دیکھو تو ہر اک رنگ سے ملتا ہے مرا رنگ

سوچو تو ہر اک بات ہے اوروں سے جدا بھی

رات آنگن میں چاند اترا تھا

تم ملے تھے کہ خواب دیکھا تھا

غم گساری کے لئے اب نہیں آتا ہے کوئی

زخم بھر جانے کا امکاں نہ ہوا تھا سو ہوا

ہو گئی شام ڈھل گیا سورج

دن کو شب میں بدل گیا سورج

لوگ قسمت پہ چھوڑ دیتے ہیں

بات بنتی نہیں ہے جب کچھ بھی

تو ہر اک کا ہے اور کسی کا نہیں

لوگ کہتے رہیں ہمارا چاند

لوگ کیا سادہ ہیں امید وفا رکھتے ہیں

جیسے معلوم نہیں ان کو حقیقت تیری

یہ انقلاب زمانہ نہیں تو پھر کیا ہے

امیر شہر جو کل تھا وہ ہے فقیروں میں

جو دیکھتا ہوں زمانے کی نا شناسی کو

یہ سوچتا ہوں کہ اچھا تھا بے ہنر رہتا

سکون قلب تو کیا ہے قرار جاں بھی لٹا

تمہاری یاد بھی آئی تو راہزن کی طرح

کوئی نہیں ہے ایسا کہ اپنا کہیں جسے

کیسا طلسم ٹوٹا ہے اپنے گمان کا

تجھ سے بچھڑ کے ہم تو یہی سوچتے رہے

یہ گردش حیات نہ آئے گی راس کیا

آدمی کا عمل سے رشتہ ہے

کام آتا نہیں نسب کچھ بھی

کس درجہ مرے شہر کی دل کش ہے فضا بھی

مانوس ہر اک چیز ہے مٹی بھی ہوا بھی

اب آ بھی جاؤ کہ اک دوسرے میں گم ہو جائیں

وصال و ہجر کا قصہ بہت پرانا ہوا

یہ اپنا اپنا مقدر ہے اس کو کیا کہئے

تجھے سراب تو دریا بنا دیا ہے مجھے

جب بھی ملتا ہے مسکراتا ہے

خواہ اس کا ہو اب سبب کچھ بھی

کوئی ملے نہ ملے بیقرار رہتا ہے

کہ دل کا حال بھی اک موج آب جیسا ہے

کٹا نہ کوہ الم ہم سے کوہ کن کی طرح

بدل سکا نہ زمانہ ترے چلن کی طرح

دل نے گو لاکھ یہ چاہا کہ بھلا دوں تجھ کو

یاد نے تیری مگر آج بھی مارا شب خوں

وہ عشق جس کی زمانے کو بھی خبر نہ رہی

ترے بچھڑنے سے رسوا نگر نگر میں رہا

جو دیکھیے تو زمانہ ہے تیز رو کتنا

طلوع صبح ابھی ہے تو وقت شام ابھی