دینے والے تو مجھے نیند نہ دے خواب تو دے

مجھ کو مہتاب سے آگے بھی کہیں جانا ہے

اے شام ہجر یار مری تو گواہی دے

میں تیرے ساتھ ساتھ رہا گھر نہیں گیا

لباس دیکھ کے اتنا ہمیں غریب نہ جان

ہمارا غم تری املاک سے زیادہ ہے

اسی لیے تو ہار کا ہوا نہیں ملال تک

وہ میرے ساتھ ساتھ تھا عروج سے زوال تک

چمن اجاڑنے والو تمہیں خدا سمجھے

تمہیں نہ آئی حیا پھول تو ہمارے گئے

بازار آرزو میں کٹی جا رہی ہے عمر

ہم کو خرید لے وہ خریدار چاہئے

تو نے بھی سارے زخم کسی طور سہ لیے

میں بھی بچھڑ کے جی ہی لیا مر نہیں گیا

دھند میں کھو کے رہ گئیں صورتیں مہر و ماہ سی

وقت کی گرد نے انہیں خواب و خیال کر دیا

سر پہ سورج ہے تو پھر چھاؤں سے محظوظ نہ ہو

دھوپ کا رنگ بھی دیوار میں آ سکتا ہے

خیال آتا ہے اکثر اتار پھینکوں بدن

کہ یہ لباس مری خاک سے زیادہ ہے

کس لیے خود کو سمجھتا ہے وہ پتھر کی لکیر

اس کا انکار بھی اقرار میں آ سکتا ہے

سڑک کے پار چلا جا رہا ہے بچتا ہوا

کسی کا ہاتھ کوئی مہربان تھامے ہوئے

آہن و سنگ کو زہراب فنا چاٹ گیا

پہلے دیوار شکستہ ہوئی پھر باب گرا

ان سے بھی پوچھئے کبھی اپنی زمیں کا کرب

جو ساحلوں کو چھوڑ کے دریا میں آ گئے

سب معجزوں کے باب میں یہ معجزہ بھی ہو

جو لوگ مر گئے ہیں انہیں خاک سے اٹھا

کیا ڈھونڈنے نکلی ہے کسی قیس کو پاگل

اس درجہ جو یہ باد بیابانی ہوئی ہے