سونپو گے اپنے بعد وراثت میں کیا مجھے

بچے کا یہ سوال ہے گونگے سماج سے

اندھیرے میں تجسس کا تقاضا چھوڑ جانا ہے

کسی دن خامشی میں خود کو تنہا چھوڑ جانا ہے

رفتہ رفتہ ختم قصہ ہو گیا ہونا ہی تھا

وہ بھی آخر میرے جیسا ہو گیا ہونا ہی تھا

نہ جانے کب کوئی آ کر مری تکمیل کر جائے

اسی امید پہ خود کو ادھورا چھوڑ جانا ہے

زہر میں ڈوبی ہوئی پرچھائیوں کا رقص ہے

خود سے وابستہ یہاں میں بھی نہیں تو بھی نہیں

کینوس پر ہے یہ کس کا پیکر حرف و صدا

اک نمود آرزو جو بے نشاں ہے اور بس

بہت محتاط ہو کر سانس لینا معتبر ہو تم

ہمارا کیا ہے ہم تو خود ہی اپنی رد میں رہتے ہیں

وہ جن کی ہجرتوں کے آج بھی کچھ داغ روشن ہیں

انہی بچھڑے پرندوں کو شجر واپس بلاتا ہے

شاید مری نگاہ میں کوئی شگاف تھا

ورنہ اداس رات کا چہرہ تو صاف تھا

رستے فرار کے سبھی مسدود تو نہ تھے

اپنی شکست کا مجھے کیوں اعتراف تھا

تیرے بدن کی دھوپ سے محروم کب ہوا

لیکن یہ استعارہ بھی منظوم کب ہوا

سروں کے بوجھ کو شانوں پہ رکھنا معجزہ بھی ہے

ہر اک پل ورنہ ہم بھی حلقۂ سرمد میں رہتے ہیں

میں نے بھی پرچھائیوں کے شہر کی پھر راہ لی

اور وہ بھی اپنے گھر کا ہو گیا ہونا ہی تھا

ناتمامی کے شرر میں روز و شب جلتے رہے

سچ تو یہ ہے بے زباں میں بھی نہیں تو بھی نہیں

تم بھی تھے سرشار میں بھی غرق بحر رنگ و بو

پھر بھلا دونوں میں آخر خود کشیدہ کون تھا