maiñ ne chāhā hai jise yuuñ to mukammal hai magar

ik kamī hai ki use urdu nahīñ aatī hai

main ne chaha hai jise yun to mukammal hai magar

ek kami hai ki use urdu nahin aati hai

tum ko hāthoñ kī lakīroñ meñ nahīñ likh paayā

is liye ġhazloñ meñ likh kar hī talāfī kar lī

tum ko hathon ki lakiron mein nahin likh paya

is liye ghazlon mein likh kar hi talafi kar li

tujh se jab guftugū nahīñ hotī

ḳhud se terī hī baat kartā huuñ

tujh se jab guftugu nahin hoti

KHud se teri hi baat karta hun

ab vo nahīñ hai phir bhī daftar se sīdhā ghar aatā huuñ

Dar lagtā hai der huī to maañ mujh ko phir DañTegī

ab wo nahin hai phir bhi daftar se sidha ghar aata hun

Dar lagta hai der hui to man mujh ko phir DanTegi

kisī kā naam tere naam se mansūb hai varna

maiñ tere naam kā tattō kalā.ī meñ banā letā

kisi ka nam tere nam se mansub hai warna

main tere nam ka tattoo kalai mein bana leta

do ek roz ke faaqe to kitnī baar hue

par ab ke vasl kā ye qaht jān-levā hai

do ek roz ke faqe to kitni bar hue

par ab ke wasl ka ye qaht jaan-lewa hai

ye bādal ye dhuñdhlake ye phuvāreñ aur ye tanhā.ī

ye mausam to tumhāre saath meñ hone kā mausam hai

ye baadal ye dhundhlake ye phuwaren aur ye tanhai

ye mausam to tumhaare sath mein hone ka mausam hai

zāhiran tasvīr meñ lab par hañsī to hai magar

ai musavvir tujh ko to ma.alūm hai andar kā dukh

zahiran taswir mein lab par hansi to hai magar

ai musawwir tujh ko to malum hai andar ka dukh

mujhe na Dar hai qayāmat kā ab na ḳhauf-e-ajal

maiñ dard-e-tark-e-mulāqāt sah ke aaya huuñ

mujhe na Dar hai qayamat ka ab na KHauf-e-ajal

main dard-e-tark-e-mulaqat sah ke aaya hun

ab us ke lahje meñ aḳhbār kī sī ḳhushkī hai

ham ab bhī saath meñ hote to vo ġhazal hotī

ab us ke lahje mein aKHbar ki si KHushki hai

hum ab bhi sath mein hote to wo ghazal hoti

sub.h kī chaa.e se phir aa.iiñ yaad

tere pahlū meñ chaa.e kī shāmeñ

subh ki chae se phir aain yaad

tere pahlu mein chae ki shamen

ho duur pa yuuñ mujh meñ samā.ī ho ki jaise

ashk āñkhoñ se nikleñ bhī to nam rahtī haiñ āñkheñ

ho dur pa yun mujh mein samai ho ki jaise

ashk aankhon se niklen bhi to nam rahti hain aankhen

hai tīrgī se jang muqābil aur apne saath

jugnū kī saf hai jashn-e-charāġhāñ nahīñ to kyā

hai tirgi se jang muqabil aur apne sath

jugnu ki saf hai jashn-e-charaghan nahin to kya