ہم نے کانٹوں کو بھی نرمی سے چھوا ہے اکثر

لوگ بے درد ہیں پھولوں کو مسل دیتے ہیں

سر جس پہ نہ جھک جائے اسے در نہیں کہتے

ہر در پہ جو جھک جائے اسے سر نہیں کہتے

کیا تباہ تو دلی نے بھی بہت بسملؔ

مگر خدا کی قسم لکھنؤ نے لوٹ لیا

کعبے میں مسلمان کو کہہ دیتے ہیں کافر

بت خانے میں کافر کو بھی کافر نہیں کہتے

خوشبو کو پھیلنے کا بہت شوق ہے مگر

ممکن نہیں ہواؤں سے رشتہ کئے بغیر

ٹھوکر کسی پتھر سے اگر کھائی ہے میں نے

منزل کا نشاں بھی اسی پتھر سے ملا ہے

میرے دل کو بھی پڑا رہنے دو

چیز رکھی ہوئی کام آتی ہے

ادھر ادھر مری آنکھیں تجھے پکارتی ہیں

مری نگاہ نہیں ہے زبان ہے گویا

تم جب آتے ہو تو جانے کے لیے آتے ہو

اب جو آ کر تمہیں جانا ہو تو آنا بھی نہیں

نا امیدی ہے بری چیز مگر

ایک تسکین سی ہو جاتی ہے

دہرائی جا سکے گی نہ اب داستان عشق

کچھ وہ کہیں سے بھول گئے ہیں کہیں سے ہم

سکوں نصیب ہوا ہو کبھی جو تیرے بغیر

خدا کرے کہ مجھے تو کبھی نصیب نہ ہو

حسن بھی کمبخت کب خالی ہے سوز عشق سے

شمع بھی تو رات بھر جلتی ہے پروانے کے ساتھ

رو رہا ہوں آج میں سارے جہاں کے سامنے

روئے گا کل دیکھنا سارا جہاں میرے لیے

کسی کے ستم اس قدر یاد آئے

زباں تھک گئی مہرباں کہتے کہتے

زمانہ سازیوں سے میں ہمیشہ دور رہتا ہیں

مجھے ہر شخص کے دل میں اتر جانا نہیں آتا

عشق بھی ہے کس قدر بر خود غلط

ان کی بزم ناز اور خودداریاں

محبت میں خدا جانے ہوئیں رسوائیاں کس سے

میں ان کا نام لیتا ہوں وہ میرا نام لیتے ہیں

دو دن میں ہو گیا ہے یہ عالم کہ جس طرح

تیرے ہی اختیار میں ہیں عمر بھر سے ہم

گل تو گل خار پہ دیکھی جو کبھی گرم شعاع

چھا گئے باغ پہ ہم ابر بہاراں ہو کر