کم ظرف زمانے کی حقارت کا گلہ کیا

میں خوش ہوں مرا پیار سمندر کی طرح ہے

اب بھی آتی ہے تری یاد پہ اس کرب کے ساتھ

ٹوٹتی نیند میں جیسے کوئی سپنا دیکھا

مجھ کو منزل بھی نہ پہچان سکی

میں کہ جب گرد سفر سے نکلا

تھکا ہوا ہوں کسی سائے کی تلاش میں ہوں

بچھڑ گیا ہوں ستاروں سے روشنی کی طرح

اشک جب دیدۂ تر سے نکلا

ایک کانٹا سا جگر سے نکلا

اپنوں کی چاہتوں نے بھی کیا کیا دیئے فریب

روتے رہے لپٹ کے ہر اک اجنبی کے ساتھ

توڑ بھی دو احساس کے رشتے چھوڑ بھی دو دکھ اپنانے

رو رو کے جیون کاٹو گے رو رو کے مر جاؤ گے

جنگل کی دھوپ چھاؤں ہی جنگل کا حسن ہے

سایوں کو بھی قبول کرو روشنی کے ساتھ

وہ خود تو مر ہی گیا تھا مجھے بھی مار گیا

وہ اپنے روگ مری روح میں اتار گیا

ساحل ساحل دار سجے ہیں موج موج زنجیریں ہیں

ڈوبنے والے دریا دریا جشن مناتے رہتے ہیں

اندھیری رات کی پرچھائیوں میں ڈوب گیا

سحر کی کھوج میں جو بھی افق کے پار گیا

میں ہر اک حال میں تھا گردش دوراں کا امیں

جس نے دنیا نہیں دیکھی مرا چہرہ دیکھے

آخری دید ہے آؤ مل لیں

رنج بے کار ہے کیا ہونا ہے

چاندنی کے ہاتھ بھی جب ہو گئے شل رات کو

اپنے سینے پر سنبھالا میں نے بوجھل رات کو

جرم ہستی کی سزا کیوں نہیں دیتے مجھ کو

لوگ جینے کی دعا کیوں نہیں دیتے مجھ کو