merī sanjīda tabī.at pe bhī shak hai sab ko

baaz logoñ ne to bīmār samajh rakkhā hai

meri sanjida tabiat pe bhi shak hai sab ko

baz logon ne to bimar samajh rakkha hai

ye bad-nasībī nahīñ hai to aur phir kyā hai

safar akele kiyā ham-safar ke hote hue

ye bad-nasibi nahin hai to aur phir kya hai

safar akele kiya ham-safar ke hote hue

tere mehmāñ ke svāgat kā koī phuul the ham

jo bhī niklā hameñ pairoñ se kuchal kar niklā

tere mehman ke swagat ka koi phul the hum

jo bhi nikla hamein pairon se kuchal kar nikla

tū ek saal meñ ik saañs bhī na jī paayā

maiñ ek sajde meñ sadiyāñ ka.ī guzār gayā

tu ek sal mein ek sans bhi na ji paya

main ek sajde mein sadiyan kai guzar gaya

dar-o-dīvār bhī ghar ke bahut māyūs the ham se

so ham bhī raat is jāgīr se bāhar nikal aa.e

dar-o-diwar bhi ghar ke bahut mayus the hum se

so hum bhi raat is jagir se bahar nikal aae

yahāñ mazbūt se mazbūt lohā TuuT jaatā hai

ka.ī jhūTe ikaTThe hoñ to sachchā TuuT jaatā hai

yahan mazbut se mazbut loha TuT jata hai

kai jhuTe ikaTThe hon to sachcha TuT jata hai

vo ek raat kī gardish meñ itnā haar gayā

libās pahne rahā aur badan utaar gayā

wo ek raat ki gardish mein itna haar gaya

libas pahne raha aur badan utar gaya

dard āsānī se kab pahlū badal kar niklā

aañkh kā tinkā bahut aañkh masal kar niklā

dard aasani se kab pahlu badal kar nikla

aankh ka tinka bahut aankh masal kar nikla

ye intiqām hai yā ehtijāj hai kyā hai

ye log dhuup meñ kyuuñ haiñ shajar ke hote hue

ye intiqam hai ya ehtijaj hai kya hai

ye log dhup mein kyun hain shajar ke hote hue