dil ko ġham raas hai yuuñ gul ko sabā ho jaise

ab to ye dard kī sūrat hī davā ho jaise

dil ko gham ras hai yun gul ko saba ho jaise

ab to ye dard ki surat hi dawa ho jaise

dasht-e-vafā meñ jal ke na rah jaa.eñ apne dil

vo dhuup hai ki rañg haiñ kaale paḌe hue

dasht-e-wafa mein jal ke na rah jaen apne dil

wo dhup hai ki rang hain kale paDe hue

milne ko hai ḳhamoshi-e-ahl-e-junūñ kī daad

uThne ko hai zamīñ se dhuāñ dekhte raho

milne ko hai KHamoshi-e-ahl-e-junun ki dad

uThne ko hai zamin se dhuan dekhte raho

ab to dīvānoñ se yuuñ bach ke guzar jaatī hai

bū-e-gul bhī tire dāman kī havā ho jaise

ab to diwanon se yun bach ke guzar jati hai

bu-e-gul bhi tere daman ki hawa ho jaise

taz.īn-e-bazm-e-ġham ke liye koī shai to ho

raushan charāġh-e-dil na sahī jām-e-mai to ho

tazin-e-bazm-e-gham ke liye koi shai to ho

raushan charagh-e-dil na sahi jam-e-mai to ho

yādeñ chaleñ ḳhayāl chalā ashk-e-tar chale

le kar payām-e-shauq ka.ī nāma-bar chale

yaaden chalen KHayal chala ashk-e-tar chale

le kar payam-e-shauq kai nama-bar chale