خوشبو جیسی رات نے میرا

اپنے جیسا حال کیا تھا

مرے وجود کے اندر ہے اک قدیم مکان

جہاں سے میں یہ اداسی ادھار لیتی ہوں

خواب کا انتظار ختم ہوا

آنکھ کو نیند سے جگاتے ہیں

ہم نے جب حال دل ان سے اپنا کہا

وہ بھی قصہ کسی کا سنانے لگے

نہیں وہ اتنا بھی پاگل نہیں تھا

جو مر جاتا مری وابستگی میں

چبھ رہی ہے اندھیری رات مجھے

ہر ستارہ بجھائے بیٹھی ہوں

آئنے پر تو ہے بھروسا مجھے

اس سے کیوں منہ چھپائے بیٹھی ہوں

شام کھلتی ہے تیرے آنے سے

لب پہ تیرا سوال رکھتی ہے

مجھ کو خوابوں کے باغ میں لا کر

گھنے جنگل میں کھو رہی ہے رات

ڈوبنے کی نہ تیرنے کی خبر

عشق دریا میں بس اتر دیکھوں

بام و در پر اترنے والی دھوپ

سبز رنگ ملال رکھتی ہے

شہزادی کے کانوں میں جو بات کہی تھی اک تو نے

بعد ترے وہ بات ترے ہی افسانوں میں گونجتی ہے