ġhairoñ se kahā tum ne ġhairoñ se sunā tum ne

kuchh ham se kahā hotā kuchh ham se sunā hotā

ghairon se kaha tum ne ghairon se suna tum ne

kuchh hum se kaha hota kuchh hum se suna hota

ik ishq kā ġham aafat aur us pe ye dil aafat

yā ġham na diyā hotā yā dil na diyā hotā

ek ishq ka gham aafat aur us pe ye dil aafat

ya gham na diya hota ya dil na diya hota

ummīd to bañdh jaatī taskīn to ho jaatī

va.ada na vafā karte va.ada to kiyā hotā

ummid to bandh jati taskin to ho jati

wada na wafa karte wada to kiya hota

raat kī baat kā mazkūr hī kyā

chhoḌiye raat ga.ī baat ga.ī

raat ki baat ka mazkur hi kya

chhoDiye raat gai baat gai

aao husn-e-yār kī bāteñ kareñ

zulf kī ruḳhsār kī bāteñ kareñ

aao husn-e-yar ki baaten karen

zulf ki ruKHsar ki baaten karen

qubūl is bārgah meñ iltijā koī nahīñ hotī

ilāhī yā mujhī ko iltijā karnā nahīñ aatā

qubul is bargah mein iltija koi nahin hoti

ilahi ya mujhi ko iltija karna nahin aata

yā-rab ġham-e-hijrāñ meñ itnā to kiyā hotā

jo haath jigar par hai vo dast-e-duā hotā

ya-rab gham-e-hijran mein itna to kiya hota

jo hath jigar par hai wo dast-e-dua hota

is tarah kar gayā dil ko mire vīrāñ koī

na tamannā koī baaqī hai na armāñ koī

is tarah kar gaya dil ko mere viran koi

na tamanna koi baqi hai na arman koi

umīd-e-vasl ne dhoke diye haiñ is qadar 'hasrat'

ki us kāfir kī haañ bhī ab nahīñ ma.alūm hotī hai

umid-e-wasl ne dhoke diye hain is qadar 'hasrat'

ki us kafir ki han bhi ab nahin malum hoti hai