آنکھوں کے خواب دل کی جوانی بھی لے گیا

وہ اپنے ساتھ میری کہانی بھی لے گیا

غزل کے پردے میں بے پردہ خواہشیں لکھنا

نہ آیا ہم کو برہنہ گزارشیں لکھنا

اچھا ہوا میں وقت کے محور سے کٹ گیا

قطرہ گہر بنا جو سمندر سے کٹ گیا

زندگی خود کو نہ اس روپ میں پہچان سکی

آدمی لپٹا ہے خوابوں کے کفن میں ایسا

اس کی قربت کا نشہ کیا چیز ہے

ہاتھ پھر جلتے توے پر رکھ دیا

ایک دن غرق نہ کر دے تجھے یہ سیل وجود

دیکھ ہو جائے نہ پانی کہیں سر سے اونچا

کس طرح عمر کو جاتے دیکھوں

وقت کو آنکھوں سے اوجھل کر دے

مجھے تراش کے رکھ لو کہ آنے والا وقت

خزف دکھا کے گہر کی مثال پوچھے گا

وقت نے کس آگ میں اتنا جلایا ہے مجھے

جس قدر روشن تھا میں اس سے سوا روشن ہوا

جلا ہے شہر تو کیا کچھ نہ کچھ تو ہے محفوظ

کہیں غبار کہیں روشنی سلامت ہے

ہر اک قیاس حقیقت سے دور تر نکلا

کتاب کا نہ کوئی درس معتبر نکلا

شخصیت کا یہ توازن تیرا حصہ ہے فضاؔ

جتنی سادہ ہے طبیعت اتنا ہی تیکھا ہنر

ہم حسین غزلوں سے پیٹ بھر نہیں سکتے

دولت سخن لے کر بے فراغ ہیں یارو

کسی لمحے تو خود سے لا تعلق بھی رہو لوگو

مسائل کم نہیں پھر زندگی بھر سوچتے رہنا

یوں معانی سے بہت خاص ہے رشتہ اپنا

زندگی کٹ گئی لفظوں کو خبر کرنے میں

تلاش معنی مقصود اتنی سہل نہ تھی

میں لفظ لفظ اترتا گیا بہت گہرا

خبر مجھ کو نہیں میں جسم ہوں یا کوئی سایا ہوں

ذرا اس کی وضاحت دھوپ کی چادر پہ لکھ دینا

لوگ مجھ کو مرے آہنگ سے پہچان گئے

کون بدنام رہا شہر سخن میں ایسا

پلکوں پر اپنی کون مجھے اب سجائے گا

میں ہوں وہ رنگ جو ترے پیکر سے کٹ گیا

خاک شبلیؔ سے خمیر اپنا بھی اٹھا ہے فضاؔ

نام اردو کا ہوا ہے اسی گھر سے اونچا

تو ہے معنی پردۂ الفاظ سے باہر تو آ

ایسے پس منظر میں کیا رہنا سر منظر تو آ

اب مناسب نہیں ہم عصر غزل کو یارو

کسی بجتی ہوئی پازیب کا گھنگھرو لکھنا

کہاں وہ لوگ جو تھے ہر طرف سے نستعلیق

پرانی بات ہوئی چست بندشیں لکھنا

تجھے ہوس ہو جو مجھ کو ہدف بنانے کی

مجھے بھی تیر کی صورت کماں میں رکھ دینا

وہ میل جول حسن و بصیرت میں اب کہاں

جو سلسلہ تھا پھول کا پتھر سے کٹ گیا

نطق سے لب تک ہے صدیوں کا سفر

خامشی یہ دکھ بھلا جھیلے گی کیا

یہ تماشا دیدنی ٹھہرا مگر دیکھے گا کون

ہو گئے ہم راکھ تو دست دعا روشن ہوا

اے فضاؔ اتنی کشادہ کب تھی معنی کی جہت

میرے لفظوں سے افق اک دوسرا روشن ہوا

دیکھنا ہیں کھیلنے والوں کی چابک دستیاں

تاش کا پتا سہی میرا ہنر تیرا ہنر

شب گزیدہ کو ترے اس کی خبر ہی کب تھی

دن جو آئے گا غم لا متناہی دے گا

لہو ہی کتنا ہے جو چشم تر سے نکلے گا

یہاں بھی کام نہ عرض ہنر سے نکلے گا