aap kī tasvīr thī aḳhbār meñ

kyā sabab hai aap ghar jaate nahīñ

aap ki taswir thi aKHbar mein

kya sabab hai aap ghar jate nahin

jab koī naujavān martā hai

aarzū kā jahān martā hai

jab koi naujawan marta hai

aarzu ka jahan marta hai

tū ḳhudā hai to bajā mujh ko Darātā kyuuñ hai

jā mubārak ho tujhe tere karam kā saaya

tu KHuda hai to baja mujh ko Daraata kyun hai

ja mubarak ho tujhe tere karam ka saya

sunā hai log vahāñ mujh se ḳhaar khāte haiñ

fasāna aam jahāñ merī bebasī kā hai

suna hai log wahan mujh se KHar khate hain

fasana aam jahan meri bebasi ka hai

mujh se kyā pūchhte ho naam pata

maiñ to bas aap kā hī saaya huuñ

mujh se kya puchhte ho nam pata

main to bas aap ka hi saya hun

sitāre botī rahīñ niiñd se tahī āñkheñ

idhar ye haal ki dāman bhī tar nahīñ hotā

sitare boti rahin nind se tahi aankhen

idhar ye haal ki daman bhi tar nahin hota

kāñch ke alfāz kāġhaz par na rakh

sañg-e-ma.anī ban ke Takrā.ūñgā maiñ

kanch ke alfaz kaghaz par na rakh

sang-e-mani ban ke Takraunga main

qadroñ kī hadeñ toḌ na.ī tarah nikāl

dam tujh meñ agar hai to bāġhī ho jā

qadron ki haden toD nai tarah nikal

dam tujh mein agar hai to baghi ho ja

bahkī huī rūhoñ ko tasallī de kar

kho.e hue ajsām kī jannat ho jā

bahki hui ruhon ko tasalli de kar

khoe hue ajsam ki jannat ho ja

bhaTak na jaatā agar zaat ke bayābāñ meñ

to merā naqsh-e-qadam merā rāhbar hotā

bhaTak na jata agar zat ke bayaban mein

to mera naqsh-e-qadam mera rahbar hota

hisār-e-ḳhauf-o-hirās meñ hai butān-e-vahm-o-gumāñ kī bastī

mujhe ḳhabar hī nahīñ ki ab maiñ junūb meñ yā shumāl meñ huuñ

hisar-e-KHauf-o-hiras mein hai butan-e-wahm-o-guman ki basti

mujhe KHabar hi nahin ki ab main junub mein ya shumal mein hun

junūñ-āsār mausam kā pata koī nahīñ degā

tujhe ai dasht-e-tanhā.ī sadā koī nahīñ degā

junun-asar mausam ka pata koi nahin dega

tujhe ai dasht-e-tanhai sada koi nahin dega

sañg-parastoñ kī bastī meñ shīsha-garoñ kī ḳhair nahīñ hai

jin kī āñkheñ nuur se ḳhālī un ke dil haiñ aahan aahan

sang-paraston ki basti mein shisha-garon ki KHair nahin hai

jin ki aankhen nur se KHali un ke dil hain aahan aahan

maiñ huuñ 'muztar' badan kī nagrī meñ

mere hisse meñ lā-makāñ likhnā

main hun 'muztar' badan ki nagri mein

mere hisse mein la-makan likhna

ab faqīrī meñ koī baat nahīñ

hashmat-o-jāh-o-karr-o-far de de

ab faqiri mein koi baat nahin

hashmat-o-jah-o-karr-o-far de de