رہ جائے گی یہ ساری کہانی یہیں دھری

اک روز جب میں اپنے فسانے میں جاؤں گا

اب تیرا کھیل کھیل رہا ہوں میں اپنے ساتھ

خود کو پکارتا ہوں اور آتا نہیں ہوں میں

اب تجھے میرا نام یاد نہیں

جب کہ تیرا پتا رہا ہوں میں

وہ اور ہوں گے جو کار ہوس پہ زندہ ہیں

میں اس کی دھوپ سے سایہ بدل کے آیا ہوں

ہے مصیبت میں گرفتار مصیبت میری

جو بھی مشکل ہے وہ میرے لیے آسانی ہے

ایسا ایک مقام ہو جس میں دل جیسی ویرانی ہو

یادوں جیسی تیز ہوا ہو درد سے گہرا پانی ہو

میں کسی اور ہی عالم کا مکیں ہوں پیارے

میرے جنگل کی طرح گھر بھی ہے سنسان مرا

جس کے بغیر جی نہیں سکتے تھے جا چکا

پر دل سے درد آنکھ سے آنسو کہاں گیا

ترے غرور کی عصمت دری پہ نادم ہوں

ترے لہو سے بھی دامن ہے داغ دار مرا

اجالا ہے جو یہ کون و مکاں میں

ہماری خاک سے لایا گیا ہے