آج کی رات دوالی ہے دیے روشن ہیں

آج کی رات یہ لگتا ہے میں سو سکتا ہوں

وقت رخصت آب دیدہ آپ کیوں ہیں

جسم سے تو جاں ہماری جا رہی ہے

میں نے اک شہر ہمیشہ کے لیے چھوڑ دیا

لیکن اس شہر کو آنکھوں میں بسا لایا ہوں

زخم جو تم نے دیا وہ اس لیے رکھا ہرا

زندگی میں کیا بچے گا زخم بھر جانے کے بعد

یوں بار بار مجھ کو صدائیں نہ دیجئے

اب وہ نہیں رہا ہوں کوئی دوسرا ہوں میں

زندگی میری مجھے قید کئے دیتی ہے

اس کو ڈر ہے میں کسی اور کا ہو سکتا ہوں

آنسوؤں سے لکھ رہے ہیں بے بسی کی داستاں

لگ رہا ہے درد کی تصویر بن جائیں گے ہم

عجیب حالت ہے جسم و جاں کی ہزار پہلو بدل رہا ہوں

وہ میرے اندر اتر گیا ہے میں خود سے باہر نکل رہا ہوں

شب کی آغوش میں مہتاب اتارا اس نے

میری آنکھوں میں کوئی خواب اتارا اس نے

یہ جو دیوار اندھیروں نے اٹھا رکھی ہے

میرا مقصد اسی دیوار میں در کرنا ہے

سارے دکھ سو جائیں گے لیکن اک ایسا غم بھی ہے

جو مرے بستر پہ صدیوں کا سفر رکھ جائے گا

میرے جسم سے وقت نے کپڑے نوچ لئے

منظر منظر خود میری پوشاک ہوا

اگر سائے سے جل جانے کا اتنا خوف تھا تو پھر

سحر ہوتے ہی سورج کی نگہبانی میں آ جاتے