ulfat kā hai maza ki 'asar' ġham bhī saath hoñ

tārīkiyāñ bhī saath raheñ raushnī ke saath

ulfat ka hai maza ki 'asar' gham bhi sath hon

tarikiyan bhi sath rahen raushni ke sath

kitnā mushkil hai ḳhud-baḳhud ronā

be-ḳhudī se rihā kare koī

kitna mushkil hai KHud-baKHud rona

be-KHudi se riha kare koi

hai ajab sī kashmakash dil meñ 'asar'

kis ko bhūleñ kis ko rakkheñ yaad ham

hai ajab si kashmakash dil mein 'asar'

kis ko bhulen kis ko rakkhen yaad hum

fikr-e-jahān dard-e-mohabbat firāq-e-yār

kyā kahiye kitne ġham haiñ mirī zindagī ke saath

fikr-e-jahan dard-e-mohabbat firaq-e-yar

kya kahiye kitne gham hain meri zindagi ke sath

zindagī ik na.ī raah par

be-irāda hī chalne lagī

zindagi ek nai rah par

be-irada hi chalne lagi

ulfat ke badle un se milā dard-e-lā-ilāj

itnā baḌhe hai dard maiñ jitnī davā karūñ

ulfat ke badle un se mila dard-e-la-ilaj

itna baDhe hai dard main jitni dawa karun

zindagī tujh se ye gilā hai mujhe

koī apnā nahīñ milā hai mujhe

zindagi tujh se ye gila hai mujhe

koi apna nahin mila hai mujhe

saaya bhī saath chhoḌ gayā ab to ai 'asar'

phir kis liye maiñ aaj ko kal se judā karūñ

saya bhi sath chhoD gaya ab to ai 'asar'

phir kis liye main aaj ko kal se juda karun

rāsta rok liyā merā kisī bachche ne

is meñ koī to 'asar' merī bhalā.ī hogī

rasta rok liya mera kisi bachche ne

is mein koi to 'asar' meri bhalai hogi

udaas ho na tū ai dil kisī ke rone se

ḳhushī ke saath ġhamoñ ko bikharte dekhā hai

udas ho na tu ai dil kisi ke rone se

KHushi ke sath ghamon ko bikharte dekha hai

junūñ kī ḳhair ho tujh ko 'asar' milā sab kuchh

ye kaifiyat bhī zarūrī thī āgahī ke liye

junun ki KHair ho tujh ko 'asar' mila sab kuchh

ye kaifiyat bhi zaruri thi aagahi ke liye

jo log Darte haiñ rātoñ ko apne saa.e se

unhīñ ko din ke ujāloñ meñ Darte dekhā hai

jo log Darte hain raaton ko apne sae se

unhin ko din ke ujalon mein Darte dekha hai

ham hue dasht-e-navard phir bhī na dekhā tujh ko

zindagī itnā batā de tū kahāñ hotī hai

hum hue dasht-e-naward phir bhi na dekha tujh ko

zindagi itna bata de tu kahan hoti hai