چرچا ہمارا عشق نے کیوں جا بہ جا کیا

دل اس کو دے دیا تو بھلا کیا برا کیا

تعصب بر طرف مسجد ہو یا ہو کوئے بت خانہ

رہ دل دار پر جاتا قدم یوں بھی ہے اور یوں بھی

درد کو رہنے بھی دے دل میں دوا ہو جائے گی

موت آئے گی تو اے ہمدم شفا ہو جائے گی

بھلا تو اور گھر آئے مرے کیوں کر یقیں کر لوں

تخیل کیوں نہ ہو میرا تری آواز پا کیوں ہو

رخسار پر ہے رنگ حیا کا فروغ آج

بوسے کا نام میں نے لیا وہ نکھر گئے

دنیا بس اس سے اور زیادہ نہیں ہے کچھ

کچھ روز ہیں گزارنے اور کچھ گزر گئے

وہ سر ہی کیا کہ جس میں تمہارا نہ ہو خیال

وہ دل ہی کیا کہ جس میں تمہارا گزر نہ ہو

مے نہ ہو بو ہی سہی کچھ تو ہو رندوں کے لئے

اسی حیلہ سے بجھے گی ہوس جام شراب