aane lage haiñ vo bhī ayādat ke vāste

ai chārāgar marīz ko achchhā kiyā na jaa.e

aane lage hain wo bhi ayaadat ke waste

ai chaaragar mariz ko achchha kiya na jae

siine meñ rāz-e-ishq chhupāyā na jā.egā

ye aag vo hai jis ko dabāyā na jā.egā

sine mein raaz-e-ishq chhupaya na jaega

ye aag wo hai jis ko dabaya na jaega

phir ga.ī ik aur hī duniyā nazar ke sāmne

baiThe baiThe kyā batā.ūñ kyā mujhe yaad aa gayā

phir gai ek aur hi duniya nazar ke samne

baiThe baiThe kya bataun kya mujhe yaad aa gaya

un kī jafāoñ par bhī vafā kā huā gumāñ

apnī vafāoñ ko bhī farāmosh kar diyā

un ki jafaon par bhi wafa ka hua guman

apni wafaon ko bhi faramosh kar diya

huī muddat ki un ko ḳhvāb meñ bhī ab nahīñ dekhā

maiñ jin galiyoñ meñ apne dostoñ ke saath khelā thā

hui muddat ki un ko KHwab mein bhi ab nahin dekha

main jin galiyon mein apne doston ke sath khela tha

bhūlī nahīñ ujḌe hue gulshan kī bahāreñ

haañ yaad haiñ vo din ki hamārā bhī ḳhudā thā

bhuli nahin ujDe hue gulshan ki bahaaren

han yaad hain wo din ki hamara bhi KHuda tha

kis shaan se ga.e haiñ shahīdān-e-kū-e-yār

qātil bhī haath uThā ke sharīk-e-duā hue

kis shan se gae hain shahidan-e-ku-e-yar

qatil bhi hath uTha ke sharik-e-dua hue