeñ na sadā kaun dar pe aayā hai

faqīr-e-shahr hai yā shahryār dekhiyegā

na dastaken na sada kaun dar pe aaya hai

faqir-e-shahr hai ya shahryar dekhiyega

ḳhvāb-e-ziyāñ haiñ umr kā ḳhvāb haiñ hāsil-e-hayāt

is kā bhī thā yaqīñ mujhe vo bhī mire gumāñ meñ thā

KHwab-e-ziyan hain umr ka KHwab hain hasil-e-hayat

is ka bhi tha yaqin mujhe wo bhi mere guman mein tha

hamāre shahr kī rivāyatoñ meñ ek ye bhī thā

duā se qabl pūchhnā asar meñ kitnī der hai

hamare shahr ki riwayaton mein ek ye bhi tha

dua se qabl puchhna asar mein kitni der hai

qatra Thiik hai dariyā hone meñ nuqsān bahut hai

dekh to kaise Duub rahā hai merā lashkar mujh meñ

qatra Thik hai dariya hone mein nuqsan bahut hai

dekh to kaise Dub raha hai mera lashkar mujh mein

abhī hameñ guzārnī hai ek umr-e-muḳhtasar

magar hamārī umr-e-muḳhtasar meñ kitnī der hai

abhi hamein guzarni hai ek umr-e-muKHtasar

magar hamari umr-e-muKHtasar mein kitni der hai

samā.ī kis tarah merī āñkhoñ kī putliyoñ meñ

vo ek hairat jo ā.īne se bahut baḌī thī

samai kis tarah meri aankhon ki putliyon mein

wo ek hairat jo aaine se bahut baDi thi

tujh se bhī kab huī tadbīr mirī vahshat kī

tū bhī muTThī meñ kahāñ bheñch sakā paanī ko

tujh se bhi kab hui tadbir meri wahshat ki

tu bhi muTThi mein kahan bhench saka pani ko

ilm kā dam bharnā chhoḌo bhī aur amal ko bhuul bhī jaao

ā.īna-ḳhāne meñ ho sāhib fikr karo hairānī kī

ilm ka dam bharna chhoDo bhi aur amal ko bhul bhi jao

aaina-KHane mein ho sahib fikr karo hairani ki

tū maujūd hai maiñ ma.adūm huuñ is kā matlab ye hai

tujh meñ jo nāpaid hai pyāre vo hai mayassar mujh meñ

tu maujud hai main madum hun is ka matlab ye hai

tujh mein jo napaid hai pyare wo hai mayassar mujh mein

jal uTheñ yādoñ kī qindīleñ sadā.eñ Duub jaa.eñ

dar-haqīqat ḳhāmushī sahrā bhī hai dariyā bhī hai

jal uThen yaadon ki qindilen sadaen Dub jaen

dar-haqiqat KHamushi sahra bhi hai dariya bhi hai

lams-e-sadā-e-sāz ne zaḳhm nihāl kar diye

ye to vahī hunar hai jo dast-e-tabīb-e-jāñ meñ thā

lams-e-sada-e-saz ne zaKHm nihaal kar diye

ye to wahi hunar hai jo dast-e-tabib-e-jaan mein tha

hadd-e-gumāñ se ek shaḳhs duur kahīñ chalā gayā

maiñ bhī vahīñ chalā gayā maiñ bhī guzishtagāñ meñ thā

hadd-e-guman se ek shaKHs dur kahin chala gaya

main bhi wahin chala gaya main bhi guzishtagan mein tha